ZEREMIAH 32 - Mara Bible RV (BSI)

Khihpi dôhpa ta a y chhôh ta Zeremiah ta Anathô liata lyu a chalei

¹ He he Zudâh bei Zedekia abeina kô hrawhna liata Zeremiah hnohta Abeipa bie a vaw tlôpa a châ. Cha daihti cha Nebukaneza abeina kô hrawh hleichariena a châ.

² Cha daihti liata, Babylaw bei pheisaihzy ta Zerusale cha dôh ei ta. Cha daihti cha Zudâh bei o vaituhpa dôhpachhôh tlyhmia liata hrohsopa Zeremiah â tâh chhôh châ ta.

³ He hawhta hrohsona bie a phuahpa vâta Zudâh bei Zedekia ta a patâhpa a châ: “Abeipa ta hetana heta a tah: He khihpi he Babylaw bei ku liata hlâ aw na ta, ano ta a la aw.

⁴ Zudâh bei Zedekia chhao Kaldia mo ku tawhta pua leipa aw ta, Babylaw bei ku liata hlâpa châ tlai aw ta, Babylaw bei cha hmiachhy ta hmô aw ta bie â chho aw.

⁵ Zedekia cha Babylaw lâ a chhi aw ta, ano ei vaw tly hlâlei cha, cha liata a y thlâh ha aw. Kaldia mo cha a dyuh hra u la, pahnie aw vei ei chi, Abeipa ta a tah.”

⁶ Zeremiah ta reih ta, “Abeipa bie ei hnohta vaw tlô ta,

⁷ ‘Na paw unawhpa Sâluh sawchapawpa Hâname nâ lâ a vy aw ta, na hnohta, Anathô liata ei lyu he nâ ta chalei mah y. He ei lyu he chaleipa ta chatlai theina cha nâma tovyuh a châ, tahpa ta a cha chho aw,’ tah ta.

⁸ Chatanachata ei heinawhpa Hâname cha Abeipa bie hawhta, vaituhpa dôhpachhôh tlyhmia liata kei lâ a vy ta, ei hnohta, ‘Benzami râh Anathô liata ei lyu he nâ ta chalei mah y, ryuto a pakhy theipa na châpa vâta, nâ ta na chatlai awpa a châ,’ tah ta. Chatanachata cha cha Abeipa bie kha a châ tahpa pahno ha na ta.

⁹ “Chatanachata ei heinawhpa Hâname tawhta Anathô liata lyu cha chalei na ta, a râh mâ ziepa cha tâkâ khopathliahpa na ta, tâkâ sekel tlaw hrawh hleisari mâpa râh a châ.

¹⁰ Râh chaleina ryuchâ liata ei moh roh na ta, moh chahnaona ta chahnao pa-i na ta, pahnokheituhpazy pahmaohpa ta, tâkâ cha khopathliahna ta ei pathliah.

¹¹ Chatawhcha chaleina ryuchâ, moh chahnao pa-ipa nata chahnao leipa cha la na ta. Ryuchâ liana chata tao awpa nata tao lei awpazy roh khaipa a châ.

¹² Achaleina ryuchâ cha, ei heinawhpa Hâname moh­mô liata nata ryuchâ liata ama moh a roh hrapa pahnokheituhpazy nata vaituhpa dôhpachhôh tlyhmia liata Zu chyhsa a tyuhpa zydua mohmô ta Mâsei saw­chapawpa Neriah sawchapawpa Bâruka hnohta pie na ta.

¹³ Ama mohmô ta Bâruka cha biepie na ta, a hnoh ta,

¹⁴ ‘Pheisaihzy Abeipa, Izarei Khazohpa ta hetana heta a tah: He chaleina ryuchâ, moh chahnaona chhaopa ryuchâ nata chahnao leipazy he la la, daihti pasipi a y thei nawpa ta, alei beih liata khô mah y.

¹⁵ Pheisaihzy Abeipa, Izarei Khazohpa ta hetana heta a tah: He râh liana heta ozy, lyuzy nata kre sadôzy chaleina a y heih aw,’ tah na ta.

Novâhna châta Zeremiah thlahchhâna

¹⁶ “Neriah sawchapawpa Bâruka hnohta chaleina ryuchâ ei pie khai tawhta, hetana heta Abeipa lâta thlah ei chhâ:

¹⁷ Hy Abeipa Zehôvâh, avâ nata alei he, nâma tlai ta na hmotaotheina rônahpa nata na bâh pazawhpa ta, na taopazy a châ hih! Nâma châta la hmo ru tupa y vei.

¹⁸ Sâh hluhpi chô liata kyhpachâna tleih beih leipa palâsa chi ta, pawzy paraona chhao, âmo hnôhlâ ta ama sawzy chô liata na thô tyh. Hy Khazoh rônahpa nata thatlôpa, na moh cha Pheisaihzy Abeipa châ ta,

¹⁹ ryhrao thai ngaitapa nata hmotao thei ngaitapa na châ. Chyhsapa sawzy hrozie zydua na mo ta a hmôtuhpa châ chi ta, chyhsa to ama hrozie nata ama hmotaopazy theilâpa hawhta lymâ a pietuhpa na châ.

²⁰ Izi râh liata ngianazy nata hmonoâhpazy palâsa chi ta, tanoh taihta Izarei liata nata chyhsapa zydua hry liata palâsa lymâpa ta, tanoh ta hmo a ypa hawh tlaina heta, moh phana nâ tao hapa a châ.

²¹ Na phopi Izarei he, ngianazy nata hmonoâhpazy chhaota Izi râh tawhta a chhi papua chi ta, ku thatlôpa nata bâh pazawhpa ta, rarôh y ngaitapa ta a kaw chhi papuapa ta,

²² he sâhpiti nata kheihti lona râh, âmo pathlatuhpazy hnohta pie awpa ta bie nâ vaw taihpa râh he na pie ei.

²³ Bie nâ taih râh lâ cha a ngia ei ta, râh cha ama hnei. Châhrasala na bie a ngiah leipa ei ta, na ryhpa a chhih hra leipa ei ta, tao awpa ta bie na piepazy tao veih ei. Chavâta he chhiena zydua he ama chô liata na patlôsapa a châ hih.

²⁴ Moh tua, khihpi la awpa ta dôhna alei pathlupazy â kaw sâh kaw bâ hih. Zaozi nata chakâhna nata potlana zy vâta khihpi he a dyuhtuhpa Kaldia mo ku liata piepa a châ ha hih. Na reipa kha vaw tlô ha ta, moh tua, na hmô hih.

²⁵ Chatanachôta Hy Abeipa Zehôvâh y, nâ ta ei hnohta, ‘Tâkâ ta lyu chalei la, pahnokheituhpazy hnei mah y,’ na tah chi ta. Khihpi cha Kaldia mo ku liata piepa a châ hapa chhao ta, lyu chalei awpa ta eina chhopa chi a châ,” tah ta.

²⁶ Chatawhcha Abeipa bie Zeremiah hnohta vaw tlô ta:

²⁷ “Pachâ teh, kei Abeipa he hmohrohneipa zydua Khazohpa ei châ. Ei châta hmo a ru tupa a y ma?

²⁸ Chavâta Abeipa ta hetana heta a tah: Pachâ teh, he khihpi he Kaldia mo ku liata nata Babylaw bei Nebukaneza ku liata pie aw na ta, ano ta khihpi he a la aw.

²⁹ He khihpi a dyuh ngâpa Kaldia mo a vy aw ei ta, khihpi he mei ta rao aw ei ta, ama pakâ khai aw. Ei hie pahâh nawpa ta, vâphuhzy tawhta Bâlâ lâta amâ theih tyhna nata khazoh hropazy lâta dopa hlâna ama patlai tyhna ozy chhao mei ta ama rao khai aw.

³⁰ Izarei pathlazy nata Zudâh pathlazy cha ama thyutlia no tawhta ei mohmô liata hmo pha leipa sai a taopa ama châ. Izarei pathlazy cha, ama ku ta a taopazy ta ei hie na pahâh awpa dei pahno ei ta, ama tao hropa y vei, Abeipa ta a tah.

³¹ He khihpi he ama padua tua noh tawhta tanoh taihta ei hie na pahâhpa ta, ei ru nâ pachhôtuhpa a châ. Chavâta ei mohmô tawhta ei pahlei syulyu ha aw ei.

³² Izarei pathlazy nata Zudâh pathlazy ta ei chô liata hmo pha leipa tao ei ta, ama beizy, ama beimachâzy, ama theihthaipazy, ama hrohsopazy, Zudâh râhsawzy nata Zerusale khihsawzy ta ei chô liata hmo pha leipazy taopa ta ei hie eina pahâhna zydua vâ ei ta, cha hmo cha ama chô liata ei patlôsa aw.

³³ Ama hmia na chhy leipa ei ta, ama hnôh tlao eina chhy ei. Ei pachu ngâ thlâh hapa chhao ei ta, pachuna cha a pyh awpa ta ama nah pachôh veih ei.

³⁴ Ei moh a phaohpa o liata ama hmo pasichhihpazy soh ei ta, o cha ama papuapalei.

³⁵ Hinô Sawchapawpa Saikao liatapa Bâlâ achhyna su sâhpazy padua ei ta, ama sawchapawzy nata ama sawchanôzy Môleka lâ ama hlâ tyh. Zudâh pamoleisa nawpa ta, he hmo pasichhihpa tao awpa heta, biepie leipa ei na ta, ei palôh liata chhao a lâ beih vei.

Ama Khazohpa châ aw na ta, ei phopi ama châ aw

³⁶ “Chavâta tahmâ Abeipa Izarei Khazohpa ta, ‘He khihpi he zaozi nata chakâhna nata potlana zy ta Babylaw bei ku liata hlâpa a châ aw,’ nama tahpa khihpi kyh liata hetana heta a tah:

³⁷ Moh teh u, ei hiehâhna, ei pathiiana nata ei ruchhôna ru ngaitapa ta âmo ei to papua hana râh zydua tawhta pakhy heih aw ei na ta, he su lâ he a vaw chhi pakhua aw ei na ta, â bohpa ta ei paysa aw ei.

³⁸ Ei phopi châ aw ei ta, kei ama Khazohpa ei châ aw.

³⁹ Âmo pha nawpa nata âmo hnôhlâ ta ama pathlazy pha nawpa ta chhâzaw ta eina chi thei nawpa ei ta, palôh miakha paphaosa aw ei na ta hrozie miakha ei pahneisa aw ei.

⁴⁰ Ama hnohta tlyzaw biehrai tao aw na ta, ama chô liata hmo pha taopa a heihsai khao aw va na. Ama palôh liata keima china soh aw na ta, nâ heihsai khao aw veih ei.

⁴¹ Ama phana taopa cha ei lyna châ aw ta, ei palôh nata ei hro zydua ta he râh liata ngâchhihpa ta ei loh aw ei.

⁴² “Abeipa ta hetana heta a tah: He phopi chô liata chhiena rarôh ypa ei patlôsapa hawhna khata, ama hnohta hmo phapa bie ei taihpa zydua chhao kha ei patlôsa aw.

⁴³ ‘Chyhsapa nata râhsa y leina roryhrapa râh, Kaldia mo ku liata pie hapa râh,’ nama tahpa râh liana heta, lyuzy nama chalei heih aw.

⁴⁴ “Ama seichâna tawhta pakuasapa ta vânoh ei patosa heih awpa vâ ei ta, Benzami râh liata zy, Zerusale chheipâh suzy liata zy, Zudâh khihpizy liata zy, tlâh râh khihpizy liata zy, Sephelâ bypi râh khihpizy liata nata Neke chho râh khihpizy liata, chyhsazy ta tâkâ ta lyuzy chalei aw ei ta, chaleina ryuchâzy roh aw ei ta, moh chahnaona ta chahnao pa-ipa ta, pahnokheituhpazy ta ama pahnokhei aw,” Abeipa ta a tah.