ZEREMIAH 20 - Mara Bible RV (BSI)

Pâsu ta Zeremiah a taola

¹ Zeremiah ta hrohsona bie a phuahpazy cha, Ime sawchapawpa, Abeipa o liata mokhâhtuhpa hyutuh chaipa theihthaipa Pâsu ta thei ta.

² Pâsu ta hrohsopa Zeremiah cha tu ta, Abeipa o thokhy Benzami Chhikao machhua lâta a ypa keihrai liata patâh ta.

³ A mylâ ta Pâsu ta Zeremiah cha keihrai tawhta a pathlie nahta, Zeremiah ta a hnohta, “Abeipa ta na moh Pâsu cha bi vei, Mâkômisabi tlao a cha tah.

⁴ Abeipa ta hetana heta a tah: Pachâ teh, Nâma châta nata na viasa zydua châta chichhihpa ta ei cha tao aw. Âmo cha eina moh thlâh ha no ei ta, ama chariahpazy zaozi ta ama pao aw. Zudâh mo zydua cha Babylaw bei ku liata hlâ khai aw ei na ta, Babylaw lâ sei ta a chhi aw ei ta, zaozi ta a thie aw ei.

⁵ Cha dei châ vei, khihpi hneirôna zydua, a hmo pachôpa zydua, a hmo sôhpa zydua nata Zudâh beizy ryusôhpa zydua cha, ama chariahpazy ku liata hlâ aw na ta, ama chariahpazy ta hrao aw ei ta, patu aw ei ta, Babylaw lâ ama siekhei aw.

⁶ Nâ Pâsu nata na o liata a pahrâpa zydua chhao, seichâna lâ nama sie aw. Nâ nata haipa ta hrohsona bie na chho tyhpa na viasa zydua Babylaw lâ sie aw ei chi ta, cha liata thi aw ei chi ta, cha liata pabupa nama châ aw.”

Zeremiah chaphôhtuna

⁷ Hy Abeipa, na dôvei chi ta, Dôveipa ta ei y ha hih. Nâ cha kei hlâta thatlô viapa châ chi ta, Eina pahnie ha chi. Noh y ta pahnei parâsaopa ta y na ta, Chyhsa to ta eina pasipasawh ei.

⁸ Bie ei reina maihta awh na ta, “Atudaina nata raona!” Tahpa ta ei awh tyh. Abeipa bie cha kei châta reipachhiena tona dei châ ta, Noh y ta pasipasawhna tona dei a châ.

⁹ “Abeipa pado leipa aw na ta, A moh ta bie reih khao aw va na,” Tah hraw sah la, Ei rupa chhôh liata mei iapa â khôpa hawhta, Ei palôh liata y ta, A chalihkhei a chhuah taraw na ta, Châhrasala a chalihkhei thei va na.

¹⁰ Bieparu hluhpi thei na ta, Su to liata chichhihpa a y. Ei viasa phapazy ta, Ei pao awpa a byhpa ta, “Leih teh u! Leih ei suh u! Dôvei theipa a châ thlâh ngyu aw; Chatanachata pahnie aw pi ta, A chô liata eima phuh eima la thei aw,” ama tah.

¹¹ Châhrasala Abeipa cha, Pasaipha chichhihpa hawhta ei hnohta y ta, Nâ taolatuhpazy cha pao aw ei ta, Na pahnie aw veih ei. Ama hlao a tloh lei awpa vâta, Nozapa ta ama y aw. Ama chhâzaw nohzaona cha, Mypa ta y beih aw vei.

¹² Hy Pheisaihzy Abeipa, Mosiapazy pasia chi ta, Palôh nata pachâna a hmôtuhpa y, Ei thâtih he nâ cha pavaosa ha tlôh na ta, Ama chô liata phuh na lapa na pahmôsa mah y.

¹³ Abeipa lâ hla sa u la, Abeipa cha reithai teh u! Hmo pha leipa a taotuhpazy ku tawhta Dyhchhiepazy hrona a pabohsa ha hih.

¹⁴ Ei pina noh cha chhiesapa ta y sala, Ei nô ta eina sana noh thlaochhipa ta y khah sy!

¹⁵ “Sawchapaw na hnei haw,” Tahpa ta ei paw hnohta thâtih tlôkhei ta, Ano a palysa kawpa chyhsa chhao, Chhiesapa ta y mawh sy.

¹⁶ Cha chyhsa cha Abeipa ta ngiachhie leipa sala, A parao hapa khihpizy hawhta châ mawh sy. My ta chana ao thei sala, Nohchhô ta zikyurâna pyu thei mawh sy,

¹⁷ Chhi chhôh liata eina vaw thie ha leipa vâta. Chhi chhôh liata vaw thi ha aw sah la cha, Ei nô cha ei thlâ châ aw ta, A chhi ta chhâzaw ta eina phaoh thlâh ha awpa tlai.

¹⁸ Hriapasana nata pachârôhna a tyhpa ta, Nozapa ta ei hro chhôh nohzy hmâh awpa heta, Khazia ma chhi tawhta ei vaw pua tly?