ZEREMIAH 30 - Mara Bible RV (BSI)

Izarei nata Zudâh paduapathina

¹ He he Zeremiah hnohta Abeipa tawhta bie a vaw tlôpa a châ:

² “Izarei Khazohpa Abeipa ta hetana heta a tah: ‘Na hnohta ei reipa bie zydua kha châbu liata roh khai mah y.

³ Moh teh, ei phopi Izarei nata Zudâh vânoh tona ei paduapathi heih nawpa nohzy a vaw tlô hai. Âmo pathlatuhpazy ei piepa râh lâ a chhi pakhua heih aw ei na ta, cha râh cha ama hnei heih aw,’ Abeipa ta a tah.”

⁴ Hezy he Izarei nata Zudâh kyh liata Abeipa biereipazy cha a châ:

⁵ “Abeipa ta hetana heta a tah: Thlalôhna ao châ leipa ta thlazohna ao thei pi ta, Chipa ta awhpa ao eima thei.

⁶ Tahmâ hiahri u la, moh tua u, Chapaw ta saw a phaoh thei ma? Kheihtazie ta ma chanô saw a zeihpa hawhta, Chapaw to ta ama py amâ hriapa ei hmô tly? Khazia hmia to a hlâh khai ha tly?

⁷ Cha noh rônahzie rimâ cha! Cha noh a lyupa rai y veih ei; Zakaw nôpona noh châ ta, Châhrasala cha tawhtapa cha pachhapa ta a y aw.

⁸ “Chatawhcha hetana heta a vaw châ aw. Cha noh liata ama raopaky thlie pachhô aw na ta, ama rao tawhta ei pahluh aw. Ama bâliazy chhao chhie aw na ta, chihropazy ta sei ta tao khao aw veih ei.

⁹ Abeipa ama Khazohpa nata ama bei châta ei padua awpa Dâvi tlao ama chakao aw,” Pheisaihzy Abeipa ta a tah.

¹⁰ “Chavâta Hy nâ chakaotuhpa Zakaw y, chi leipa la, Hy Izarei y, ngiarohpa ta y khah y,” Abeipa ta a tah. “Pachâ teh, lâhlapi tawhta cha pachha aw na ta, Na pathlazy ama seichâna râh tawhta ei pachha aw ei. Zakaw cha kua heihpa ta sidiapa nata chhôhmohpa ta y aw ta, Ahy ta hmahta pachisa khao aw veih ei.

¹¹ Cha pachha awpa ta na hnohta khâ y na ta, Ei cha papaina phopi zydua tlokhuh ei pachhâsa aw ei; Nâ deikua cha tlokhuh ta cha pachhâsa aw va na. Hrie leipa ta cha paysa cheita leipa aw na ta, Châhrasala â daihpa rakha ta ei cha hrie aw,” Abeipa ta a tah.

¹² “Abeipa ta hetana heta a tah: Na hmah patlâh thei awpa châ vei, Na hmah phaopa a ru ngaita.

¹³ Châ duakhei awpa y leipa ei ta, Na hmah châta thohna y hra leipa ta, Na châta tlâhna y vei.

¹⁴ Na kyhpachâpazy ta cha my khai ha ei ta, Cha pachâ khao veih ei; Na thaileichâna lai tu ha ta, Na moleina a hluh tupa vâta, Chariah tu ta cha tu na ta, Zawngiahna a hnei leipa khakhaipa hawhta ei cha hrie.

¹⁵ Khazia na hmah vâta na cha? Na pasana patlâh thei awpa châ vei. Na thaileichâna lai tu ha ta, Na moleina a hluh tupa vâta, Cha hmozy cha na chô liata ei taopa a châ.

¹⁶ Chavâta châ palâtuhpa zydua cha palâpa châ aw ei ta, Na chariahpa zydua sei ta ama sie aw; Châ hraotuhpazy hraopa châ aw ei ta, Hraona sôh ta châ hmâhtuhpazy chhao, Hraona sôh ta ei tao aw ei.

¹⁷ ‘Thy hapa’ cha tah ei ta, ‘He he ahy hmahta pachâ leipa Zaio a châ hih!’ Ama cha tahpa vâta, Tlâhna cha pie heih aw na ta, Na hmahzy ei patlâh aw,” Abeipa ta a tah.

¹⁸ “Abeipa ta hetana heta a tah: Moh tua, Zakaw poh ozy cha, Vânoh patosa heih aw na ta, A pahrâna suzy ei ngiachhie aw; Khihpi cha a raona â pachona su liata padua pathipa châ aw ta, Abei o chhao a y tyhna su liata â duah heih aw.

¹⁹ Ama hry tawhta alyna bie reina hlazy vaw pua aw ta, Thaphapa ta awhna pyuzy a vaw pua aw. Ama maluh papôh aw na ta, Maluh chyhta châ aw veih ei; Parônahsa aw ei na ta, Anawhpa châ aw veih ei.

²⁰ Ama sawzy hlâno daihtizy hawhna khata y heih aw ei ta, Ama pakhypi ei hmiakô liata paduapa châ heih aw ta, Âmo a tlybaituhpa zydua ei hrie aw ei.

²¹ Ama chhituhpa cha, Âmo chyhsa tlai châ aw ta; Ama ryureituhpa chhao, Âmo hry tawhta a vaw pua aw; Âmo rei ta nâ hnia ngâh awpa ama y leipa vâta, Nâ hnia awpa ta ano cha tao aw na ta, Eina vaw pangai aw.

²² Chatanachata ei phopi châ aw ei chi ta, Nama Khazohpa ei châ aw,” Abeipa ta a tah.

²³ Moh tua u, Abeipa thlihpipa huh! A pathiiana chothyu a chamiehpa pathli ha ta, Hmoparaopazy luh a chanaoh aw.

²⁴ A palôh achhuahnazy patlôpa ta a tao khai hlâlei cha, Abeipa hiehâhna ru ngaitapa cha kua aw vei. Noh hnôhlâzy liata cha, Cha hmozy cha nama pahno thai aw.