ZEREMIAH 15 - Mara Bible RV (BSI)

Zudâh chô liata Abeipa hiehâna diah thei vei

¹ Abeipa ta ei hnohta, “Mawsi nata Samuela chhao rai ei hmiakô liata a vaw duah hra ei sala, ei phopi lâ heta ei palôh a heih hlei aw vei. Âmo cha ei mohmô tawhta papua la, sie syulyu ha ei sa!

² ‘Khataih lâ eima sie aw?’ ama cha tah khiahta cha, ama hnohta, ‘Abeipa ta hetana heta a tah: “‘Potlana châta raopazy cha, Potlana lâ sie ei sala; Zaozi châta raopazy cha, Zaozi lâ sie mawh ei sy. Chakâhna châta raopazy cha, Chakâhna lâ sie ei sala; Seichâna châta raopazy cha, Seichâna lâ sie mawh ei sy,’ Na tah aw ei.

³ “Paraotuhpa chi palih ama chô liata ei vaw tuah aw, Abeipa ta a tah: A thie awpa zaozi, a hriechheih awpa izy nata a palâ awpa nata a pahleipadia awpa avâ pavawzy nata lei sazy ei vaw tuah aw.

⁴ Hezekia sawchapawpa Zudâh bei Manase ta Zeru­sale liata a hmotaopa vâta, khizaw khinarâh zydua ta rarôh ypa ama tah awpa ta âmo cha ei tao aw ei.

⁵ “Hy Zerusale y, ahy ma cha ngiachhie aw ta, Ahy ma a pachâ châ rôhkhei aw? Ahy ma na thâtih cha hiahri awpa ta, Nâ lâ a vaw tlei khoh aw?

⁶ Na thy ha chi ta, Hnôh nâ sy lymâ. Chavâta na chô liata ei ku hy na ta, Ei cha pahleipadia haw; A ngiapachhi tiah khao va na, Abeipa ta a tah.

⁷ Râh thokhy chhikaozy liata, Âmo cha ziena ta zie ei na ta; Saw luh pahleipa ta ei tao ha ei. Ama hroziezy ama pathleih leipa vâta, Ei phopi cha ei pahleipadia haw.

⁸ Tilaipi sadi hlâta hluh viapa ta, Ama nôhmeizy ei papôh. Satliapazy nôzy lâta paraotuhpazy tuah na ta, Nohchhô sawhvaw ta nôzy cha ama parao; Chichhihna nata thlazohna patlôsa na ta, Eikhapi ta ama chô liata a tlô thlu ei.

⁹ Saw pasari a satuhpa cha panao ta, A thlahpa a pathlie haw; Nohchhô ta a noh tla ha ta, Nozapa nata nohzaopa ta a y. Laibâhpazy cha zaozi ta thi awpa ta, Ama chariahpazy ku liata ei pie aw ei, Abeipa ta a tah.”

Zeremiah nôu bie

¹⁰ Ei nô y, alei chô zydua a patypamâtuhpa nata a chakhiatuhpa ta eina sapa chi he, ei hu a po kaw dia! A pôhna hneipa ta ei sôh chyhsa dyu pacheisa beih leipa na ta, chyhsa sôh dyuchei beih hra va na. Chatanachôta ama zydua ta chhie eina sapa ei.

¹¹ Abeipa ta hetana heta einâ chhy: “Hmo phapa châta Izarei laibâhpa chi cha ei cha pachha tlai aw. Chatanachata na chariahpazy cha, chhiena daihti nata nôpona daihti liata âmo châta thlahchhâ awpa ta, nâma liata châ hia awpa ta ei tao aw ei.

¹² Chyhsa ta thua a thlie thei aw ma? Maw lâta thua nata dawh a thlie thei aw ma?

¹³ “Na moleinazy vâta, na râh zydua liata na hneina nata na ryusôhpazy cha, hraona sôh ta a mâ leipa ta pie aw.

¹⁴ Ei hiehâhna ta mei patipa châ ta, chhâzaw ta a kâ awpa vâta, na pahno leipa râh liata na chariahpazy chakao awpa ta ei cha tao aw.”

Zeremiah hnohta Abeipa bietai

¹⁵ Hy Abeipa y, na pahno mâh tâh; Rie nâ theipa ta na vaw tly la, Nâ taolatuhpazy chô liata phuh na lapa mah y. Na daotheina vâta na pahlei leipa la, Nâma vâta reipachhiena a taopa ei châpa pahno mah y.

¹⁶ Na biezy hmôpa châ ta, Ei nie ha ei. Hy Abeipa, Pheisaihzy Khazohpa, Na moh a phaohpa ei châpa vâta, Na biezy cha ei châta alyna châ ta, Ei palôh thaphana a châ.

¹⁷ Haosai a taopazy hry liata a tyuh leipa na ta, Haosai liata a ly hra va na. Ei chô liata na ku y ta, Ruchhôna ta eina pabiepa vâ chi ta, Kei dei ta tlâ ei tyuh tyh.

¹⁸ Khazia ma ei pasana pai thei leipa ta, Ei hmah a pha thei vei tly? Khazia ma ei hmah patlâh thei awpa a châ vei tly? Vahtie a ngâchhâ tlâh leipa hawhta ma, Ei châta na châ aw? Chavah ti kuapa hawhta ma na châ aw?

¹⁹ Chavâta Abeipa ta hetana heta a tah: “Na vaw kua khiahta cha, Cha paduapathi aw na ta, Ei hmiakô liata nâ duah heih aw. Hmo sôhpa kyh reih la, Hmo phahnai leipa na reih leipa khiahta cha, Ei pakah hawhta na châ aw. Nâ lâ a vaw heih aw ei ta, Nâ deikua cha âmo lâ a heih aw va chi.

²⁰ He phopi châna heta, Dawh thokhy pâhchhô ta ei cha tao aw; Cha pachha awpa nata cha pabohsa awpa ta, Na hnohta ei ypa vâta, Châ dyuh aw ei ta, Cha pahnie aw veih ei, Abeipa ta a tah.

²¹ Moleipazy ku tawhta cha pachha aw na ta, Nôchhiepazy ku tawhta ei cha chatlai aw.”