ZEKARIA 5 - Mara Bible RV (BSI)

Châbu chatypa â zawpa aluahna

¹ Avâ lâ kaw moh heih na ta, châbu chatypa a zaw ngâpa hmô na ta.

² Ano ta, “Khâpa ma na hmô” na tah ta. Kei ta, “Châ chatypa a zaw ngâpa, a doh lâ dy kih seih ta a hâ lâ dy hrawh a kawhpa ei hmô” tah na ta.

³ Ano ta ei hnohta, “Kha kha alei chô zydua a chahryh awpa chhiesana a châ. Châbu chatypa phiapa hmia lâ liata ropa hawhta, parutuhpa maih hriepa châ aw ei ta, châbu chatypa phiapa hnôh lâ liata ropa hawhta, haipa ta bie a taihpa chhao hriepa a châ hra aw,” tahpa ta na chho ta.

⁴ “Chhiesana cha tuah aw na ta, parutuhpa o a ngia aw ta, haipa ta ei moh ta bie a taihpa ochhôh chhao â ngia aw. Ama o liata y aw ta, tho nata lô zydua a tlô khaina taihta a kâ khai aw,” Pheisaihzy Abeipa ta a tah.

Hrâbyh chhôh liata chanô aluahna

⁵ Bie nâ chhotuhpa vâlyuhchâpa kha hmia lâ vaw pua ta ei hnohta, “Avâ lâ ua la, a vaw pua ngâpa hmo khi khâpa ma a châ tahpa moh teh,” tah ta.

⁶ Kei ta, “Khi khi khâpa ma a châ tly?” tah na ta. Ano ta, “Kha kha panuana hrâbyh châ ta, a râh pôhpalôhpa liata ama paraona a châ,” tahpa ta nâ chhy ta.

⁷ Ky ta taopa hrâbyh chhiehru cha pahypa châ ta, moh teh u, panuana hrâbyh chhôh lia tlai cha chanô pakha â vaw tyuh thlâh ha ta!

⁸ Ano ta, “He he moleina cha a châ,” tah ta, chanô cha hrâbyh chhôh lâ za nâ ta, ky ta taopa chhiehru ta hrâbyh paka cha pamai ha ta.

⁹ Chatawhcha avâ lâ uapa ta kaw moh heih na ta, chanô pano thlih liata ama mathlaw ta a vaw zaw ngâpa hmô ei na ta. Ama mathlaw cha vawpô mathlaw nata a lyu ta. Hrâbyh cha alei nata avâ likawh liata chalo ei ta.

¹⁰ Bie nâ chhotuhpa vâlyuhchâpa hnohta, “Khataih lâ ma hrâbyh khi ama siekhei aw?” tah na ta.

¹¹ Ano ta, “Babylaw râh lâ ama siekhei aw. Cha liata ano châta achhyna o sapa aw ei ta, patlôpa a châ tita, hrâbyh he â tyu nawpa su liata sopa a châ aw,” tah ta.