ZEREMIAH 17 - Mara Bible RV (BSI)

Zudâh moleina

¹ “Zudâh moleina cha thua châsôh ta ropa châ ta, lônah hmao pazaopa hmâpa ta, ama pathipalôh lôphiapa nata ama maisâh kizy liata khiepa a châ.

² Tlâhthlôh tho laipa ry to liata ama maisâhzy nata Aseri tôhzy cha, ama sawzy chhao ta ama khazoh achhyna a châzie ama pahno.

³ Na râh su to liata su sâhpazy taopa ta moleina hmo na taopazy vâta, lyurâhpa liata tlâhpizy nata na hneirôna nata na ryusôhpazy cha, na chariahpazy hnohta hraona sôh châta ei pie aw ei.

⁴ Na ryuto châta ei cha piepa kha ky aw chi ta, na pahno beih leipa râh liata na chariahpazy chakaotuhpa ta ei cha tao aw. Ei hiehâna ta mei pati hapa châ ta, chhâzaw ta a kâ aw.”

⁵ Abeipa ta hetana heta a tah: “Chyhsapa a ngâchhâpa ta, A sapa cha a thatlôna ta hmâh ta, Abeipa a heihsaina palôh a hneipa cha, Chhiesapa ta y mawh sy.

⁶ Râhchawhpa liata chhobuh hawhta châ ta, Hmo phapa a vaw tlô tita hmô aw vei. Râhchawhpa chawhkaraipa suzy liata pahrâ aw ta, Chyhsa y leina alôh râh liata a pahrâ aw.

⁷ “Abeipa a ngâchhâ ta, Abeipa liata a pahniehpa cha, A hu â hieh aw.

⁸ Ano cha ti kiah liata tho lopa hawhta châ ta, Chavah kiah liata thari a pazawhpa hawhta a châ; A hnazy khâ hroh ta, Noh lopa a vaw tlôpa chi vei; A thei patheipa a chalih leipa ta, Noh kâhna kô liata a pachâ rôh vei.”

⁹ Palôh he hmo zydua hlâta dôvei a thai chaipa châ ta, Pasichhih ngaitapa a châ; Ahy ma chyhsapa palôh a pahno thei aw?

¹⁰ “Kei, Abeipa he chyhsa to ama hrozie hawhta thôpa ta, Ama hmotaopa thei hawhta thô awpa ta, Palôh a mohtuhpa châ na ta, Pachâna a pasiatuhpa ei châ.”

¹¹ Hmo doleipa taopa ta a hneirôhpa cha, Ano tih leipazy tlô ta a pakeisapa Bykheihpa hawhta a châ; A lochona daihti liata ano cha siesai aw ei ta, A chhâna lâta cha ahrupa lâta a pua aw.

¹² Keimo supathaihpa deikua cha, Hlâno tawhta cheihchalopa beidyuchhai rônahpa a châ.

¹³ Hy Abeipa, Izarei hnabeiseihpa y, Châ siesaipa zydua cha maophyuh aw ei ta, Châ tleisaipazy chhao, Abeipa, hrona tihnawh ama siesaipa vâta, Dohlei liata moh ropa hawhta ama leidia aw.

Pachhana châta Zeremiah thlahchhâna

¹⁴ Hy Abeipa, na patlâh mah y, Chatanachata ei vaw tlâh ha aw; Na pachha mah y, Chatanachata pachhapa ta ei y aw; Nâma deita he reithaina ei hlâ tyhpa cha na châ.

¹⁵ Pachâ teh, chyhsazy ta ei hnohta, “Abeipa bie cha khataih liata a y? Vaw tlô bao sa,” Ama tah tyh.

¹⁶ Na mietaku vaituhpa ei châna a râsai leipa na ta, Chhiena noh a vaw tlô awpa chhao khoh hlei va na. Ei hmao tawhta a puapa pahno chi ta, Cha cha na hmiakô liata a y.

¹⁷ Ei châta chichhihpa châ khah y, Nâ cha chhiena noh liata ei chhaipa mah na châ tâh.

¹⁸ Na taolatuhpazy cha maophyuhpa ta y ei sala, Kei deikua cha maophyuhpa ta na paysa khah y. Âmo cha thlazohpa ta y ei sala, Kei deikua cha thlazohpa ta na paysa khah y; Ama chô liata chhiena noh patlôsa la, Raona a pathopa ta âmo cha parao mah y!

Pahânoh pathaihsana

¹⁹ Abeipa ta ei hnohta hetana heta a tah: “Vawh la, Zudâh beizy angiana nata puana Phopi Chhikao liata a kei duah la, Zerusale thokhy chhikao zydua liata chhao a kei duah la,

²⁰ ama hnohta, ‘He chhikaozy liata a ngia tyhpa nâmo, Zudâh beizy, Zudâh mo zydua nata Zerusale khihsaw zydua saih u, Abeipa bie he thei teh u.

²¹ “‘Abeipa ta hetana heta a tah: Nama hrona châta a chado kaw teh u. Pahânoh ta hmo rai phaoh leipa u la, Zerusale thokhy chhikao liata a ngiakhei hra khuh vy.

²² Pahânoh ta nama o tawhta hmo phao nama puakhei awpa châ leipa ta, rai nama hria awpa châ hra vei. Châ pathlatuhpazy hnohta bie ei piepa hawhta, Pahânoh cha nama pathaihsa awpa a châ.

²³ Châhrasala nathlie leipa ei ta, ama nah pachôh hra veih ei. Chhorupa ta tlao y ei ta, chhoreina thei khoh leipa ei ta, a pyh khoh hra veih ei.

²⁴ “‘Abeipa ta hetana heta a tah: Ei bie nathliepa ta, Pahânoh ta he khihpi thokhy chhikaozy liata hmophao a ngiakhei leipa u la, Pahânoh pathaihsapa ta rai nama hria leipa khiahta cha,

²⁵ Dâvi beidyuchhai liata a tyuhpa beizy nata beisawzy cha talailihzy nata arâzy kiapa ta, he khihpi thokhy chhikaozy liana heta amâ ngia lymâ aw. Ama beimachâzy, Zudâh râhsawzy nata Zerusale khihsawzy chhao amâ ngia lymâ aw. Chatanachata he khihpi he chhâzaw ta pahrapa ta a y ha aw.

²⁶ Zudâh khihpizy nata Zerusale chheipâhzy tawhta chyhsazy a vy aw ei ta, Benzami râh tawhta zy, Sephelâ bypi râh tawhta zy, tlâh râh tawhta nata Neke chho râh tawhta zy a vy aw ei ta, raopa hlânazy, atheihnazy, niepa hlânazy, deiryhzy ropahâhpazy nata alyna biereina hlânazy Abeipa o lâ ama vaw cheih aw.

²⁷ Châhrasala Pahânoh pathaihsa awpa na­ta Pahânoh ta hmo phao lei awpa nata Zerusale thokhy chhikaozy liata a hmo phao a ngiakhei lei awpa ky liata ei bie nama nathlie vei khiahta deikua cha, khihpi thokhy chhikaozy liata mei patih awh na ta, Zerusale abei ozy kâ khai aw ta, pachhaipa châ aw vei.’”