ZEREMIAH 18 - Mara Bible RV (BSI)

Beihvituhpa nata beihlei

¹ He he Zeremiah hnohta Abeipa tawhta bie a vaw tlôpa a châ:

² “Thyu la, beihvituhpa o lâ zu la, cha liata ei biezy ei cha pahnosa aw,” tah ta.

³ Chatanachata beihvituhpa o lâ cha zu na ta, beih vina tiaki hmâpa ta rai vaw hria ngâ kaw ta.

⁴ Beihvituhpa ta beihlei hmâpa ta beih a vi haipa cha, a ku liata rao ha ta. Beihvituhpa ta ano ta pha a tahnazie hawhta, beih hropa lâta vi heih ta.

⁵ Abeipa bie ei hnohta vaw tlô heih ta:

⁶ “Hy Izarei pathlazy saih u, beihvituhpa taopa hawhna khata cha tao thei veih eina ma? Abeipa ta a tah. Hy Izarei pathlazy saih u, pachâ teh u, beihvituhpa ku liata beihlei hawhna khata, nâmo chhao ei ku liata nama y.

⁷ Phopi kyh liata tlyma, khinarâh kyh liata tlyma, phia aw na ta, hriechheih aw na ta, ei parao aw, tahpa ta khati ta tlyma vaw reih ha hra aw sah la,

⁸ cha phopi chata a châna awpa ei phuahpa vâna chata, a moleina â heihsai khiahta cha, a chô liata chhiena patlôsa ei chhuahpa cha ei pathleih aw.

⁹ Phopi kyh liata tlyma, khinarâh kyh liata tlyma, padua aw na ta ei loh aw, tahpa ta khati ta tlyma vaw reih ha hra aw sah la,

¹⁰ ei reikah nathlie leipa ta, ei mohmô liata hmo pha leipa a tao khiahta cha, a chô liata hmo phapa tao ei chhuahpa cha ei pathleih aw.

¹¹ Chavâta tahmâ Zudâh râhsawzy nata Zerusale khihsawzy hnohta hetana heta reih teh: ‘Abeipa ta hetana heta a tah, pachâ teh u, nama chô liata chhiena patlôsa a chhuah na ta, chhiena ei patlôsa awpa cha ei patuapalua hai. Chavâta tahmâ chyhsa to nama hrozie pha leipa a heihsai u la, nama hrozie nata nama hmotaopazy a taopathi ha muh vy.’

¹² “Châhrasala âmo ta, ‘Cha cha phahnaina hnei vei! Keimo pachâpa hawhta y aw pi ta, chyhsa to keimo palôh chhorupa moleina hawhta eima tao aw,’ ama tah haw.

¹³ “Chavâta Abeipa ta hetana heta a tah: Phopizy hiahri tua rai u, Cha hawhpa hmo cha ama thei beih ma? Laihsa kônô Izarei ta hmo rarôh y ngaitapa a tao ha hih.

¹⁴ Lebanaw dâhaw cha lôkâhpa tlâhzy tawhta a lei beih ma? Lâ hlapi tawhta ti chakuapa a zâ lohpa a kua beih ma?

¹⁵ Ei phopi deikua cha na my ei ta, Hraoleipazy lâta atheihnazy ama hlâ tyh. Chazy chata ama lâpizy liata pahluasa ei ta, Lâ hlô zy liata a pahluasa ei. Lâlai a chhih khao leipa ta, Lâkiahzy liata ama sie.

¹⁶ Ama râh cha roryhrapa ta paysa ei ta, Chhâzaw ta hmaotô chie awpa ta ama tao. A chapiapa maihta noâh tah ei ta, Ama luh ama chahuah.

¹⁷ Chariahpa hmiakô liata, Nochhi thlih hawhta ei papai aw ei. Ama vâchhiena noh liata hnohchhy aw ei na ta, Ei hmia pahmôsa khao aw veih ei na.”

Zeremiah chariahpazy

¹⁸ Chatawhcha âmo ta, “A vy teh u, Zeremiah he tei ei suh u, theihthaipa tawhta ryhpa diah leipa aw ta, chyhsa sopa tawhta ryhraona diah hra leipa aw ta, hrohsopa tawhta bie diah hra aw vei. A vy teh u, paleih ta ano cha tu ei sih la, a bie kheihawhpa hmah nathlie khah ei suh u,” tah ei ta.

¹⁹ Hy Abeipa, kei lâ na nah pachôh la, Ei khakhaipazy ao nathlie tua.

²⁰ Hmo phapa cha hmo chhiepa ta viarithô awpa a châ ma? Âmo deikua cha ei hrona teipa ta khaohtlô ama chao. Na pathiiana âmo tawhta a pai thei nawpa ta, Na hmiakô liata a duah na ta, Âmo châta reih pha ei chei tyhpa kha a thei mah y.

²¹ Chavâta ama sawzy cha chakâhna lâ hlâ la, Zaozi hmotaotheina lâ hlâ mah y. Ama lapinôzy saw leipa ta y ei sala, Nôhmeipa ta y mawh ei sy. Ama pawhrâhpazy hri ta thi ei sala, Ama satliazy adyuhna liata zaozi ta thi mawh ei sy.

²² Hraotuhpazy âmo lâ eikhapi ta na patlôsa tita, Ama ozy tawhta chapa pyu theipa châ mawh sy! Na patu awpa ta khaohtlô chao ei ta, Ei phei a ao nawpa ta khoheih a chôhpazy ama châ.

²³ Châhrasala Hy Abeipa, Thie awpa ta eina teina zydua ei cha na pahno khai. Ama paraona a ngiahthai leipa la, Ama moleina chhao na mohmô tawhta pahlei khah y. Na hiehâhna daihti liata ama chô liata hria la, Na hmiakô liata pao mawh ei sy.