ZEKARIA 6 - Mara Bible RV (BSI)

Talailih miapalihpa aluahna

¹ Avâ lâ kaw moh heih na ta, talailih miapalih cha tlâhpi miano likawh tawhta amâ vy haipa hmô na ta. Tlâhpizy cha dawh tlâhzy ama châ.

² Talailih miakhana liata arâzy cha a saihpa châ ei ta, talailih mianona liata arâzy cha a vyhpa châ ei ta,

³ talailih miathôhna liata arâzy cha a râhpa châ ei ta, talailih miapalihna liata arâzy cha arâ peipa a chapaipazy ama châ. Ama zydua ta arâ thatlô ngaitapa sai ama châ.

⁴ Bie nâ chhotuhpa vâlyuhchâpa hnohta, “Ei zibeipa, khizy khi khâpa tahna ma ama châ tly?” tah na ta.

⁵ Vâlyuhchâpa ta, “Kha talailihzy kha, khizaw zydua Bei hmiakô liata amâ lâ khai tawhta, avâ thlih miapalihpazy lâta a siepazy ama châ.

⁶ Arâ vyhpa talailih kha maw râh lâ sie ta, arâ râhpa talailihzy ta âmo cha pazi ta, arâ peipa a chapaipa talailih cha chho râh lâ a sie,” tahpa ta nâ chhy ta.

⁷ Arâ chahrapazy cha vaw pua ei ta, sie ta khizaw chahryh awpa a ngiatiah leipa ei ta. Vâlyuhchâpa ta, “Sie u la, khizaw zydua chahryh khai teh u,” tah ta. Chatanachata khizaw zydua cha chahryh khai ei ta.

⁸ Chatawhcha Vâlyuhchâpa ta ei hnohta, “Moh teh, maw râh lâta a siepazy khata, maw râh liata ei Thlahpa ama pahâsa haw,” tahpa ta na chho ta.

Lakho nata Achhyna o

⁹ Abeipa bie ei hnohta vaw tlô ta,

¹⁰ “Babylaw seichâna tawhta a vaw kuapa Hedai, Tôbia nata Zedai zy tawhta tâkâ nata ngôh la la, cha noh lilaw ta Zephania sawchapawpa Zôsia o lâ vawh mah y.

¹¹ Tâkâ nata ngôh zy cha cheih la, beilakhozy tao aw chi ta, Zehôzadâ sawchapawpa theihthai beichaipa Zawsua luh liata na pakho aw.

¹² A hnohta, ‘Pheisaihzy Abeipa ta hetana heta a tah: Moh teh, Chhyh tahpa ta moh bipa chyhsa cha, a yna su tawhta a chhyh kaw thao aw ta, ano ta Abeipa Achhyna o a sa aw.

¹³ Ano ta Abeipa Achhyna o cha sa aw ta, bei chysia ta tobipa châ aw ta, a beichyuchhai liata a tyuh aw ta, ryu a reih aw. Theihthaipa chhao ano beidyuchhai liata a tyuh hra aw ta, ama pano likah liata a dyryhna a y aw,’ tahpa ta na chho aw.

¹⁴ Beilakhozy cha Hedai, Tôbia, Zedai nata Zephania sawchapawpa Zôsia zy atheithlâhna châta Abeipa Achhyna o liata khâ a y awpa a châ.

¹⁵ “Lâhlapi liata a ypazy a vy aw ei ta, Abeipa Achhyna o sana liata amâ hlao hra aw. Chatanachata Pheisaihzy Abeipa ta nama hnohta eina tuah tlai tahpa nama pahno aw. Abeipa nama Khazohpa bie pakhâta ta nama zyh khiahta la, he hmozy he a vaw tlô aw,” tah ta.