ZEREMIAH 23 - Mara Bible RV (BSI)

Laibâhpazy kuana

¹ “Ei sibiepa su liata mietakuzy pahleipadiapa ta a papaituhpa mietaku vaituhpazy ama hu a po na!” Abeipa ta a tah.

² Chavâta Abeipa, Izarei Khazohpa ta, ei phopi a vaituhpa mietaku vaituhpazy kyh liata, hetana heta a tah: “Ei mietaku zaw papai ei chi ta, nama to haw, vaih veih ei chi. Moh teh u, nama paraopazy vâta ei cha hrie aw ei,” Abeipa ta a tah.

³ “Ei mietaku zaw laibâhpazy cha âmo ei tona râh zydua tawhta a vaw chhi heih aw na ta, ama sadô liata pangia heih aw na ta, chi hluhpi pathla aw ei ta, ama pôh aw.

⁴ Âmo a vaih awpa mietaku vaituhpa soh aw na ta, chi khao leipa aw ei ta, ama nôpo khao leipa aw ta, a leipa y khao aw veih ei,” Abeipa ta a tah.

⁵ “Moh teh u, Davi châta Chiah siapa ei padua nawpa daihti a vaw tlô hai. Ano cha ryureituhpa abei châ aw ta, so ngaitapa ta hmo tao aw ta, adona nata siana ta râh liata ryu a reih aw,” Abeipa ta a tah.

⁶ “Zudâh cha ano ryureina daihtizy liata pachhapa châ aw ta, Izarei chhao â bohpa ta a y aw. A moh cha Zehôvâh Sede a châ aw.

⁷ “Chavâta moh teh u, nohzy a vaw tlô hai. Cha nohzy liata cha, ‘Izarei sawzy Izi râh tawhta a kaw chhi papuatuhpa Abeipa hrona reipa ta ei reih,’ tah khao leipa aw ei ta,

⁸ ‘Maw lâ râh tawhta nata âmo a tona râh zydua tawhta Izarei pathla sawzy chhihtha ta a pakuasatuhpa Abeipa hrona reipa ta ei reih,’ tlao tah bâ aw ei ta, âmo râh lia tlai ta ama pahrâ aw,” Abeipa ta a tah.

Hrohsopa haiphiahpazy

⁹ He he hrohsopazy kyh a châ: Ei chhôhso palôh keichheih ta, Ei rupa zydua â chalyu; Abeipa vâta nata a bie pathaihpa vâta, A paripa hawhta châ na ta, Kresawhti ta a pahniepa chyhsa hawhta ei châ.

¹⁰ Râh cha apheipazy ta bie ta, Chhiesana vâta râh mâchhiesa ta, Râhchawhpa sibiepazy a raoh khai haw. Hmo pha leipa lâpi a chhih ei ta, Â doleipa ta ama thatlôna a hmâhpa ama châ.

¹¹ “Hrohsopa nata theihthaipa ta Khazohpa papeisa leipa ei ta; Ei o chhôh cheingei liata Ama moleina ei hmô,” Abeipa ta a tah.

¹² “Chavâta ama siena lâpi cha, Âmo châta zâ zohpa liata lâpi pahniapa hawhta a châ aw; Âmo hriena kô liata, Ama chô liata chhiena ei patlôsa awpa vâta, Lâpi pahniapa lâ cha topa châ aw ei ta, Ama pao aw,” Abeipa ta a tah.

¹³ “Samâri hrohsopazy liata pasichhihpa ei hmô: Bâlâ moh ta hrohsona bie phuah ei ta, Ei phopi Izarei amâ chhi chhei.

¹⁴ Zerusale hrohsopazy liata chhao, Hmo rarôh ypa ei hmô: A phei ei ta, Haipa ta khih ama sa; Hmo pha leipa a taopazy ku thapatlô ei ta, Chavâta ama moleina ro a chhuah tlâ veih ei; Kei châta cha Sawdawmâ lyu khai ei ta, Zerusale khihsawzy chhao Kawmawrâ ama lyu khai.”

¹⁵ Chavâta hrohsopazy kyh liata, Pheisaihzy Abeipa ta hetana heta a tah: “Pachâ teh u, Zerusale hrohsopazy tawhta a thaopa ta, Râh zydua liata Khazohpa papeisa leina a tlai hapa vâta, Pati khapa paniesa aw ei na ta, Châmaih ti ei padosa aw ei.”

¹⁶ Pheisaihzy Abeipa ta hetana heta a tah: “Nama hnohta hrohsona bie a phuahpa hrohsopazy bie nathlie khuh vy. Hnabeiseihna hraoleipazy ta châ pabietuhpazy deita ama châ. Abeipa pakah tawhta a puapa châ leipa ta, âmo palôh liata hmo a lâpazy ama reih tyh.

¹⁷ Abeipa bie khâpa saw ta a reih leipazy hnohta, ‘Nama châta a pha aw,’ tah ei ta, âmo palôh khopa a taopa chhorupa zydua hnohta, ‘Nama chô liata chhiena vaw tlô aw vei,’ ama tah tyh.”

¹⁸ Abeipa ryureina liata a duah ta, A bie thei ta a pahnopa ama hry liata ahy ma a y? Ahy ma a bie lâta a nah pachôh ta a nathlie?

¹⁹ Moh teh u, Abeipa thlihpipa huh! Pathiiana pua ta, Khisô chothyu pua ha ta, Moleipazy luh a chanaoh aw.

²⁰ A palôh ta â chhuahpazy tao aw ta, A patlô hlâlei cha, Abeipa hiehâhna cha kua aw vei. Cha cha noh hnôhlâzy liata Nama pahnopasia aw.

²¹ “Hrohsopazy cha tuah leipa ei na ta, Châhrasala a parapa ta ama sie; Ama hnohta bie reih leipa na ta, Châhrasala hrohsona bie ama phuah tyh.

²² Ei ryureina liata â duah hrapa châ ei sala cha, Ei phopi hnohta ei bie phuah aw ei ta, Ama lâpi doleipa tawhta pakuasapa ta, Ama hmotaopa doleipazy tawhta ama pakuasa ha awpa tlai.

²³ “Lâhniata liata a ypa Khazohpa ngâlâh ma ei châ, lâhlapi liata a ypa Khazohpa chhao châ va na ma?” Abeipa ta a tah.

²⁴ “Ei hmô thei lei nawpa ta, su nyupazy liata a nyu theipa ama y ma?” Abeipa ta a tah. “Avâ nata alei he kei ta bie thlâh ha va na ma?” Abeipa ta a tah.

²⁵ “‘Mâ ei sa, mâ ei sa!’ tah ei ta, ei moh ta haipa ta hrohsona bie a phuahtuhpa hrohsopazy bie reipa ei thei.

²⁶ Haipa ta hrohsona bie a phuah tyhpa hrohsopazy palôh liata khati taih ma haipa biezy y chy aw ta, âmo palôh liata dôveina bie a phuah tyhpa hrohsopazy palôh liata khati taih ma haipa biezy a y chy aw tly?

²⁷ Ama mâ amâ chho raihriepazy hmâpa ta ei phopi cha ei moh pamysa a chhuah ei ta, âmo pathlatuhpazy chhao kha, Bâlâ vâta ei moh ama my hapa kha châ vei ma?

²⁸ Mâsapa a hneipa hrohsopa ta a mâsapa cha reih sala, ei bie a hneipa ta ei bie cha ngâchhihpa ta reih mawh sy. Sâh kô nata sâh hmô zy khâpa alyuna ma ama hnei?” Abeipa ta a tah.

²⁹ “Ei bie cha mei hawhta châ ta, lôpanô a pakeichheih khai theipa syulô hawhta châ vei ma?” Abeipa ta a tah.

³⁰ “Chavâta pachâ teh u, ei bie â parupa raihrie tyhpa hrohsopazy ei dyuh ei,” Abeipa ta a tah.

³¹ “Âmo paleih hmâpa ta, ‘Abeipa ta a phuah,’ tahpa ta a phuah tyhpa hrohsopazy ei dyuh ei,” Abeipa ta a tah.

³² “Mâ phichhyhpazy reipa ta hrohsona bie a phuahpazy ei dyuh ei,” Abeipa ta a tah. “Âmo cha ei tua leipa pi tlai ei nata bie ei pie leipa pi tlai ei ta, ama haipa biezy nata amâ palaina biezy ta ei phopi a paviasapazy châ ei ta, he phopi châta phahnaina rai a hnei leipazy ama châ,” Abeipa ta a tah.

³³ “He phopi hry tawhta ahy ta tlyma, hrohso­pa ta tlyma, theihthaipa ta tlyma, ‘Abeipa phaohri cha khâpa ma a châ,’ tahpa ta ama cha hiahri khiahta cha, ‘Nâmo he phaohri cha châ ei chi ta, chavâta ei cha thy aw ei, Abeipa ta a tah,’ tahpa ta nâ chhy aw ei.

³⁴ “Hrohsopa tlyma, theihthaipa tlyma, chyhsa ahy tlyma ta, ‘Abeipa phaohri’ a tah khiahta cha, cha chyhsa nata a chhôhkhazy cha ei hrie aw ei.

³⁵ Chavâta chyhsa to ta nama vaih nata nama unawhpa hnohta, ‘Abeipa ta kheihta ma a châ chhy? Abeipa ta khâpa ma a reih?’ tahpa ta namâ hiahri raihrie awpa a châ.

³⁶ Chyhsa to châta âmo bie cha âmo phaohri châ ta, Khazohpa hrohpa, Pheisaihzy Abeipa eima Khazohpa biezy anoleipa lâta nama hmâpa vâta, ‘Abeipa phaohri,’ tahpa deikua reih khao aw veih ei chi.

³⁷ Hrohsopa hnohta, ‘Abeipa ta kheihta ma a châ chhy? Abeipa ta khâpa ma a reih?’ na tah awpa a châ.

³⁸ ‘Abeipa phaohri’ nama tah khiahta deikua cha, Abeipa ta hetana heta a tah: ‘Abeipa phaohri’ tahpa bie rai reih lei awpa ta cha tuah ei na ta, châhrasala ‘Abeipa phaohri’ nama tahpa vâta,

³⁹ moh teh u, cha my pathlah aw ei na ta, nâmo chhao, nâmo nata châ pathlatuhpazy hnohta ei cha piepa khihpi chhao heta, ei mohmô tawhta ei cha thy aw ei.

⁴⁰ Chatanachata chhâzaw reipachhiena nata kôzaw maophyuhna my thei leipa cha nama chô liata ei vaw patlôsa aw.”