ZEREMIAH 12 - Mara Bible RV (BSI)

Zeremiah paphôhna nata Khazohpa achhyna

¹ Hy Abeipa, ei cha paphôh thlupa chhao ta, Nâ la a do pyly chi ta, Chatahrasala ei cha nôuna bie ei cha vaw tlôkhei aw. Kheihtazieta ma hmoparaopazy lâpi patlâ ta, Haiphiahpazy ama hlao a tloh thlâh ha tly?

² Âmo cha loh chi ta, thari thla ei ta, Laiseih ei ta, thei ama pathei tyh. Ama pakah a hnia chi ta, Ama palôh deikua cha nâ hla kaw.

³ Hy Abeipa, kei deikua cha na pahno chi ta, Na hmô chi ta, nâ lâta ei palôh phao na pasia tyh. Mietaku thie awpa hawhta âmo cha a daophi la, Thiena noh châta âmo cha soh nano mah y.

⁴ Râh he khachâ ma mâchhiesa aw ta, Khachâ ma râh to liata sibiepazy ama uah aw tly? A chhôh liata a pahrâpazy ta Hmo pha leipa tao ei ta, “Khazohpa ta eima chhâna hmô aw vei,” Ama tahpa vâta, Râhsazy nata pavawzy ama thi khai ha hih.

Abeipa ta Zeremiah a chyh-ei

⁵ “Phei ta a siepa chyhsazy ta châ râpasua ei ta, Na tha ama cha pachhâ khiahta cha, Kheihta ma arâzy nâ râpasua thei aw? Abohna râh lia hmahta na pao khiahta cha, Zawdâh sipopa liata khâpa ma na tao aw?

⁶ Na unawhpa, na paw pathlazy cheingei ta, Âmo tlai ta cha dôvei ei ta; Cha chadai ei ta, A paropa ta ama cha awsao khawh. Bie pha châ chho hra ei sala, Âmo cha zo khah y.”

⁷ “Ei o siesaipa ta, Ei ryuto thy ha na ta; Ei hro ta a tlaichhai ngaitapa cha, Ei hro chariahpazy hnohta ei hlâ haw.

⁸ Ei ryuto cha kei châta Lyurâhpa chakeibarôhneipa lyu ta, Einâ rôh thlu tyh; Chavâta ano cha ei hao kaw.

⁹ Ei ryuto cha kei châta Changie hawhta châ ta ma, Sa hei niepa pavawzy ta ama chadô tly? Sie la, sahrâhpa zydua kei pakhy la, Ano palâ awpa ta a vaw chhi mah y.

¹⁰ Mietaku vaituhpa hluhpi ta Ei kre sadô parao ei ta, Ei tovyuh ama tlypâ; Ei tovyuh pha ngaitapa cha, Râhchawhpa roryhrapa ama pachâsa haw.

¹¹ Roryhrapa ta tao ha ei ta, ‘Roryhrapa’ tahpa ta mâchhiesana ao ei thei. Râh pôhpalôhpa cha roryhrapa ta taopa châ ta, Châhrasala ahy hmahta pachâ veih ei.

¹² Râhchawhpa awphy tlâh lakizy liata, Paraotuhpa vaw tlô ha ta, Râh chhâna hiakha lâ tawhta hiakha lâ taihta, Abeipa zaozi ta a palâ khai haw; Thlalôhpa ta ahy hmah y thei khao veih ei.

¹³ Sâh tu ei ta, Ahloh ama hria; Ama rie thata a pathei ei ta, Athôhna y hlei vei. Abeipa hiehâhna ru ngaitapa vâta, Ama kôvei pha leipa cha ama no a za kaw aw.”

¹⁴ Abeipa ta hetana heta a tah: “Ei phopi Izarei hnohta ryuto râh ei piepa a chhutuhpa ei chheipâh râh moleipa zydua cha, moh teh u, ama râh tawhta phia aw ei na ta, Zudâh pathlazy chhao ama hry tawhta ei phia aw ei.

¹⁵ Ei phia khai tawhta âmo cha ngiachhie heih aw ei na ta, chyhsa to ama ryuto chyu lâta nata ama râh chyu lâta ei chhi heih aw ei.

¹⁶ Chatawhcha hetana heta a vaw châ aw. Phopi hropazy ta Bâlâ moh ta bie a taih awpa ta ei phopi ama vaw pachu hapa chhao ta, ei phopi hroziezy pakhâta ta a chu ei sala, ‘Abeipa hrona reipa ta ei reih,’ tahpa ta ei moh ta bie amâ taih khiahta cha, ei phopi hry liata âmo chhao ei padua aw ei.

¹⁷ Phopi kheihawhpa rai châ sala, a nathlie khoh vei khiahta deikua cha, cha phopi cha phia pathlah aw na ta, tlokhuh ei pahleipadia ha aw,” Abeipa ta a tah.