ZEKARIA 9 - Mara Bible RV (BSI)

Izarei chariahpazy pachiana

¹ Abeipa aluahna bie ta Hâdarâh râh a dyuh ta, Dâmaskâ cha â pahâna su a châ. Abeipa mokhaoh cha chyhsapa chô liata a choh ta, Izarei chi zydua chô liata â choh thlâh haw.

² Ama râhri liata a ypa Hâmathi chô liata chhao a choh ta, Tyre nata Sidaw chô liata chhao â choh thlâh haw, Ama so kaw tarawpa ta.

³ Tyre cha thokhy a taopa ta, Dohlei hawhta tâkâ pathlu ta, Khiliah chiatlao hawhta ngôh a pathlu.

⁴ Châhrasala moh teh u, Abeipa ta a hneipazy a lapa aw; Tilaipi liata a thatlôna parao aw ta, Mei ta a kâ khai aw.

⁵ Askelaw ta cha cha hmô aw ta, A chi kaw aw; Kâza chhao ta hmô aw ta, Pasa tah ngaitapa ta â taikalô aw; Ekaraw chhao â taikalô hra aw, A hnabeiseihna a lei hapa vâta. Kâza cha abeina pahlei aw ta, Askelaw liata chyhsa pahrâ khao aw veih ei.

⁶ Kâpiapazy ta Asadô khih pahrâ aw ei ta, Philistia mo apalaikheipa chhao, Ei chhawh pathlah aw.

⁷ A pakah tawhta a thisaih thy aw na ta, A hâh tho tawhta hmo pasichhihpazy ei thaoh aw. Ano chhao eima Khazohpa châta laibâhpa châ aw ta, Zudâh chi liata pho kha hawhta a châ aw; Ekaraw chhao Zebu mo hawhta a vaw châ aw.

⁸ Hrâsiepazy tawhta vaih awpa ta, Ei o liata riehmo ei paryh aw; Chatanachata ama siena lâta tlyma, Amâ liena lâta tlyma, A siehnaopa y khao aw veih ei. Tahmâ cha keima mo tlai ta ei vaih ha awpa vâta, Tlybaituhpa ta sie thlu khao aw vei.

Zaio Bei a vaw tlô hai

⁹ Hy Zaio sawchanô, thapha ngaitapa ta y la, Hy Zerusale sawchanô, thata awh teh! Moh tua, na bei cha nâ lâta â vy hai; Mosiapa nata pachhatuhpa a châ; Areisipa ta alâ vaw kiah ta, Alâtaw, alâ panô taw tlai vaw kiah ta â vy.

¹⁰ Epharai tawhta talailih chhawh pathlah aw na ta, Zerusale tawhta adyuhna arâ ei chhawh pathlah aw; Adyuhna libaw thlie pachhôpa châ aw ta, Phopizy hnohta adyhna bie a phuah aw; A ryureina cha tilaipi tawhta tilaipi taihta châ aw ta, Chavah tawhta khizaw kaokih chhâna taihta a châ aw.

¹¹ Nâma kyh liata chhao, Na hnohta ei hraipa ei biehrai thisaih vâta, Na chyhsa atâhpazy cha, Ti y leina khaohtlô tawhta ei thaoh papua aw ei.

¹² Hnabeiseihna a hneipa atâhpazy saih u, Nama thokhy lâ kua teh u; Tanoh tlai ta ei phuah, A lie no ta ei cha thô aw ei.

¹³ Zudâh cha ei libaw châta a kei na ta, Epharai cha a châtai ta ei tao haw. Hy Zaio, na sawchapawzy ei pathyu aw, Hy Krikâh, na sawchapawzy ei dyuh aw, Pasaipha zaozi hawhta ei cha pahieh aw.

Abeipa ta a phopi a pachha aw

¹⁴ Abeipa ama chô liata a vaw luah aw ta, A châtai dôhla hawhta a pathli aw; Abeipa Zehôvâh ta chiahmie tô aw ta, Chho khisôzy chhaota hrâ a sie aw.

¹⁵ Pheisaihzy Abeipa ta âmo cha vaih aw ta, Cheisiah lôzy hmâpa ta ama chariahzy pahnie aw ei ta, Ama parao aw; Doh aw ei ta, Kresawhti paripa hawhta ama palopasah aw; Biebuh hawhta ti ta pabiepa châ aw ei ta, Maisâh kizy hawhta dâ kaniehpa ta ama y aw.

¹⁶ Cha noh liata, A phopi mietaku zaw hawhta, Abeipa ama Khazohpa ta Âmo cha a pachha aw ei; Chatanachata beilakho liata lôsôhpazy hawhta, A râh liata ama khaih aw.

¹⁷ Kho amâ chhih awpazie nata amâ ngia awpazie rimâ cha! Kôvei phapa ta satliazy pasosâhsa aw ta, Kresawhti thiehpa ta laihsazy a pasosâhsa aw.