ZEREMIAH 3 - Mara Bible RV (BSI)

¹ “Chyhsa ta a lapinô ma sala, A lapinô cha o tawhta pua ta, Vahpa hropa a hnei ha khiahta cha, A lapinô cha a hnei heih aw ma? Cha hawhta taopa cha, Thata râh papuapaleipa châ aw vei ma? Na khopaw hluhpi liata nâ zuah khai tawhta ma, Kei lâ vaw kua heih nâ chhuah?” Abeipa ta a tah.

² “Awphy tlâh lakizy lâ khi ua la, sai tua rai, Ama châ ziakhei leina su a y ma? Râhchawhpa liata Arabia chyhsa hawhta, Na khopawzy hâpa ta lâkiahzy liata a tyuh tyh chi ta, Na sihryhna moleinazy ta râh na papuapalei haw.

³ Chavâta vâsua pakhâpa châ ta, Châhvâ avâ suah khao vei. Chatanachôta âzuahnô hmia phaoh chy chi ta, Nozana châh chhao pahno va chi.

⁴ Tahmâ tlai kha vei ma na aw chi ta, ‘Ei paw, ei thyutlia no tawhta ei viasa châ chi ta,

⁵ Chhâzaw ta ma na hie a hâh thlâh ha aw? Achhâna taihta ma na pathi a ia aw?’ na tah vei? Pachâ teh, cha hawhta reih tlôh chi ta, Châhrasala molei thei chaipa hawhta na molei lymâ.”

Ro awpa ta zikyurâna

⁶ Bei Zôsia â bei nota, Abeipa ta ei hnohta hetana heta tah ta: “Ngiapâ leipa Izarei hmotaopa, tlâh sâhpa to lâ kiah ta, tho hrohpa ry to liata â zuah tyhpa kha na hmô ma?

⁷ ‘Cha hmo zydua a tao khai tawhta cha, kei lâ a vaw kua heih bao aw na’, tah na ta. Châhrasala vaw kua hlei vei. A narônô haiphiahnô Zudâh chhao ta, cha cha a hmôpa a châ.

⁸ Ngiapâ hnôhsypa Izarei cha, â pheina zydua vâta mana châ pie na ta, ei papua hapa kha Zudâh ta a hmô. Chatanachôta a narônô haiphiahnô Zudâh ta chi hlei leipa ta, sie ta â zuah lymâ hra.

⁹ Sihryhpa ta a ypa a papeisa leipa vâta, lô nata tho zy liata a pheipa ta râh a papuapalei lymâ.

¹⁰ Cha zydua a hmô thlâh hapa chhao ta, a narônô haiphiahnô Zu­dâh cha palôh hmeiseihpa ta kei lâ vaw kua leipa ta, a pakheipa ta a vaw kua tyh,” Abeipa ta a tah.

¹¹ Abeipa ta ei hnohta hetana heta tah heih ta: “Ngiapâ leipa Izarei ta a narônô haiphiahnô Zudâh hlâta tlao a sia vianazie a palâsa.

¹² Sie la, he biezy he maw lâ kaw phuah la, ama hnohta, “‘Hy ngiapâ hnôhsypa Izarei y, Vaw kua ha mah y,’” Abeipa ta a tah. “‘Zawh a ngiah theipa châ na ta, Hiehâhpa ta cha moh khao leipa aw na ta, Chhâzaw ta ei hiehâh aw vei,’” Abeipa ta a tah.

¹³ “‘Nâ deikua cha na thaileichâna a pahno mah y: Abeipa na Khazohpa a dyuhpa ta, Tho hrohpa ry to liata chihropazy khokhei chi ta, Ei bie zyh va chi,’” Abeipa ta a tah.

¹⁴ “Hy ngiapâ hnôhsypa sawzy saih u, Nama vahpa ei châ hih, Vaw kua teh u. Khihpi tawhta pakha cha la aw ei na ta, Chhôh to tawhta pano lapa ta, Zaio lâ ei châ chhi aw ei,” Abeipa ta a tah.

¹⁵ “Keima palôh a phaohpa mietaku vaituhpazy cha pie aw ei na ta, âmo ta pahnona nata novâhnazy ta ama cha chhihtha aw.

¹⁶ Cha nohzy liata, chi hluhpi pathlapa ta, râh liata maluh thata nama pôh tita, Izarei sawzy ta Abeipa Biehrai Byh kyh reih khao aw veih ei. Ama palôh liata a ngia khao leipa aw ta, nâ thei khao hra aw veih ei. Ngiabâh khao leipa aw ei ta, tao khao hra aw veih ei,” Abeipa ta a tah.

¹⁷ Cha daihti liata, Zerusale cha Abeipa beidyuchhai tahpa châ aw ta, cha liata phopi zydua Abeipa hmiakô liata Zerusale liata a hmaoh aw ei ta, ama palôh moleina zipa ta kuhchhapa ta y khao aw veih ei.

¹⁸ Cha nohzy liata, Zudâh pathlazy cha Izarei pathlazy a pahlyh aw ei ta, maw lâ râh tawhta ama pathlatuhpazy hnohta ryuto châta ei piepa râh lâ hmaohkha ta amâ zu aw.

¹⁹ “‘Ei sawzy hry liata cha pahlao na ta, Râh zydua hry liata râh ngia chaipa cha, Na ryuto ta ei cha pie. Chavâta “Ei Paw” tahpa ta na awpa ta, Eina zina tawh chi ta, Eina tleisai lei awpa chi ta ei pachâ.

²⁰ Nâmo deikua cha, Hy Izarei pathlazy saih u, A vahpa châta ngâchhih leipa lapinô hawhta, Ei châta ngâchhih veih ei chi,’” Abeipa ta a tah.

²¹ Izarei sawzy cha ama lâpi pavia ei ta, Abeipa ama Khazohpa ama my hapa vâta, Awphy tlâh lakizy liata ao theipa châ ta, Izarei sawzy chana nata ahawna aozy theipa a châ.

²² “Hy ngiapâ hnôhsypa sawzy saih u, Vaw kua ha muh vy. Namâ ngiapâna hnôhsyna tawhta ei cha pathyu heih aw ei.” “Moh tua, nâ cha Abeipa eima Khazohpa na châpa vâta, Nâ lâ eimâ vy hih.

²³ Hmeiseih ta la tlâhthlôhzy he dôveina dei châ ei ta, Tlâhpizy chô liata pyu paropazy chhao dôveina dei ama châ. Hmeiseihta ta la, Izarei pachhana cha, Abeipa eima Khazohpa lia deita ta a y.

²⁴ “Châhrasala eima thyutlia daihti tawhta, nozachhihpa hmo chata miah pathlatuhpazy vaw hriapasana zydua nie khai ha ta, ama mietaku zawzy, ama viahchao hrizy, ama sawchapawzy nata ama sawchanôzy a nie khai ha ei.

²⁵ Eima thyutlia daihti tawhta tanoh taihta, keimo nata miah pathlatuhpazy ta Abeipa eima Khazohpa chô liata molei ha pi ta, Abeipa eima Khazohpa bie eima zyh leipa vâta, nozapa ta a zia sih la, eima nohzaona ta miah khu mawh sy.”