ZEREMIAH 27 - Mara Bible RV (BSI)

Nebukaneza raopaky

¹ He bie he Zôsia sawchapawpa Zudâh bei Zedekia ryureina â thao kô ta, Abeipa tawhta Zeremiah hnohta a vaw tlôpa a châ.

² Abeipa ta ei hnohta hetana heta a tah: “Raopaky nata a rizy tao la, na rao liata a ky la,

³ he bie he Edômâ bei, Môabâ bei, Amawna mo bei, Tyre bei nata Sidaw bei zy hnohta, Zudâh bei Zedekia lâta lyuhchâpa ama vaw tuapazy ku liata paphao teh.

⁴ Ama zibeipazy hnohta reih awpa ta, he bie he na pie aw ei: ‘Pheisaihzy Abeipa, Izarei Khazohpa ta hetana heta a tah: He bie he nama zibeipazy hnohta nama reih awpa a châ:

⁵ “Alei nata a chhôh liata a ypa chyhsapa nata sazy he, kei ta ei hmotaotheina rônah ngaitapa nata ei bâh pazawhpa ta ei taopazy châ ei ta, pie tlâhpa ta ei raopazy hnohta ei pie ei.

⁶ Tahmâ chhao, he râh zydua he nâ chakaotuhpa Babylaw bei Nebukaneza ku liata pie na ta, râhsazy chhao ano chakao awpa ta ei pie.

⁷ Ano râh daihti chhâna a tlô hlâta cha, phopi zydua ta ano nata a sawchapawpa nata a samohpa chakao aw ei ta, cha hnôhlâ ta deikua cha, phopi hluhpi nata bei rônahpazy ta ano cha sei ta ama tao aw.

⁸ “‘“Phopi kheihawhpa tlyma, khinarâh kheihawhpa tlyma ta Babylaw bei Nebukaneza cha chakao khoh leipa sala, Babylaw bei raopakypa â ky khoh leipa khiahta cha, Babylaw bei ku ta ei thie khai hlâlei ei cha, zaozi, chakâhna nata potlana zy hmâpa ta, cha phopi cha ei hrie lymâ aw,”’” Abeipa ta a tah.

⁹ “Chavâta, ‘Babylaw bei nama chakao awpa châ vei,’ châ tahtuhpa nama hrohsopazy, peihthaipazy, mâsathaipazy, moliethaipazy nata dyuthaipazy bie nama nathlie awpa châ vei.

¹⁰ Nama râh tawhta lâhlapi lâ a chhipa nama châ thei nawpa ta, haipa ta hrohsona bie nama hnohta a phuahpazy ama châ. Cha to papua aw ei na ta, nama leidia aw.

¹¹ Babylaw bei raopakypa a kypa ta, ano a chakaopa phopi deikua cha, ama râh ualua liata paysa aw ei na ta, cha liata lyu tao aw ei ta, cha liata ama pahrâ lymâ aw,” Abeipa ta a tah.

¹² Chatanachata Zudâh bei Zedekia cha hetana heta ei chho: “Babylaw bei raopakypa a kypa ta, ano nata a phopi cha chakao u la, hroh teh u.

¹³ Babylaw bei a chakao leipa phopi kyh Abeipa ta a rei hapa hawhna khata, khazia zaozi, chakâhna nata potlana zy ta nâ nata na phopi nama thi aw tly?

¹⁴ ‘Babylaw bei nama chakao awpa châ vei,’ châ tahtuhpa hrohsopazy bie nathlie khuh vy. Haipa ta hrohsona bie ama cha chhopa a châ.

¹⁵ Ei tuapa châ leipa ei ta, ei moh ta haipa ta hrohsona bie ama phuah. A theilâpa cha, nâmo nata nama hnohta hrohsona bie a phuahpazy râh tawhta cha to papua aw ei na ta, nama leidia aw,” Abeipa ta a tah.

¹⁶ Theihthaipazy nata zawpi zydua hnohta chhao hetana heta ei chho ei: “Abeipa ta hetana heta a tah: ‘Pachâ teh u, Abeipa o hmobaohzy cha Babylaw tawhta thlai vaw tlôkheipa a châ aw,’ tahpa ta nama hnohta hrohsona bie a phuahpa hrohsopazy bie nathlie khuh vy. Haipa ta hrohsona bie ama cha chhopa a châ.

¹⁷ Âmo biereipa cha nathlie khuh vy. Babylaw bei chakao u la, nama hroh aw. He khihpi he khazia roryhrapa ta a y aw?

¹⁸ Hrohsopa châ ei sala, Khazohpa bie ama hnohta a y khiahta cha, Abeipa o nata Zudâh bei o nata Zerusale liata hmobaoh a y chypazy Babylaw lâ siekheipa a châ lei nawpa ta, Pheisaihzy Abeipa tlao a haw mawh ei sy.

¹⁹ Atôhzy nata tipâh nata patyunazy nata he khihpi liata hmobaoh siesaipazy kyh liata, Pheisaihzy Abeipa ta hetana heta a tah.

²⁰ Chazy cha Babylaw bei Nebukaneza ta Zehôki sawchapawpa Zudâh bei Zekôniah nata Zudâh nata Zerusale nôpawpa zydua, Zerusale tawhta Babylaw sei ta â chhi no ei ta a la leipazy a châ.

²¹ Pheisaihzy Abeipa, Izarei Khazohpa ta Abeipa o nata Zudâh bei o nata Zerusale liata hmobaoh siesaipazy kyh liata hetana heta a tah:

²² Babylaw lâ siekheipa châ aw ei ta, âmo ei vaw tly hlâlei ei cha, cha liata ama y aw. Cha khai tawhta vaw phaoh pakhua aw ei na ta, he su liata ei soh heih aw ei,” Abeipa ta a tah.