ZEREMIAH 1 - Mara Bible RV (BSI)

Zeremiah awna

¹ He biezy he Benzami râh Anathô khihpi liata theihthaipazy hry liatapa, Hikia saw­chapawpa Zeremiah biezy a châ.

² Amawna sawchapawpa Zudâh bei Zôsia daihti, â beina kô hrawh hleithôhna liata, Zeremiah hnohta Abeipa bie a vaw tlôpa a châ.

³ Abeipa bie he Zôsia sawchapawpa Zudâh bei Zehôki â bei daihti liata chhao vaw tlô ta, Zôsia sawchapawpa Zudâh bei Zedekia abeina kô hrawh hleikhana chhâna taihta vaw tlô lymâ ta, thla pangawhna liata Zerusale sei ta â tahna daihti taihta a vaw tlô lymâ.

⁴ Abeipa bie cha ei hnohta vaw tlô ta,

⁵ “Py chhôh liata ei cha tao hlâ tawhta cha pahno na ta, Chhi tawhta na pua hlâ tawhta cha pathaisapa ta, Phopizy lâta hrohsopa ta ei cha rao,” tah ta.

⁶ Kei ta, “Âh, Abeipa Zehôvâh, moh tua, hawtipa deita châ na ta, bie reizie chhao thai va na,” tah na ta.

⁷ Châhrasala Abeipa ta ei hnohta, “‘Hawtipa deita châ na ta,’ tah khah y, Ei cha tuana phopi zydua lâ sie aw chi ta, Bie ei cha piepa maih na rei awpa a châ.

⁸ Âmo cha chi khah y, Cha pachha awpa ta na hnohta ei y aw, Abeipa ta a tah,” tah ta.

⁹ Chatawhcha Abeipa ta a ku vaw pazawhpa ta ei pakah vaw hria ta. Abeipa ta ei hnohta, “Moh tua, na pakah liata ei biezy ei soh haw.

¹⁰ Tanoh he phopizy nata khinarâhzy chô liata cha soh na ta, Phia awpa nata phie awpa ta ei cha soh; Pahleipadia awpa nata thy awpa ta cha soh na ta, Sa awpa nata lo awpa ta ei cha soh,” tah ta.

¹¹ Abeipa bie ei hnohta vaw tlô ta, “Zeremiah, khâpa na hmô?” tah ta. Kei ta, “Kuasâh tho chôchahrei ei hmô,” tah na ta.

¹² Abeipa ta ei hnohta, “Na hmôpa â do na, ei bie patlô awpa ta a phapa ta ei moh hai,” tah ta.

¹³ Abeipa bie cha a ei nona ta ei hnohta vaw tlô heih ta, “Khâpa na hmô?” tah ta. Kei ta, “Beih a tlao ngâpa, a pakah maw lâ â heihsaipa ei hmô,” tah na ta.

¹⁴ Abeipa ta ei hnohta, “Râh liata a pahrâpa zydua chô liata maw lâ tawhta chhiena a vaw tlô aw.

¹⁵ Pachâ teh, maw lâta abeinarâhzy liata chipho zydua aw ei na ta, a vy aw ei ta, Zerusale thokhy chhikaozy liata ama beidyuchhai patyuh chyu aw ei ta, a thokhy zydua nata Zudâh khihpi to liata ama patyu thlu aw, Abeipa ta a tah.

¹⁶ Chatawhcha na siesai ei ta, khazoh hropazy lâta ropahâhpa raopa ta, âmo ku ta taopa amâ chhyna moleina zydua vâta, âmo kyh liata ei pachiana zydua ei phuah aw.

¹⁷ Nâ deikua cha, na chai a saih la, thyu la, bi ei cha piepa zydua ama hnohta reih mah y. Ama hmiakô liata thlazohpa ta y khah y, chataleipatala ama hmiakô liata thlazohpa ta ei cha paysa pathlei aw na.

¹⁸ Pachâ teh, he noh liana heta Zudâh râh zydua châta thokhy khihpi ta cha tao na ta, thua tôh nata dawh thokhyzy ta ei cha tao. Zudâh beizy, a beimachâzy, a theihthaipazy nata râhsawzy châta thokhy khihpi châ aw chi ta, thua tôh nata dawh thokhyzy na châ aw.

¹⁹ Cha pachha awpa ta na hnohta ei ypa vâta, châ dyuh aw ei ta, châhrasala cha pahnie aw veih ei, Abeipa ta a tah,” tah ta.