ZEREMIAH 26 - Mara Bible RV (BSI)

Zeremiah thina ta ama pachhipary

¹ He he Zôsia sawchapawpa Zudâh bei Zehôki ryureina â thaona daihti liata Abeipa tawhta bie a vaw tlôpa a châ:

² “Abeipa ta hetana heta a tah: Abeipa o dôhpachhôh tlyhmia liata a duah la, Abeipa a chhy awpa ta Abeipa o lâ a vypa Zudâh khihpi zydua cha, ama hnohta rei awpa ta bie ei cha piepa zydua kha chho la, bie miakha hmah phih khah y.

³ Nathlie aw ei ta, chyhsa to ama hrozie pha leipa ama siesai thei ngyu aw lah. Chatanachata ama hmotaopa pha leipazy vâta ama chô liata chhiena tao ei chhuahpa cha ei pathleih aw.

⁴ “Ama hnohta hetana heta na chho aw ei, ‘Abeipa ta hetana heta a tah: Na nathlie leipa u la, nama hmiakô liata ei sopa ei ryhpa zyh leipa u la,

⁵ ama bie nathlie awpa ta nâmo lâta ei vaw tua chanei ngâ thlâh hapa nâ chakaotuhpa hrohsopazy bie nama nathlie leipa khiahta cha,

⁶ he o he Silô hawhta tao aw na ta, he khihpi he alei chô liata phopi zydua châta chhiesana ta ei tao aw.’”

⁷ Zeremiah ta Abeipa o liata cha bie a reipazy cha theihthaipazy, hrohsopazy nata zawpi zydua ta thei ei ta.

⁸ Abeipa ta zawpi zydua hnohta rei awpa ta bie a piepazy cha Zeremiah ta a rei khaih nahta, theihthaipazy, hrohsopazy nata zawpi zydua ta Zeremiah cha patu ei ta, a hnohta, “Na thi awpa a châ!

⁹ Khazia Abeipa moh ta hrohsona bie phuah chi ta, ‘He o he Silô hawhta châ aw ta, he khihpi he roryhrapa ta ypa ta, a chhôh liata a pahrâpa y aw veih ei,’ na tah?” tah ei ta. Zawpi zydua ta Zere­miah cha Abeipa o liana cha chadô ei ta.

¹⁰ Zudâh beimachâzy ta cha thâtih cha ama thei nahta, abei o tawhta Abeipa o lâ khy ei ta, Abeipa o lâ angiana Chhikao Thiehpa liata a tyuh ei ta.

¹¹ Theihthaipazy nata hrohsopazy ta beimachâzy nata zawpi zydua hnohta, “Nama nah cheingei ta nama theipa hawhta, he chyhsa heta he khihpi rao nawpa kyh hrohsona bie phuah ta, chavâta thi awpa ta a thâtih pachia tlâh a châ,” tah ei ta.

¹² Zeremiah ta beimachâzy nata zawpi zydua hnohta, “Bie nama theipa zydua kha, Abeipa ta na tuah ta, he o nata he khihpi rao nawpa kyh hrohsona bie eina paphuahsapazy a châ.

¹³ Chavâta tahmâ nama hroziezy nata nama hmotaoziezy a taopathi u la, Abeipa nama Khazohpa bie zyh teh u. Chatanachata nama chô liata chhiena a vaw tlô awpa a phuah hapa kha, Abeipa ta a pathleih aw.

¹⁴ Kei deikua cha, moh teh u, nama ku liata ei y hih. Â do nama tahzie nata a pha nama tahzie hawhta tao teh u.

¹⁵ Eina thie khiah ei chi ta cha, thaileina a hnei leipa thisaih cha, nâmo nata he khihpi nata a khihsawzy chô liata nama patlôsa aw tahpa deikua a siapa ta pahno muh vy. Abeipa ta na ngâ ta, he bie zydua he nama nah theina liata reih awpa ta eina tuapa châ tlôh ta,” tah ta.

Zeremiah hrona pahlôhpa a châ

¹⁶ Chatawhcha beimachâzy nata zawpi zydua ta theihthaipazy nata hrohsopazy hnohta, “He chyhsa he thi awpa ta a thâtih pachia tlâh châ vei, Abeipa eima Khazohpa moh ta eima hnohta bie a reihpa tlao a châ hih,” tah ei ta.

¹⁷ Râh machâ ahyzy tlyma a vaw duah ei ta, zawpi a hmaohpakhypazy hnohta,

¹⁸ “Môrese chyhsa Mikâ ta Zudâh bei Hezekia â beina daihti liata hrohsona bie phuah ta, Zudâh zawpi zydua hnohta, ‘Pheisaihzy Abeipa ta hetana heta a tah, “‘Zaio cha leipalie hawhta paliepa châ aw ta, Zerusale cha raona a pachona su a châ aw; Achhyna o tlâh chhao, Râhmâhpa tlâh lâta â lie aw,’” tah ta.

¹⁹ “Zudâh bei Hezekia nata Zudâh mo zydua ta Mikâ kha ama thie ma? Hezekia ta Abeipa cha chipa ta, Abeipa khokheina a haw ta, chatanachata Abeipa ta ama chô liata chhiena patlôsa awpa a phuahpa kha a pathleih hapa châ vei ma? Keimo deikua cha eima chô liata chhiena rarôh ypa eima patlôsa aw hih,” tah ei ta.

²⁰ Mohropa pakha Abeipa moh ta hrohsona bie a phuahpa y hra ta. Ano cha Kiriaziari chyhsa Semiah sawchapawpa Uria kha a châ. Zeremiah bie reipazy hawhta, he khihpi nata he râh rao nawpa kyh hrohsona bie phuah ta.

²¹ A biereipazy cha Bei Zehôki nata a pasaipha zydua nata a beimachâ zydua ta ama thei nahta, abei ta thie a chhuah ta. Cha kyh cha Uria ta a thei nahta, chipa ta a râ ta, Izi râh lâ â râ ha ta.

²² Bei Zehôki ta Akabaw sawchapawpa Enâthâ cha mohropazy chhaota Izi râh lâ tuah ta.

²³ Chatanachata Uria cha Izi râh lâ za lapa ta, Bei Zehôki lâ a vaw chhi ei ta. Bei Zehôki ta Uria cha zaozi ta thie ta, vâtlâh thlâ su a ri ama thy hapa kha a châ.

²⁴ Zeremiah deikua cha, Sâphâ sawchapaw­pa Ahikâ ta thie lei awpa ta a ku pazawh ha ta, chavâta thie awpa ta zawpi lâ hlâpa châ vei.