ZEKARIA 4 - Mara Bible RV (BSI)

Ngôh meiôh tôh aluahna

¹ Chatawhcha bie nâ chhotuhpa vâlyuhchâpa kha vaw kua ta, chyhsa â môpa pahrapa hawhta na vaw pahra ta.

² “Khâpa ma na hmô?” na tah ta. Kei ta, “Ngôh suapa ta taopa meiôh tôh, a pawhmao liata a beikoh y ta, beikoh tawhta pâthao miasari kaw pua ta, cha chô liata meiôh miasari a ypa hmô na ta,

³ beikoh kiapâh chavei chachâh ta ôli tho kô no â duahpa chhao ei hmô,” tah na ta.

⁴ Chatawhcha bie nâ chhotuhpa vâlyuhchâpa hnohta, “Hezy he khâpa maw, ei zibeipa?” tahpa ta hiahri na ta.

⁵ Bie nâ chhotuhpa vâlyuhchâpa ta, “Hezy he khâpa ma ama châ tahpa pahno va chi ma?” na tah ta, kei ta, “Pahno va na, ei zibeipa,” tah na ta.

⁶ Ano ei hnohta: “He he Zerubâbe châta Abeipa bie a châ: ‘Thatlôna vâta châ leipa ta, biehneina vâta châ hra leipa ta, ei Thlahpa ta tlao châ mawh sy,’ Pheisaihzy Abeipa ta a tah.

⁷ Hy tlâhpi laipa, khâ ma na châ hlei tly? Zerubâbe hmia liata la pahnaipa ta paby khaipa na châ aw. Alô pha chaipa vaw tlôkhei aw ta, ‘Â ngia tlai na, â ngia tlai na’ tahpa ta awh aw ei ta ama dy aw,” tah ta.

⁸ Abeipa bie ei hnohta vaw tlô heih ta:

⁹ “He o pathaona lôbô he Zerubâbe ku ta bôpa châ ta, ano ku ta a patlô aw. Chatanachata Pheisaihzy Abeipa ta nama hnohta eina tuah tahpa nama pahno aw.

¹⁰ A nawraih kawpa ta pathao daihti a mohnao kawpazy khata, Zerubâbe ku liata thliena ri ama hmô tita la, amâ ly ngaita aw. Kha mokhaoh miasaripazy kha, alei chô zydua a hmô pahlie khaipa Abeipa mozy ama châ,” tah ta.

¹¹ Chatawhcha kei ta a hnohta, “Meiôh tôh kiapâh chavei chachâh liata ôli tho kô nopazy he zaw, khâpa tahna ma a châ tly?” tah na ta.

¹² “Ôli tho kih liata a chiah mianopazy tawhta ngôh pâthao mianopazy siepahliepa ta, meiôh châta ngôh sathaw a kaw puapa he khâpa ma a yzie,” tahpa ta hiahri via na ta.

¹³ Ano ta, “Hezy he khâpa ma ama châ tahpa pahno va chi ma?” na tah ta, kei ta, “Ei zibeipa, pahno va na,” tah na ta. Ano ta,

¹⁴ “Hezy he khizaw zydua liata Abeipa a chakao awpa sathawthupa panozy ama châ,” tahpa ta na chho ta.