ZEREMIAH 31 - Mara Bible RV (BSI)

Mâchhiesana tawhta alyna lâ

¹ “Cha daihti liata, kei he Izarei pho zydua châta Khazohpa cha aw na ta, âmo cha ei phopi ama châ aw,” Abeipa ta a tah.

² Abeipa ta hetana heta a tah: “Zaozi ta thie bâhpazy cha, Râhchawhpa liata ngiachhiena ama to; Izarei ta apahâna tlua ta,

³ Lâhlapi tawhta a hnohta Abeipa â vaw luah. Tlyzaw kyhpachâna ta kyh cha pachâ na ta, Chavâta ei ngâchhihna na chô liata ei palâsa lymâ.

⁴ Hy Izarei laihsa kôpa! Cha padua pathi heih aw na ta, Â ipa ta paduapa na châ aw. Khohzy ta a tobi heih aw chi ta, Thaphana noh lâna suzy liata nâ hlao aw.

⁵ Samâri tlâhpizy liata Kre sadôzy tao heih aw chi ta; A lohtuhpazy ta loh aw ei ta, A theizy ama nie aw.

⁶ Epharai tlâh râh liata vaituhpazy ta, ‘Thyu teh u, Zaio lâ sie ei sih la, Abeipa eima Khazohpa lâ sie ei suh u,’ Ama tahna nohzy a vaw tlô aw.”

⁷ Abeipa ta hetana heta a tah: “Zakaw châta thaphapa ta hla sa u la, Phopi rônah chaipa châta thata awh teh u; Tlâh awhpa ta reithai u la, ‘Hy Abeipa na phopi he pachha la, Izarei laibâhpa he pachha mah y,’ tah teh u.

⁸ Pachâ teh u, maw lâ râh tawhta a vaw chhi aw ei na ta, Alei su lâhla chaipazy tawhta ei vaw chhi aw ei; Ama hry liata mochaopa nata pheisypazy a hlao aw ei ta, Saw phaohpa nata nawh zeihpazy amâ hlao aw; Chatanachata zawpi hluh ngaita pa ta, He su lâ he ama vaw kua aw.

⁹ Chana chôta ta a vy aw ei ta, Zawngiah awpa ta amâ hawna chôta Ei chhi pakhua aw ei. Izarei châta paw châ na ta, Epharai cha ei sawchapaw uhtheipa a châ; Chavâta vahtie ti lona kiahzy liata pasiesa aw ei na ta, Amâ chapia lei nawpa ta lâpi palâpa liata ei chhi aw ei.

¹⁰ “Hy phopizy saih u, Abeipa bie thei u la, Tilaipi kiah râh hlapazy liata phuah teh u; ‘Izarei a papaituhpa ta, Izarei cha pakhy heih aw ta; Mietaku vaituhpa ta a mietaku zaw a vaipa hawhta, Izarei cha a vaih heih aw,’ tah teh u.

¹¹ Abeipa ta Zakaw cha chatlai ha ta, Ano hlâta ku thatlô viapa tawhta a pachha haw.

¹² A vy aw ei ta, Zaio tlâh sâhpa liata hla sapa ta awh aw ei ta, Abeipa phana vâta hmiakai ngaitapa ta ama y aw; Sâh zy, kresawhti zy, sathaw zy vâta Ama hmiakai aw ta; Mietaku dawpa nata viahchao dawpazy vâta Ama hmia a kai kaw aw. Ama hrona cha, Ti pie phapa sadô hawhta châ aw ta, Panao khao aw veih ei.

¹³ Chatawhcha laihsa kôpazy a lypa ta lâh aw ei ta, Satliapazy nata machâpazy thaphapa ta ama y aw; Ama mâchhiesana cha, Alyna pachâsa aw na ta; Thlapalôh aw ei na ta, Pachârôhna vyuhpa ta thaphana ei pie aw ei.

¹⁴ Theihthaipazy hro cha, Sa thawhpa ta lôhrâpatlôsa aw ei na ta; Ei phopi chhao, Ei phana ta lôhrâtlôpa ta ama y aw,” Abeipa ta a tah.

¹⁵ Abeipa ta hetana heta a tah: “Râmâ liata pyu theipa châ ta, Chaphôhtuna nata vâsâhpa ta chana ao theipa a châ. Râkheli ta a sawzy chakhei ta, A sawzy ama y khao leipa vâta, A thlah palôh thei awpa châ vei.”

¹⁶ Abeipa ta hetana heta a tah: “Chana ta na ao papua leipa la, Na mo tawhta mothlih loh khah sy; Na hmotaopa vâta lymâ piepa châ aw chi ta, Na sawzy cha chariahpa râh tawhta ama vaw kua aw,” Abeipa ta a tah.

¹⁷ “Na hmialâ daihti châta hnabeiseihna a y, Na sawzy ama râh lâ ama vaw kua heih aw,” Abeipa ta a tah.

¹⁸ “Epharai chapa ao hetana heta ei thei: ‘Na chhorei chi ta, Viahchao dawpa hriepa hawhta Eina chhorei chi. Paduapathipa ei châ thei nawpa ta, Nâ chhi pakhua heih mah y, Abeipa ei Khazohpa mah na châ tâh.

¹⁹ Lâpi ei tlei khai tawhta, Ro na ta; Ei vaw pahno thai tawhta, Ei byhpi ei chô. Ei thyutlia nota maophyuhna ei phaopa vâta, Nozapa nata nohzaopa ta ei y.’

²⁰ Epharai cha ei sawchapaw kho ngaitapa châ ta, Ei saw mopakiapa châ vei ma? A pha leina kyh ei rei tyhpa chhao ta, Khâ ei thei ngâ thlâh ha tyh. Chavâta ei palôh ta ano cha vâ kaw tyh ta, A chô liata zawh ei ngiah tlai aw,” Abeipa ta a tah.

²¹ “Lâpi ngianazy a tao la, Lâpi pahnona tôhzy a bô teh; Lâlai cha a phapa ta ngia la, Lâpi nâ chhihpa cha a phapa ta ngia mah y. Hy Izarei laihsa kôpa, vaw kua la, Na khihpizy lâ he vaw kua ha mah y.

²² Hy sawchanô hnôhsypa, Khati taih ma noraihpa ta na y aw? Abeipa ta alei liata hmo thiehpa tao ta, Chanô ta chapaw tlao a pabohsa ha hih.”

²³ Pheisaihzy Abeipa, Izarei Khazohpa ta hetana heta a tah: “Vânoh ei patosa heih ti ei ta cha, he reikahzy he Zudâh râh nata a khihpizy liata ama hmâh heih aw: “‘Hy siana pahrâna su, Abeipa ta byhnâ cha pie sala; Hy tlâh pathaihpa, Abeipa ta byhnâ cha pie mawh sy!’ tahpa ta.

²⁴ Zudâh nata a khihpi zydua cha, cha liata hmaohkha ta pahrâ aw ei ta, lyutaopazy nata sahroh pasatuhpazy chhao hmaohkha ta ama pahrâ aw.

²⁵ Hro thachhâpazy lôhrâ patlô aw ei na ta, hro panaopa maih ama tha ei patlô aw ei.”

²⁶ Cha nona chata a vaw hra na ta, mohmia pasaih na ta, ei mokuh pahâh ngaitapa ta ei môpa vaw châ ta.

²⁷ “Pachâ teh u, Izarei râh nata Zudâh râh liata chyhsapa chi nata sahroh chi ei tu nawpa nohzy a vaw tlô hai,” Abeipa ta a tah.

²⁸ “Chatawhcha hetana heta a vaw châ aw. Izarei sawzy nata Zudâh sawzy phiapa ta y ei ta, paraopa nata thypa ta ama ypa mokhâh na ta, pahleipadiapa nata pasasapa ta ama ypa ei mokhâhpa hawhna ei khata, âmo cha paduapathipa ta ama ypa nata lopa ta ama y awpa chhao ei mokhâh aw ei,” Abeipa ta a tah.

²⁹ Cha nohzy liata cha, “‘Pawzy ta kre thaopazy nie ei ta, Ama sawzy hâh â za,’ tah khao aw veih ei.

³⁰ Chyhsa to âmo paraona chyu ama thikhei aw. Kre thaopazy a niepazy cha, âmo hâh chyu â za aw.

Biehrai Thiehpa

³¹ “Pachâ teh u, Izarei pathlazy nata Zudâh pathlazy hnohta biehrai thiehpa ei tao nawpa nohzy a vaw tlô hai,” Abeipa ta a tah.

³² “Âmo pathlatuhpazy ama ku patupa ta Izi râh tawhta ei chhi papua noh ta ama hnohta ei hraipa biehrai hawhpa, ama vahpa ei châpa chhao ta, ama paraopa ei biehrai hawhpa kha châ aw vei,” Abeipa ta a tah.

³³ “Cha nohzy hnôhlâ ta Izarei pathlazy hnohta biehrai ei tao awpa cha, he he a châ,” Abeipa ta a tah. “Ama chhôh liata ei ryhpa bie soh aw na ta, ama palôh liata ei roh ha aw. Kei ama Khazohpa châ aw na ta, âmo cha ei phopi ama châ aw.

³⁴ Ahy hmahta ama vaih nata ama unawhpa cha, ‘Abeipa pahno teh,’ tahpa ta pachu khao aw veih ei. A chyh chaipa tawhta a lai chaipa taihta, ama zydua ta eina pahno ha aw ei,” Abeipa ta a tah. “Ama paraona cha a ngiahthai aw na ta, ama moleina chhao a thei khao aw va na.”

³⁵ Nohchhô khaihna châta noh a pietuhpa, Zâ khaihna châta thlâpâ nata awhsizy yzie awpa a raotuhpa, Tilaipi chatlaosa ta, Tichatlaopazy a paaohsatuhpa, A moh Pheisaihzy Abeipa ta hetana heta a tah:

³⁶ “He ryhpa raopazy he ei hmiakô tawhta a lei khiahta cha, Izarei pathlazy cha lei aw ei ta, Phopi ama châna chhao, Ei hmiakô tawhta chhâzaw ta a lei aw,” Abeipa ta a tah.

³⁷ Abeipa ta hetana heta a tah: “Chô lâ avâzy khi thlie theipa châ sala, Ry lâta alei abônazy hmô theipa a châ khiahta cha, Izarei chipathlazy chhao ama hmotaopa zydua vâta, Ama zydua ta ei thy pathlah khai aw ei,” Abeipa ta a tah.

³⁸ “Moh teh u, Hânane Osâhpa tawhta Achaki Chhikao taihta Abeipa châta khihpi paduapathi nawpa nohzy a vaw tlô hai,” Abeipa ta a tah.

³⁹ “Thliena ri cha Kâre tlâh taihta a palâpa ta sie via aw ta, Kôâ lâ a pako aw.

⁴⁰ Athipa ri nata buchâh thyna saikao zydua nata nochhi lâta Arâ Chhikao chaki liata a ypa Kidaraw vahtiepa taihta lyu zydua cha, Abeipa châta pathaihpa a châ aw. Khihpi cha khati ta hmahta phiapa nata paraopa châ khao aw vei.”