ZEREMIAH 11 - Mara Bible RV (BSI)

Biehrai Paraona

¹ He he Zeremiah hnohta Abeipa tawhta bie a vaw tlôpa a châ:

² “He biehrai biezy he thei u la, Zudâh râhsawzy nata Zerusale khihsawzy chho teh u.

³ Ama hnohta, Abeipa Izarei Khazohpa ta hetana heta a tah, nama tah aw: ‘He biehrai biezy a nathlie leipa cha chhiesapa ta y mawh sy.

⁴ Nâmo châ pathlatuhpazy Izi râh thua patina meihô tawhta ei chhi papua nona ei kha, ei ao nathlie awpa nata ei biepie zyh awpa ta bie ei pie ei. Chatanachata ei phopi châ aw ei chi ta, kei nama Khazohpa ei châ aw.

⁵ Châ pathlatuhpazy hnohta sâhpiti nata kheihti lona râh pie awpa ta bie ei taihpa kha, tanoh ta nama hmôpa hawhna heta, ei pa-i aw,’” tah ta. Kei ta, “Cha ta sy, Abeipa,” tah na ta.

⁶ Chatawhcha Abeipa ta hetana heta eina chho: “He bie zydua he Zudâh khihpizy nata Zerusale khiliahzy liata phuah teh. Abeipa ta hetana heta a tah: ‘He biehrai biezy he nathlie u la, zyh teh u.

⁷ Châ pathlatuhpazy kha Izi râh tawhta ei kaw chhi papua no tawhta tanoh taihta, ei bie zyh awpa ta â i ngaitapa ta ei vaw chho ngâ thlâh ha tyh ei.

⁸ Châhrasala zyh leipa ei ta, ama nah pachôh hra leipa ei ta, chyhsa to ta âmo palôh moleipa chhoruna lâpi tlao amâ chhih lymâ. Chavâta biehrai a zyh leipa chô liata chhiesana a tlô awpa, biehrai liata â rohpa zydua ama chô liata ei patlôsa hapa a châ.’”

⁹ Abeipa ta hetana heta eina chho heih: “Zudâh râhsawzy nata Zerusale khihsawzy ta arulâta eina tei ei.

¹⁰ Ei bie a nathlie khoh leipa, âmo pathlatuhpazy moleina lâ kua heih ei ta, khazoh hropazy pazi ei ta ama chakao. Izarei pathlazy nata Zudâh pathlazy ta âmo pathlatuhpazy hnohta biehrai ei taopa ama parao haw.

¹¹ Chavâta Abeipa ta hetana heta a tah, moh teh u, chhiena ama chô liata vaw patlôsa na ta, khôkhâh thei aw veih ei. Na aw hra ei sala, a chhy aw veih ei na.

¹² Chatawhcha Zudâh khihpizy nata Zerusale khihsawzy cha, atheihna ama hlâ tyhpa khazohzy lâ pangaipa ta awsao aw ei ta, châhrasala chazy chata ama nôpona daihti pachha thei aw veih ei.

¹³ Hy Zudâh y, na khazohzy cha na khihpi zie tlai châ ei ta, Bâlâ lâta atheihna hlâ nawpa ta maisâh na taopa, maophyuh nawpa ta maisâh na paduapazy cha, Zerusale khih chhôh lâpi zie tlai ta a hluh.

¹⁴ “Chavâta he phopi he thlahchhâpa leipa la, âmo châta awh hra leipa la, thlahchhâ hra khah y. Ama nôpona daihti liata na aw hra ei sala nathlie khao aw veih ei na.

¹⁵ Hmo pasichhihpa hluhpi a tao hapa ei kyhpachâpa cha, ei o liata y awpa ta khâpa thaichâna ma a hnei khao tly? Atheihna sa ta na rao nawpa a cha pakhôkhâhsa thei aw ma? Cha cha nâ palaikhei thei aw ma?

¹⁶ Abeipa ta, ‘Ôli tho hrohpa, thei pha a patheipa tho a ngiapa,’ tahpa ta moh a cha bipa kha na châ. Châhrasala chothyu ru ngaitapa a hrâhna hry liata mei ta rao aw ta, a chiahzy a thlie khai ha aw ei.

¹⁷ Izarei pathlazy nata Zudâh pathlazy ta hmo pha leipa tao ei ta, Bâlâ lâta atheihna hlâpa ta ei hie eina pahâhpa vâ ei ta, nâma châ lohtuhpa Pheisaihzy Abeipa ta na chô liata chhiena patlôsa awpa ta a phuah haw.”

¹⁸ Abeipa ta na pahnosa ta ei pahno haw; Nâma tlai ta ama hmotaopazy eina pahmô ha chi.

¹⁹ Kei deikua cha mietakutaw nônaipa Thie awpa ta amâ chhipa hawhta ei châ. “Tho cha a thei chhaota parao sih la, A moh a thei thlâhpa a châ khao lei nawpa ta, Ahrohpa râh tawhta chhawh pathlah ha suh u,” Ama tahpa kha, Ei chô liata tao amâ chhuahpa a châpa Vaw pahno leipa na ta.

²⁰ Châhrasala, Hy Pheisaihzy Abeipa, Siana ta pachia chi ta, Palôh nata pachâna a pasiatuhpa y, Ei thâtih cha nâ ei cha pavaosa hapa vâta, Ama chô liata phuh na lapa na pahmôsa mah y.

²¹ Chavâta na hrona la a chhuahpa ta, “Abeipa moh ta hrohsona bie phuah khah y, na phuah khiahta cha eima ku liata na thi aw,” châ tahtuhpa Anathô mo kyh liata Abeipa ta hetana heta a tah.

²² Chavâta Pheisaihzy Abeipa ta hetana heta a tah: “Moh teh u, âmo cha ei hrie aw ei. Satliapazy zaozi ta thi aw ei ta, ama sawchapawzy nata ama sawchanôzy chakâhna ta ama thi aw.

²³ Pakha hmah pahlôhpa châ aw veih ei. Anathô mo hrie nawpa kô vaw tlô aw ta, ama chô liata chhiena ei patlôsa aw.”