ZEREMIAH 14 - Mara Bible RV (BSI)

Chakâhna, zaozi nata potlana

¹ He he nohkâhna kyh liata Zeremiah hnohta a vaw tlôpa Abeipa bie a châ:

² “Zudâh cha mâchhiesa ta, A thokhy chhikaozy a ry khai haw; Chaphôhtupa ta alei liata a byu ei ta, Zerusale awhsâhpa pyu a paro ngaita.

³ Chhituhpazy ta chakaotuhpazy ti pathaisa ei ta, Tikhaohzy yna lâ ama pangai; Châhrasala ti hmô leipa ei ta, Ama tibeihzy aruapa ta kuakhei ei ta, Nozapa nata vâsâhpa ta ama luh amâ khu.

⁴ Râh liata vâsua rai y leipa ta, Chhaohlei a kai khai hapa vâta, Lyutaopazy nozapa ta y ei ta, Ama luh amâ khu.

⁵ Lyurâhpa sasu chhao ta a taw pataw ta, Sibiepa rai a y leipa vâta a taw cha a siesai.

⁶ Lyurâhpa alâzy awphy tlâh lakizy liata a duahpa ta, Savaizy hawhta ama hu tô ei ta, Si hrohpa a y leipa vâta ama mo a zoh.”

⁷ “Eima paraonazy ta miah leih hra sala, Na moh vâta, Hy Abeipa, rai hria mah y; Eima paonazy hluh ngaita ta, Na chô liata eima vaw molei haw.

⁸ Hy Izarei hnabeiseihpa, Nôpo nota ano pachhatuhpa y, Khazia râh liana heta chihropa hawhta y aw chi ta, Zâ kha rie ta a chapiapa khichhaipa hawhta na y aw?

⁹ Khazia chyhsa noraihpa hawhta y aw chi ta, A pachha thei leipa pasaipha hawhta na y aw? Chatahrasala Hy Abeipa, Nâ cha eima hry liata y chi ta, Keimo chhao na moh a phaohpa eima châ hih, Miah siesai khah y.”

¹⁰ He phopi kyh liata, Abeipa ta hetana heta a tah: “Viavi awpa khoh kaw ei ta, Ama phei chakâna a sohsi veih ei; Chavâta Abeipa ta âmo cha a pyh leipa ta, Ama paraona a thei thlâh ha aw ta, Ama moleinazy vâta a hrie aw ei.”

¹¹ Abeipa ta hetana heta eina chho: “He phopi pha nawpa ta thlahchhâ khah y.

¹² Kâhvileipa ta y hra ei sala, ama awna ao nathlie leipa aw na ta, raopa hlâna nata niepa hlâna zy hlâ hra ei sala, a pyh aw va na. Zaozi nata chakâhna nata potlana zy ta âmo cha tlao ei pahleipadia aw ei.”

Hrohsopa haiphiahpazy

¹³ Chatawhcha kei ta, “Âh, Abeipa Zehôvâh, pachâ tua, hrohsopazy ta ama hnohta, ‘Zaozi a tyh leipa aw ei chi ta, chakâhna y hra leipa aw ta, he su liata thlalôhna tlao ei cha pie aw ei,’ ama tah tyh,” tah na ta.

¹⁴ Abeipa ta hetana heta einâ chhy: “Hrohsopazy ta ei moh ta haipa ta hrohsona biezy ama phuah tyh. Âmo cha ei tuapa châ leipa ei ta, biepie hra leipa ei na ta, ama hnohta bie reih hra va na. Aluahna phichhyhpa, pachaona hraoleipa nata ama palôh liata dôveina biezy ama cha chhopa a châ.

¹⁵ Chavâta ei tuapa châ tlôh leipa ta ei moh ta hrohsona bie phuah ei ta, ‘He râh liata zaozi nata chakâhna vaw tlô aw vei,’ a tahtuhpa hrohsopazy kyh liata Abeipa ta hetana heta a tah: Cha hrohsopazy cha zaozi nata chakâhna ta ama leidia aw.

¹⁶ Hrohsona bie ama chhopa zawpi chhao, chakâhna nata zaozi vâta Zerusale khiliahzy liata thypa châ aw ei ta, âmo chhao, ama lapinôzy nata ama sawchapawzy nata ama sawchanôzy chhao, pabupa châ tlâ aw veih ei. Ama paraona ama chô liata ei lei thlu aw ei.

¹⁷ “Ama hnohta he bie he na reih awpa a châ: ‘A chhô zâ ta ei mothlih loh sala, Hi beih khah sy. Ei phopi zuah laihsa kôpa cha thata tupa châ ta, Hmah laipa a phaoh ha hih.

¹⁸ Lyu lâ ei sie tita, Zaozi ta thiepazy sai hmô ei na ta; Khihpi liata ei ngia nota, Chakâhna vâta riethei pasataona sai ei hmô. Hrohsopazy nata theihthaipazy cha, Ama rai hriapa ta râh chahryh ei ta, A pachâ nawpa rai pahno veih ei.’”

¹⁹ Hy Abeipa, Zudâh cha na thy pathlah ha ma? Na hro ta Zaio a pasi kaw ma? Eima châta patlâhna y leina taihta, Khazia ma pasa miah na pataosa tly? Thlalôhna tlua pi ta, Châhrasala phana vaw tlô leipa ta; Patlâhna daihti hâ pi ta, Chichhihna sai eimâ tyh.

²⁰ Hy Abeipa, eima paraonazy a pahno pi ta, Miah pathlatuhpazy thaileina chhao eima pahno; Na chô liata eima vaw molei ha tlai na.

²¹ Na moh vâta rie miah dytha leipa la, Na rônahna beidyuchhai moh pachhie khah y; Eima hnohta na biehrai kha a thei la, Rie parao khah y.

²² Pho hropa khazohzy hry liata, Avâ a pasuasa theipa ama y ma? Avâzy khi ta avâ ama pasuasa thei ma? Hy Abeipa eima Khazohpa, Avâ a pasuasa theipa cha nâ deita châ va chi ma? He hmo zydua he nâma taopa a châpa vâta, Nâma lia deita ta eima hnabeiseihna a y.