ZEREMIAH 29 - Mara Bible RV (BSI)

Sei ta atâhpazy hnohta Zeremiah châpaphaopa

¹ He he Nebukaneza ta Zerusale tawhta Babylaw lâ sei ta â chhipazy hry liata a hrohpa ta a ypa machâzy, theihthaipazy, hrohsopazy nata zawpi zydua hnohta hrohsopa Zeremiah ta châ a paphaopa liata a ropa biezy a châ.

² Cha châ cha Bei Zekôniah, abei nô, hrilyupazy, Zudâh nata Zerusale beimachâzy, zôthaipazy nata syudaihpazy Zerusale ama puasai tawhta Zeremiah ta a ropa a châ.

³ Châ cha Sâphâ sawchapawpa Eliasâ nata Hikia sawchapawpa Kemariah zy ku liata paphao ta, Âmo cha Zudâh bei Zedekia ta Babylaw bei Nebukaneza hnohta châ pie awpa ta, Babylaw râh lâ a tuapazy châ ei ta, châ liana cha he hawhta ropa a châ.

⁴ “Pheisaihzy Abeipa, Izarei Khazohpa ta Zerusale tawhta Babylaw lâ sei ta ei pasiesapa zydua hnohta hetana heta ei tah:

⁵ Ozy sa u la, cha liata pahrâ teh u. Sadôzy tao u la, a theizy nie teh u.

⁶ Lapinôzy hnei u la, sawchapawzy nata sawchanôzy sa teh u. Nama sawchapawzy châta lapinôzy hiah u la, nama sawchanôzy vahpa pahneisa u la, sawchapaw sawchanô zy sa ei sala, pôh u la, maluh a sy khuh vy.

⁷ Sei ta ei cha tuana ei khihpi pha nawpa tlua u la, cha khihpi phana cha nâmo phana a châ awpa vâta, khihpi châna chata Abeipa lâ thlahchhâ muh vy.

⁸ Pheisaihzy Abeipa, Izarei Khazohpa ta hetana heta a tah: Nama hry liata hrohsopazy nata pachaothaipazy a padôveisa leipa u la, mâ ama sapazy nathlie khuh vy.

⁹ Ei moh ta haipa ta hrohsona bie nama hnohta ama phuahpa a châ, ei tuapa châ veih ei, Abeipa ta a tah.

¹⁰ “Abeipa ta hetana heta a tah: Babylaw atâhna kô sysari a tloh nahta, cha vaw tly aw ei na ta, nama hnohta bie ei taihpa kha patlô aw na ta, he su lâ he ei châ chhi pakhua heih aw ei.

¹¹ Nâmo châta achhuahna ei hneipa ei pahno thlâh haw. Nama chhie nawpa châ leipa ta, nama pha nawpa châta achhuahna hnei na ta, hmialâ daihti phapa nata hnabeiseihna cha pie awpa ei ta achhuahna ei hnei, Abeipa ta a tah.

¹² Chatawhcha na pado aw ei chi ta, kei lâ a vypa ta thlahchhâ aw ei chi ta, ei cha nathlie awh ei.

¹³ Na tlua aw ei chi ta, nama pathipalôh zydua ta eina tlua ti ei chi ta cha, eina hmô aw ei chi.

¹⁴ Eina hmô aw ei chi,” Abeipa ta a tah. “Vânoh cha patosa heih aw ei na ta, ei cha pasiesana phopi to nata su to tawhta cha pakhy aw ei na ta, sei ta ei cha patusana su lâ tlai kha ei châ chhi pakhua heih aw ei, Abeipa ta a tah.

¹⁵ “‘Abeipa ta Babylaw râh liata chhao hrohsopazy miah a paduapa na,’ nama tahpa vâta,

¹⁶ Dâvi beidyuchhai liata bei a tyuhpa kyh liata nata he khihpi liata a pahrâpa zawpi, nama hnohta seichâna lâ a sie hra leipa nama chiheih zydua kyh liata Abeipa ta hetana heta a tah:

¹⁷ ‘Pheisaihzy Abeipa ta hetana heta a tah, moh teh u, ama chô liata zaozi nata chakâhna nata potlana zy vaw patlôsa hai na ta, theiku chhiepa, a thu hapa vâta nie tlâh a châ leipa hawhta ei tao aw ei.

¹⁸ Zaozi nata chakâhna nata potlana zy ta a chadai aw ei na ta, alei chô liata khinarâh zydua châta rarôh ypa ta tao aw ei na ta, âmo ei to papuana phopi zydua hry liata chhiesapa, chichhihpa, hmaotô chiepa nata reipachhiepa châ awpa ta ei tao aw ei.

¹⁹ Ei biezy ama nathlie leipa vâta, cha cha ama chô liata ei tao aw,’” Abeipa ta a tah. “Nâ chakaotuhpa hrohsopazy nâmo lâ vaw tuah chanei ngâ thlâh ha ei na ta, châhrasala ama bie nathlie veih ei chi,” Abeipa ta a tah.

²⁰ “Nâmo Zerusale tawhta Babylaw lâta ei pasiesapa sei ta atâhpa zydua saih u, Abeipa bie nathlie teh u:

²¹ Ei moh ta haipa ta hrohsona bie a phuahpa Kôliah sawchapawpa Ahabâ nata Mâsei sawchapawpa Zedekia kyh liata, Pheisaihzy Abeipa, Izarei Khazohpa ta hetana heta a tah: Moh teh u, âmo cha Babylaw bei Nebukaneza ku liata hlâ aw ei na ta, nama mohmô lia cheingei ta a thie aw ei.

²² Âmo vâna chata, Babylaw râ liata sei ta â tâhpa Zudâh mo zydua ta, ‘Babylaw bei ta mei ta a raopa Zedekia nata Ahabâ hawhna khata Abeipa ta na chô liata tao mawh sy,’ tahpa bie he chhiesana châta ama hmâh tyh aw.

²³ Izarei râh liata hmo chhie ngaitapa taopa ta ama vaih lapinôzy liata a phei ei ta, bie ei pie leipa pi tlai ta, ei moh ta haipa biezy ama reipa vâta, cha hawhta taopa ama châ aw. Cha cha a pahnotuhpa nata a pahnokheituhpa ei châ,” Abeipa ta a tah.

Hrohso pakheipa Semiah

²⁴ Nehelâ chyhsa Semiah hnohta hetana heta na rei awpa a châ:

²⁵ “Pheisaihzy Abeipa, Izarei Khazohpa ta hetana heta a tah: Zerusale zawpi zydua hnohta nata Mâsei saw­chapawpa theihthaipa Zephania hnohta nata theihthaipa zydua hnohta, nâma moh ta châ paphao chi ta,

²⁶ ‘Abeipa ta theihthaipa Zehôdâ vyuhpa ta theih­thaipa ta cha tao ta, hrohsona bie a phuahpa angâpa maih cha keihrai dai ta, thua raopaky paky awpa ta, Abeipa o liata hyutuhpa ta a cha tao.

²⁷ Khazia ma nama hnohta hrohsona bie a phuahpa Anathô khihpa Zeremiah chhao he na chhorei vei?

²⁸ Babylaw lâ châ miah kaw paphao ta, “Bohpi seichâpa ta nama y aw. Ozy sa u la, cha liata pahrâ teh u. Sadôzy tao u la, a theizy nie teh u,” miah a tahpa a châ,’ tah ta.”

²⁹ Cha châ cha theihthaipa Zephania ta hrohsopa Zeremiah theina liata reih ta.

³⁰ Zeremiah hnohta Abeipa bie vaw tlo ta:

³¹ “Seichâna liata â tâhpa zydua lâ chyhsa tuah la, ama hnohta, ‘Nehelâ chyhsa Semiah kyh liata Abeipa ta hetana heta a tah: Kei ta ei tua leipa pi tlai ta, Semiah ta nama hnohta hrohsona bie phuah ta, haipa bie a cha pazosa ei.

³² Chavâta Abeipa ta hetana heta a tah: Nathlie teh u, Nehelâ chyhsa Semiah nata a pathlazy cha ei hrie tlai aw ei. Abeipa chakhiana bie a reipa vâta, he phopi hry liata a pathla pakha hmahta hroh leipa aw ei ta, ei phopi chô liata hmo phapa ei tao awpa chhao hmô aw vei, Abeipa ta a tah,’ tahpa ta châ paphao mah y,” tah ta.