ZEPHANIA 3 - Mara Bible RV (BSI)

Zerusale nata phopizy pachiana

¹ Khihpi thuhnypa nata puapa, Tlybai a hmâhpa khihpi cha, A hu a po na!

² Rei a ngiah leipa ta, Chhoreina chhao a pyh khoh vei. Abeipa ngâ leipa ta, A Khazohpa a hnia hra vei.

³ A chhôh liata beimachâzy cha, Chakeibarôhneipa a rôh ngâpazy châ ei ta; A ryureituhpazy chhao, Zâ changie zohpa ama châ; My ta nie awpa dâhdei chhao, Pahlôh khao tyh veih ei.

⁴ A hrohsopazy cha, Chyhsa â khotlâh kawpa châ ei ta, Dôvei hmâhpa chyhsa ama châ; A theihthaipazy ta hmo pathaihpa papuapalei ei ta, Ryhpa ama parao tyh.

⁵ A chhôh liata a ypa Abeipa cha sia ta, Hmo doleipa tao beih vei; My chareih ta a ryureina dopa palâsa ta, Â doleipa ta ryureih beih vei. Chyhsa doleipa deikua cha, Nozana châh chhao pahno vei.

⁶ “Râhzy parao ei na ta, Ama thokhyzy a ry khai haw; Ama lâlaizy ziahzi parohsa na ta, A chhih awpa y khao veih ei. Ama khihpizy roryhrapa ta paysapa châ ta, Chyhsa y khao leipa ei ta, A chhôh liata a pahrâpa rai y khao veih ei.

⁷ Khihpi hnohta, ‘Na chi hmeiseih la, Chhoreina a pyh mah y; Chatanachata na pahrâna su paraopa châ leipa aw ta, Nâma hrie nawpa ta ei raopa chhao, Na chô liata vaw tlô aw vei,’ tah na ta, Châhrasala hmo ama tao via nahta, Ama parao via rili.

⁸ Chavâta pachia awpa ta Ei duah nawpa noh vaw hâ teh u,” Abeipa ta a tah. “Phopizy pahmaoh aw na ta, Khinarâhzy ei awpakhy aw; Ei hiehâhna lei thlu aw ei na ta, Ei pathi sah ngaitapa ei lei thlu aw ei; Biechhâna ei tao haw. Ei hiatliana mei ta Khizaw zydua a kâ khai aw.”

Phopizy pipathina

⁹ “Cha daihti liata, Phopizy hmao panano aw na ta, Hmao pathaihpa ta ei tao aw ei; Chatanachata ama zydua ta Abeipa moh pado aw ei ta, Lôraohpa ta ano ama chakao aw.

¹⁰ Kusi chavahzy khô lâ râhzy tawhta, Kei nâ chhytuhpa ei phopi paipatlapa sawchanôzy ta Kei lâta hmohlâpa ama vaw cheih aw.

¹¹ “Cha noh liata cha, Ei chô liata moleina hmo taopa ta, Einâ dyuhnazy vâ chi ta, Maophyuhpa ta paysapa châ khao aw va chi. Thaphapa ta namâ palaikhei kaw tyhpazy cha, Nama hry tawhta la aw na ta, Ei tlâh pathaihpa liata Akhotlâhpa ta y heih khao aw veih ei chi.

¹² Nama hry liata nônaipa nata areisipazy deikua cha, Pahlôh aw ei na ta, Abeipa moh cha amâ bohna a châ aw.

¹³ Izarei laibâhpazy cha, Hmo doleipa tao khao aw veih ei; Haipa bie reih khao leipa aw ei ta, Ama pakâh liata paleih dôvei hmâhpa y khao aw vei. Ama lao bâpa ta a byu aw ei ta, Ahy ta hmah âmo cha pachisa khao aw veih ei.

Thaphana Hla

¹⁴ Hy Zaio Sawchanô y, hla sa la, Hy Izarei, thata awh teh! Hy Zerusale Sawchanô, Na pathipalôh zydua ta a ly la, Thaphapa ta y mah y!

¹⁵ Abeipa ta nâma hriena pachhâsa ha ta, Na chariahpazy a pasipathai ha ei. Abeipa, Izarei Beipa cha na hnohta y ta, Hmo pha leipa chi beih khao aw va chi.

¹⁶ Cha noh liata cha, Zerusale hnohta hetana heta ama tah aw: ‘Hy Zaio, chi leipa la, Na ku tha zei khah sy.

¹⁷ Abeipa na Khazohpa cha na hnohta y ta, Khazoh thatlôpa ta a cha pachha aw. Na chô liata a thapha aw ta, A palôh a tlâh aw; A kyhpachâna ta thlah cha palôh aw ta, Na chô liata â lyna hla a sa aw.’

¹⁸ “Kyhchhi a hlao thei lei vâta pachârôhpazy cha, Châ chhi pakhy aw ei na ta, Hmiachhie noza tao khao aw veih ei chi.

¹⁹ Pachâ teh, cha daihti liata cha, Châ tlybaituhpa zydua ei hrie aw ei; Pheisypazy pachha aw ei na ta, Paipatlapazy ei chhi pakhy heih aw ei. Chatanachata nozapa ta ama paysana râh zydua liata, Palyupalihna nata moh phana ei patosa aw ei.

²⁰ Cha daihti liata châ chhi pakhua aw ei na ta, Cha daihti liata ei cha pahmaohpakhy aw ei. Nama mohmô lia tlai ta Vânoh ei cha patosa heih ti ei ta cha, Khizaw phopi zydua hry liata Moh phapa ta cha tao aw ei na ta, Palyupalihpa ta ei cha tao aw ei,” Abeipa ta a tah.