ZEKARIA 3 - Mara Bible RV (BSI)

Theihthai beichaipa Zawsua aluahna

¹ Chatawhcha Abeipa vâlyuhchâpa hmiakô liata â duahpa theihthai beichaipa Zawsua nata ano leih awpa ta a chachâh lâta a duahpa Sâtâ na pahmô ta.

² Abeipa ta Sâtâ hnohta, “Nâ Sâtâ, Abeipa ta a cha ra! Zerusale a tlyhtuhpa Abeipa ta a cha ra! Kha chyhsa kha mei tawhta thothu a daophipa châ vei ma?” tah ta.

³ Zawsua cha chysia puapazy a kypa ta vâlyuhchâpa hmiakô liata a duah ta.

⁴ Vâlyuhchâpa ta, Zawsua chakaotuhpazy hnohta, “A chysia puapazy kha pahluhpa teh u,” tah ta. Zawsua hnohta, “Moh teh, na moleina ei cha lapa haw. Chysia rônahpazy ta ei cha tobi aw,” tah ta.

⁵ Chatawhcha kei ta, “A luh liata khutho pathaihpa pakhu teh u,” tah na ta. Chatanachata ama kiah liata Abeipa vâlyuhchâpa â dua thlâh no tlai ta, a luh cha khutho pathaihpa ta pakhu ei ta.

⁶ Abeipa vâlyuhchâpa ta Zawsua cha â i kawpa ta bie a taih ta,

⁷ “Pheisaihzy Abeipa ta hetana heta a tah: Ei lâpizy a chhihpa ta, ei biepiepazy na zyh khiahta cha, ei o liata ryurei aw chi ta, ei dôhpachhôh tlyhmia liata chhao biehnei aw chi ta, he liata chakaotuhpazy hry liata su ei cha pie aw.

⁸ Hy Zawsua, theihthai beichaipa y, tahmâ na thlie la, na hmiakô liata a tyuhpa, theihthaipa na châ lâhpazy chhao ta nathlie mawh ei sy. Âmo cha hmo vaw tlô awpa ngianazy ama châ. Moh teh, Chhyh a vaw chhi aw na ta, ano cha nâ chakaotuhpa a châ.

⁹ Zawsua hmiakô liata alô ei sopa he a phapa ta ngia teh u, mokhaoh miasari a hneipa alô a châ. A chô liata bie roh aw na ta, he râh moleinazy he noh kha chhôh ta ei pahlei khai aw.

¹⁰ Cha noh liata cha, chyhsa to ta nama kre zôh nata theiku buh ry liata a tyuduah khoh awpa ta, nama opa lyuhrizy nama hrua tyh aw,” Pheisaihzy Abeipa ta a tah.