ZEREMIAH 28 - Mara Bible RV (BSI)

Hrohso pakheipa Hânaniah

¹ Cha kô pyly liata, Zudâh bei Zedekia ryureina â thaona lâ, a kô palihna, thla pangawhna liata, Azu sawchapawpa Kibiô chyhsa hroh­sopa Hânaniah ta theihthaipazy nata zawpi zy­dua mohmô ta Abeipa Achhyna o liata bie na chho ta,

² “Pheisaihzy Abeipa, Izarei Khazohpa ta hetana heta a tah: Babylaw bei raopakypa ei parao haw.

³ Babylaw bei Nebukaneza ta he su tawhta Abeipa hmobaohzy la ta, Babylaw lâ a siekhei hapa zydua kha, kô no chhôh ta he su liata ei vaw tlôkhei heih aw.

⁴ Babylaw bei raopaky thlie aw na ta, Zehôki sawchapawpa Zudâh bei Zekôniah nata Zudâh tawhta Babylaw lâ sei ta a siepa zydua kha, he su lâ he ei vaw chhi pakhua heih aw ei, Abeipa ta a tah,” tah ta.

⁵ Hrohsopa Zeremiah ta theihthaipazy nata Abeipa o liata a duahpa zawpi zydua hmiakô liata hrohsopa Hana­niah cha a chhy ta.

⁶ Hrohsopa Zeremiah ta, “Amen! Na reipa hawhna chata Abeipa ta tao tlai mawh sy. Hrohsona bie na phuahpazy cha Abeipa ta vaw patlôsa tlai sala, Abeipa o liata hmobaohzy nata sei ta â tâhpa zydua cha, Babylaw tawhta he su lâ he vaw tlôkhei tlai mawh sy.

⁷ Anodeikua cha, nâma nah theina liata nata zawpi zydua nah theina liata ei reipa bie he tahmâ nathlie teh.

⁸ Nâ nata kei hlâta a vaw y tuapa hlâno hrohsopazy khata, râh hluhpi nata khinarâh rônahpazy chô liata adyuhna, chakâhna nata potlana a tlô awpa kyh hrohsona biezy ama phuah tyh.

⁹ Adyhna nata thlalôhna bie a chhochhieliepa hrohsopa deikua cha, a biereipa a vaw tlô tita, cha hrohsopa cha Abeipa ta a tuapa tlai a châ tahpa pahnopa a châ aw,” tah ta.

¹⁰ Hrohsopa Hânaniah ta hrohsopa Zeremiah a kypa raopaky cha la ta, thlie pachhô ta.

¹¹ Chatawhcha Hânaniah ta zawpi zydua hmiakô liata bie reih ta, “Abeipa ta, ‘Kha hawhna khata Babylaw bei Nebukaneza raopaky cha, kô no chhôh ta phopi zydua rao tawhta pahluh aw na ta ei thlie pachhô aw,’ a tah” tah ta. Hrohsopa Zere­miah deikua cha, a sie nawpa lâ sie syulyu ha ta.

¹² Hrohsopa Hânaniah ta hrohsopa Zeremiah rao tawhta raopaky thlie pachhô ta a pahluh khai tawhta, Zeremiah hnohta Abeipa bie vaw tlo ta:

¹³ “Sie la, Hânaniah hnohta kei chho teh, ‘Abeipa ta hetana heta a tah: Tho raopaky tlâhzy thlie pachhô chi ta, châhrasala a vyuhpa ta thua raopaky tlao na tao hapa a châ.

¹⁴ Pheisaihzy Abeipa, Izarei Khazohpa ta hetana heta a tah: Babylaw bei Nebukaneza ama chakao thei nawpa ta, he phopi zydua he thua raopaky paky ei na ta, Nebukaneza cha ama chakao aw. Lyurâhpa sazy chhao taihta ano ei hlâ hapa a châ,’” tah ta.

¹⁵ Chatawhcha hrohsopa Zeremiah ta hrohsopa Hânaniah hnohta, “Hânaniah, nathlie teh, Abeipa ta cha tuah vei, he phopi he haipa bie na pazosa hih.

¹⁶ Chavâta Abeipa ta hetana heta a tah: ‘Pachâ teh, alei cho tawhta ei cha thy aw. Abeipa chakhiana bie na reipa vâta, atakô lia tlai ta na thi aw,’” tah ta.

¹⁷ Cha kô, thla sarina liata hrohsopa Hânaniah cha thi ha ta.