ZEPHANIA 2 - Mara Bible RV (BSI)

Ro awpa ta hruana

¹ Hy nozana a pahno leipa phopi, A hmaoh u la, a hmaohpakhy teh u;

² Noh taihpa vaw tlô hlâta, Cha noh cha sâh sihpa hawhta â zaw hlâta, Abeipa hiehâhna rupa nama chô liata a tlô hlâta, Abeipa ruchhôna noh nama chô liata a vaw tlô hlâta, A hmaohpakhy teh u.

³ Nâmo, khizaw liata areisipa zydua saih u, Abeipa cha pado u la; Nâmo, a biepiepa a zyhpa zydua saih u, Abeipa cha pado teh u. Siana tlua u la, Nawhna tlua teh u; Chatanachata Abeipa hiehâhna noh liata Nyupa nama châ aw.

Izarei chariahzy pachiana

⁴ Kâza cha siesaipa châ aw ta, Askelaw roryhrapa ta a y aw; Asadô khihsawzy cha nohchhô sawhvaw ta papuapa châ aw ei ta, Ekaraw cha phia pathlahpa a châ aw.

⁵ Nâmo, tilaipi kiah liata a pahrâpa Khere phopi y, Nama hu a po na! Nâ, Kâna, Philistinâ râh y, Abeipa bie ta a châ dyuh; Râh liata a pahrâpa pakha hmah y khao leina taihta Ei cha pahleipadia aw.

⁶ Tilaipi kiah râh cha, Mietaku vaituhpazy pahrâna su châ aw ta, Mietaku ozy yna râh a châ aw.

⁷ Cha râh cha Zudâh pathla laibâhpazy ta ama hnei aw; Cha liata ama sahrohzy pasa aw ei ta, Zâlâ ta Askelaw ozy liata amâ zia tyh aw. Abeipa ama Khazohpa ta âmo cha pachâ aw ta, Vânoh a patosa heih aw ei.

⁸ “Môabâ ta reipachhiena bie a reipa thei na ta, Amawna mo ta pasipasawhna bie ama reipa ei thei; Ei phopi cha reipachhie ei ta, Ama râh chô liata amâ palai thlu.

⁹ Chavâta ei hrona reipa ta ei reih,” Pheisaihzy Abeipa, Izarei Khazohpa ta a tah. “Môabâ cha Sawdawmâ hawhta châ aw ta, Amawna mo cha Kawmawrâ hawhta ama châ aw; Sipopa su nata alôh khaoh lâta a lie aw ei ta, Chhâzaw ta roryhrapa ta ama y aw. Ei phopi laibâhpazy ta âmo cha hrao aw ei ta, Ei râh liata a hroh tlakaihpazy ta Ama râh cha ryu ta ama to aw.

¹⁰ Amâ palaina vâta, Cha cha ama tovyuh a châ aw; Pheisaihzy Abeipa phopi reipachhie ei ta, Amâ palai thlupa vâta.

¹¹ Abeipa cha âmo châta chi a chhih ngaita aw ta, Lei khazoh zydua cha, Nodi dâhphipa ta a soh khai aw ei. Phopi to ta ama râh chyu liata A hmiakô liata amâ bôh aw.

¹² “Nâmo, Kusi mo chhao, Ei zaozi ta thiepa nama châ aw.”

¹³ Maw lâ râh chô liata a ku hy aw ta, Asuria râh a parao aw; Ninivâ khihpi roryhrapa ta tao aw ta, Râhchâwhpa hawhta a chawhkarai aw.

¹⁴ Sahroh zawzy a chhôh liata a byu aw ei ta, Râhsa tozy ta amâ byu aw. A otôh lakizy liata vaku nata raawhzy a rie aw ei ta, Ama sâpa pyu ta ochhizy a khaipahlie aw; Chhikao thabyzy cha o keina ta bie aw ta, Sidy thozy â thyvawh hôlô aw.

¹⁵ He he khihpi haosai pha kawpa, Thlalôhpa ta y ta a palôh liata, “Keima, keima hleikhô ta ahy ma a y?” A tahpa khihpi kha châ vei ma? Kheihtazieta ma ziahzirohpa ta y ta, Râhsazy lôpu lâta a liepa ta, A chapiapa maihta ama hmaotô chie ei ta, Ama ku ama chatho thlupa a vaw châ thlâh ha tly i!