ZEREMIAH 21 - Mara Bible RV (BSI)

Zerusale paona chhochhieliena

¹ He he Bei Zedekia ta Mâkia sawchapawpa Pâsu nata Mâsei saw­chapawpa theihthaipa Zephania zy Zeremiah lâ tuah ta,

² “Babylaw bei Nebukaneza ta miah â dyuh ha hih. Abeipa miah a saohiahpa teh. Hmo noâhpa a tao tyhpa Abeipa ta miah bao aw ta, Nebukaneza he a pakuasa thlah ha ngyu aw lah,” tahpa ta a pachhosa no ei ta Zeremiah hnohta Abeipa bie a vaw tlôpa a châ.

³ Zeremiah ta âmo cha hetana heta a chho ei:

⁴ “Zedekia cha hetana heta kei chho teh u, ‘Abeipa, Izarei Khazohpa ta hetana heta a tah: Pachâ teh, thokhy khôtho lâta châ dôhtuhpa Babylaw bei nata Kaldia mo nâ dyuhna chariah chhaichhi na ku liata a ypazy kha, nâ lâ vaw pakuasa aw na ta, Babylaw bei nata Kaldia mo cha, he khihpi chhôh lâ hmaohkha ta ei vaw pangiasa aw ei.

⁵ Keima tlai ta hiehâhpa nata ruchhôpa nata pathiiana ru ngaitapa ta na chô liata ei ku hy aw na ta, bâh thatlôpa ta ei châ dyuh aw.

⁶ He khihpi liata a pahrâpa chyhsapa nata sahrohzy ei thie aw ei. Potlana ru ngaitapa ta ama thi aw.

⁷ Cha hnôhlâ ta Abeipa ta Zu­dâh bei Zedekia nata a chakaotuhpazy nata potlana nata zaozi nata chakâhna ta a thi leipa he khihpi chyhsazy cha, Babylaw bei Nebukaneza ku liata nata ama chariahpazy ku liata nata âmo thie a chhuahpazy ku liata ei hlâ aw ei. Zaozi tiahpa ta âmo cha thie aw ta, ngiachhie leipa aw ta, pahlôh hra leipa aw ta, zawh a ngiah hra aw vei, Abeipa ta a tah.’

⁸ “Chatawhcha he phopi hnohta hetana heta na tah aw: ‘Abeipa ta hetana heta a tah: Moh teh u, nama hmiakô liata hrona lâpi nata thina lâpi ei cha sopa ei hih.

⁹ He khihpi chhôh liata a ypazy cha zaozi ta tlyma, chakâhna ta tlyma, potlana ta tlyma thi aw ei ta, châ dôhtuhpa Kaldia mo lâ puapa ta âmo ku liata â piepazy deikua cha, hroh aw ei ta, hraona sôh hawhta pachâpa ama châ aw.

¹⁰ Phana châta châ leipa ta, chhiena châta, he khihpi lâ he a heih ha na ta, Babylaw bei ku liata hlâpa châ aw ta, ano ta mei ta a rao aw, Abeipa ta a tah.’

Zudâh beizy hnohta bietapa

¹¹ “Zudâh bei pathlazy hnohta hetana heta reih teh, ‘Abeipa bie he thei teh u!

¹² Hy Dâvi pathlazy saih u! Abeipa ta hetana heta a tah: “‘My ta pachiana dopa ta pachia u la, Ama hmo ama hrao hapazy cha, Tlybaituhpazy ku tawhta pachha teh u. Chataleipatala hmo chhiepa nama taopazy vâta, Ei pathiiana mei hawhta pua aw ta, Ahy hmahta pachhai thei lei awpa ta a kâ pathlei aw na.’”

¹³ “Hy saikao liata a pahrâpazy saih u, Ei châ dyuh ei; Hy bypi lôpanô, Ei châ dyuh. ‘Ahy ma miah a zuhnao aw ta, Ahy ma eima ynazy liata a vaw ngia aw?’ A tah tyhpazy saih u, Ei châ dyuh ei,” Abeipa ta a tah.

¹⁴ “Nama hmotaopa theilâpa lymâ hawhta cha hrie aw ei na ta, A râhmâhpa liata mei patih aw na ta, A chheipâh liata a ypa zydua a kâ khai aw,” Abeipa ta a tah.