ZEREMIAH 22 - Mara Bible RV (BSI)

¹ Abeipa ta hetana heta a tah: “Zudâh bei o lâ zu la, he bie he za chho la,

² a hnohta hetana heta tah mah y: ‘Hy Zudâh bei, Dâvi beidyuchhai liata a tyuhpa, nâ nata châ chakaotuhpazy nata he ochhi liata a ngiapa na chyhsazy ta Abeipa bie he thei teh u.

³ Abeipa ta hetana heta a tah: Adona nata siana tao u la, ama hmo ama hrao hapazy cha, tlybaituhpazy ku tawhta pachha teh u. Chihropa mapaihpazy, paw hnei leipazy nata nôhmeizy chô liata â doleipa ta hmo tao leipa u la, thachahra hmâ thlu hra leipa u la, he su liana heta thaileina a hnei leipa thisaih palo khuh vy.

⁴ He bie he nama zyh khiahta cha, Dâvi beidyuchhai liata a tyuhpa beizy cha talailihzy nata arâzy chô liata kiapa ta, âmo nata âmo chakaotuhpazy nata ama chyhsazy cha, he o chhikaozy liana heta amâ ngia lymâ aw.

⁵ He biezy he nama zyh leipa khiahta deikua cha, keima sasyh moh a reipa ta bie ei taih, he o he roryhrapa ta a y aw, Abeipa ta a tah.

⁶ Abeipa ta Zudâh bei pathlazy kyh liata hetana heta a tah: “‘Ei châta Kilia hawhta châ chi ta, Lebanaw tlâh laki hawhta na châ; Chatahrasala râhchawhpa ta cha tao aw na ta, Khihpi rypa ta ei cha tao aw.

⁷ Châ parao awpazy pachhuahpanoh aw ei na ta, Ama chariah chhaichhi a chaba chyupa ta, Na sidy tho pha chaipazy thlu aw ei ta, Mei liata ama ti aw.

⁸ “‘Phopi hropa hluhpizy ta he khihpi he chapia aw ei ta, chyhsa to ta ama vaihzy hnohta, “Khazia ma Abeipa ta he khihpi rônahpa chô liata he hawhta a tao ha tly?” tah aw ei ta,

⁹ “Abeipa ama Khazohpa biehrai a heihsaipa ta khazoh hropazy a chhy ei ta ama chakaopa vâta a châ,” tahpa ta amâ chhy aw.’”

¹⁰ A thi hapa chakhei leipa u la, Mâchhie sapa hra khah u. Â paih hapa deikua cha, Vaw kua khao leipa aw ta, A pina râh a hmô heih khao lei awpa vâta, Thata cha­khei teh u.

Zôsia sawchapawzy hnohta bietapa

¹¹ Zôsia sawchapawpa Zudâh bei Sâluh, a paw Zôsia vyuhpa ta ryureih ta, he su tawhta a pua hapa kyh liata, Abeipa ta hetana heta a tah: “He su lâ he vaw kua khao aw vei.

¹² Sei ta ama siekheina su liata thi aw ta, he râh he hmô heih khao aw vei.”

¹³ “Sialeina ta a o sa ta, Adoleina ta a o chô chhôhpadâhpazy taopa ta, A saipa ta a vaih tha hmâh ta, A hria hlaozy a pie leipa chyhsa cha, A hu a po na.

¹⁴ ‘O rônahpa a sa aw na ta, O chô chhôhpadâhpa kawhpazy ei tao aw,’ tah ta, Opyzy pahypa ta, Sidy tho ta patho ta, Hlyu saihpa a hnia.

¹⁵ Sidy tho ta nâ zaoh nâ tiahpa vâta, Abei via pachaipa hawhta ma nâ pachâ? Na paw kha niepa ta doh ta, Adona nata siana ta ryu a reih tyh. Cha cha ano châta phana a châ.

¹⁶ Dyhchhiepa nata phahlapazy a duakhei ta, Cha cha hmo phapa a châ. Kei nâ pahnopa cha, Cha hawhta a tao awpa rai châ vei ma? Abeipa ta a tah.

¹⁷ Châhrasala nâ cha athôhna doleipa châ deita ta Mokhaoh nata palôh hnei chi ta; Thaileina a hnei leipa thisaih palo ta, Tlybaina nata thachahra hmâna châ deita ta Mokhaoh nata palôh na hnei.”

¹⁸ Chavâta Zôsia sawchapawpa Zudâh bei Zehôki kyh liata Abeipa ta hetana heta a tah: “‘Hy ei unawhpa! Hy ei sietanô!’ Tahpa ta chaphôhtupa leipa aw ei ta, ‘Hy abei! Hy bei rônah chaipa!’ Tahpa ­ta chaphôhtupa hra aw veih ei.

¹⁹ Alâ pabupa hawhta Zehôki cha pabupa a châ aw; Zerusale thokhy khô lâ a daophi aw ei ta, Cha liata ama thy aw.”

²⁰ “Lebanaw lâ khypa ta awh la, Bâsanâ liata na ao papua la, Abari tawhta awh teh, Na kyhpachâpa zydua pahleipadiapa ama châ khai ha hih.

²¹ Huhiehpa ta na y nota bie châ chho na ta, Châhrasala, ‘Nathlie aw va na,’ na tah haw. Ei bie na nathlie khoh leipa he, Na thyutlia no tawhta na hrozie a châ.

²² Thlih ta na mietaku vaituhpa zydua vaih aw ta, Na kyhpachâpazy sei ta ama sie aw; Nâ chhao na moleina zydua vâta, Nozapa nata nohzaopa ta na y aw.

²³ Hy Lebanaw râh liata pahrâ chi ta, Sidy tho hry liata bu a tupa y, Pasana na chô liata vaw tlô aw ta, Chanô sawzeihpa hawhta pasana ta a cha vaw tlô thlu tita, Ngiachhie nâ chhih awpazie rimâ cha!”

²⁴ “Ei hrona reipa ta ei reih,” Abeipa ta a tah. “Zudâh bei Kôniah, Zehôki sawchapawpa cha ei ku chachâh lâta chahnaona kusadi châ hra la, cha pahluh aw na ta,

²⁵ thie châ chhuahpa, na chi kawpa Babylaw bei Nebukaneza ku liata nata Kaldia mo ku liata ei cha hlâ aw.

²⁶ Nâ nata châ satuhpa na nô cha, nama pina râh a châ leipa lâ cha thy aw ei na ta, cha liata nama thi aw.

²⁷ Kua heih awpa ta nama vâ ngaita awpa râh lâ he vaw kua khao aw veih ei chi.”

²⁸ He Kôniah he beih keipa mohnaochhihpa, Ahy hmahta ama khoh khao leipa kha châ vei ma? Chavâta ano nata a pathlazy cha, Ama pahno leipa râh lâ thypa ta ama ypa châ vei ma?

²⁹ Hy râh, râh, râh y, Abeipa bie he thei teh!

³⁰ Abeipa ta hetana heta a tah: “He chyhsa he saw hnei leipa ta roh la, A hro chhôh ta hlaotlohna a hnei lei awpa ta roh teh. Dâvi beidyuchhai liata a tyuhpa ta, Zudâh râh liata ryureih heih awpa ta, A chipathla ahy hmahta ama hlaotloh khao aw vei.”