ZEKARIA 8 - Mara Bible RV (BSI)

Zaio sivâphana nata thlalôhna

¹ Pheisaihzy Abeipa bie ei hnohta vaw tlô heih ta.

² “Pheisaihzy Abeipa ta hetana heta a tah: Zaio cha hiatliana pasa ngaitapa ta ei hia na tlia ta, pathiiana ru ngaitapa ta ei hia eina tlia.

³ Abeipa ta hetana heta a tah: Zaio lâ kua aw na ta, Zerusale liah liata ei pahrâ aw. Chatanachata Zerusale cha Khihpi Ngâchhihpa tahpa ta bipa châ aw ta, Pheisaihzy Abeipa tlâh cha Tlâh Pathaihpa tahpa a châ aw.

⁴ Pheisaihzy Abeipa ta hetana heta a tah: Pawpi nôpipazy Zerusale tlyliahzy liata a tyuh heih aw ei ta, kô uhthei ngaitapa ama châpa vâta chôchahrei a chhypa ta amâ tyuh hôlô aw.

⁵ Khihpi tlyliahzy cha a palaopalâpa chapaw hawti nata chanô hawtizy ta ama bie heih aw.

⁶ Pheisaihzy Abeipa ta hetana heta a tah: Kha daihti nota, he phopi laibâhpa châta hmotheileipa a lyupa kha, keima châta cha hmotheileipa a châ hlei rai ma? Pheisaihzy Abeipa ta a tah.

⁷ Pheisaihzy Abeipa ta hetana heta a tah: Moh teh u, ei phopi cha nochhi râh nata notla râh zy tawhta pachha aw ei na ta,

⁸ Zerusale liah liata pahrâ awpa ta ei vaw chhi heih aw ei. Ei phopi châ aw ei ta, kei ama Khazohpa ei châ aw, ama Khazohpa ngâchhihpa nata siapa ei châ aw.”

⁹ Pheisaihzy Abeipa ta hetana heta a tah: “Nâmo, tahmâ nota hrohsopazy pakah tawhta a puapa biezy a thei tyhpazy saih u, nama ku thapatlô teh u. He hrohsopazy he Achhyna o, Pheisaihzy Abeipa o lôbô bô nota a y hrapazy ama châ.

¹⁰ Kha daihti hlâta cha, chyhsazy châta hria hlao hmô nawpa y leipa ta, sahrohzy châta chhao, hria hlao hmô nawpa y vei. Âmo nata âmo ei padyuhsa khai hapa vâ ei ta, chariahpazy tawhta a boh leipa ei ta, ama tao awpazy thlalôhpa ta tao thei veih ei.

¹¹ Tahmâ deikua cha, he phopi laibâhpazy chô liana heta, kha hlâta ei vaw taopa hawhna khata tao khao aw va na,” Pheisaihzy Abeipa ta a tah.

¹² “Thlalôhna chi tupa a châ bâ aw. Kre zôh ta a thei papua aw ta, chhaohlei ta kôvei papuapa ta, avâ ta diati a patlasa aw. He hmo zydua he phopi laibâhpazy hnohta ama ryuto châta ei pie aw ei.

¹³ Hy Zudâh pathlazy nata Izarei pathlazy saih u, phopizy hry liata chhiesana bie châta hmâpa vaw châ tyh hra u la, tahmâ cha cha pachha aw ei na ta, byhnâ nama châ bâ aw. Chi leipa u la, nama ku tha patlô teh u!”

¹⁴ Pheisaihzy Abeipa ta hetana heta a tah: “Châ pathlatuhpazy ta ei hie eina pahâh no ei kha, nama chô liata chhiena patlôsa khâchâ a vaw chhuah na ta, ei palôh panano va na,” Pheisaihzy Abeipa ta a tah.

¹⁵ “Tahmâ deikua cha Zerusale nata Zudâh pathlazy chô liata hmo pha tao heih awpa ei chhuah haw. Chi khah u!

¹⁶ Hezy he nama tao awpa hmozy cha a châ: Biedopa a chho raihrie u la, adyhna a tlôkhei awpa pachiana dopa ta nama hawkazy liata ryureih teh u.

¹⁷ Nama vaih chhie nawpa kyh nama palôh ta patuapalua leipa u la, haipa ta bie a taihpa hmâh khah u. He zydua he ei hao,” Abeipa ta a tah.

¹⁸ Pheisaihzy Abeipa bie ei hnohta vaw tlô heih ta.

¹⁹ “Pheisaihzy Abeipa ta hetana heta a tah: Thla palihna kâhvileina, thla pangawhna kâhvileina, thla sarina kâhvileina nata thla hrawhna kâhvileina daihtizy he alyna nata thaphana lâta a lie aw ei ta, Zudâh châta alyna kyhchhizy lâta amâ lie aw. Chavâta adona nata adyhna pasô muh vy.

²⁰ “Pheisaihzy Abeipa ta hetana heta a tah: Phopizy nata khihpi hluhpi liata a pahrâpazy a vy aw ei ta,

²¹ khihpi miakha liata a pahrâpazy ta khihpi hropa lâ sie aw ei ta, ‘Abeipa khokheina hia awpa ta thlai sie ei sih la, Pheisaihzy Abeipa pado ei suh u. Kei chhao ei sie hra aw,’ ama tah aw.

²² Chatanachata Pheisaihzy Abeipa pado ta, a khokheina hia awpa ta, phopi hluhpi nata râh thatlôpa hluhpizy cha Zerusale lâ amâ vy aw.

²³ Pheisaihzy Abeipa ta hetana heta a tah: Cha nohzy liata, râh to nata reih to tawhta chyhsa pahrawhzy ta Zu chyhsa pakha cha a poh pai patupa ta, ‘Khazohpa nama hnohta a y tahpa thei ha pi ta, chavâta nama hnohta bâh sie hra ei suh u,’ ama tah aw.”