ZEREMIAH 24 - Mara Bible RV (BSI)

Theiku phapa nata chhiepa

¹ Babylaw bei Nebukaneza ta Zehôki sawchapawpa Zudâh bei Zekôniah cha, Zudâh beimachâzy nata zôthaipazy nata syudaihpazy chhaota Zerusale tawhta Babylaw lâ sei ta â chhi tawhta, he aluahna he Abeipa ta eina pahmôsapa a châ: Abeipa Achhyna o hmiakô liata patyupa theiku hrâbyh miano hmô na ta.

² Hrâbyh miakha liata theiku pha ngaitapa, theiku hmoh tuapa hawhpa y ta, hrâbyh hropa liata deikua cha, theiku chhie ngaitapa, nie tlâh châ leina taihta a chhiepa y ta.

³ Abeipa ta, “Zeremiah, khâpa na hmô?” na tah ta. Kei ta, “Theikuzy, theiku phapa a pha ngaitapazy nata theiku chhiepa, nie tlâh leina taihta a chhiepazy ei hmô,” tah na ta.

⁴ Chatawhcha Abeipa bie cha ei hnohta vaw tlô ta.

⁵ “Izarei Khazohpa Abeipa ta hetana heta a tah: Zudâh râh tawhta seichâna lâ a siepa, he râh tawhta Kaldia mo râh lâta ei tua hapazy cha, theiku phapa hawhna khata ei pachâ aw ei.

⁶ Ama pha nawpa ta ama chô liata ei mo tawpâ aw ei na ta, he râh lâ he ei vaw chhi pakhua heih aw ei. Âmo cha padua aw ei na ta, phie khao aw veih ei na; loh aw ei na ta, phia khao aw veih ei na.

⁷ Abeipa ei châ tahpa pahno theina palôh pie aw ei na ta, pathipalôh tlokhuh ta kei lâ ama vaw kua awpa vâta, âmo cha ei phopi châ aw ei ta, kei ama Khazohpa ei châ aw.

⁸ “Abeipa ta hetana heta a tah: Theiku chhiepa nie tlâh châ leina taihta a chhiepa hawhna khata, Zudâh bei Zedekia nata a beimachâzy nata he râh liata â nguapa Zerusale laibâhpazy nata Izi râh liata a pahrâpazy cha ei heihsai aw ei.

⁹ Khizaw khinarâh zydua ta ama moka awpa ta tao aw ei na ta, âmo ei tona su to liata ama reipachhiepa, chhiena lâta pakhopâna ta ama hmâpa, ama pasipasawhpa nata chhie ama sa thlupa ta ei tao aw ei.

¹⁰ Âmo nata âmo pathlatuhpazy ei piepa râh tawhta tlokhuh pahleipadia khaipa ama châna taihta, ama chô liata zaozi, chakâhna nata potlana zy ei tuah lymâ aw.”