ZEKARIA 2 - Mara Bible RV (BSI)

Thliena ri a chabapa aluahna

¹ Chatawhcha avâ lâ kaw moh na ta, chyhsa pakha a ku liata thliena ri a chabapa hmô na ta.

² “Khataih lâ na sie aw?” tah na ta. Ano ta, “Zerusale doh nata hâ thlie awpa ta Zerusale lâ ei sie aw,” tah ta.

³ Chatawhcha bie nâ chhotuhpa vâlyuhchâpa kha pua ta, vâlyuhchâpa hropa ta ano a tyh awpa ta a vy ta,

⁴ a hnohta, “A râ la, kha thyutliapa hnohta, ‘Zerusale cha a chhôh liata a pahrâpa chyhsa nata sahrohzy ama hluh ngaita awpa vâta, thokhy ta dôh byuh leipa khihpi châ aw ta,

⁵ keima tlai he Zerusale châta mei thokhy châ aw na ta, a chhôh liata a rônahna ei châ aw,’ Abeipa ta a tah tahpa ta kei chho teh,” tah ta.

Seizy puana

⁶ “Pua teh u! Pua teh u! Avâ thlih miapalih hawhta cha vaw hiepatla ha hra ei sah la, maw lâ râh tawhna khata a râ syulyu ha teh u,” Abeipa ta a tah.

⁷ Hy Zaio, a râ la; nâ Babylaw sawchanô hnohta a pahrâpa y, a râ syulyu ha mah y.

⁸ Châ hraotuhpazy râh lâ a rônahna ta nâ tuahtuhpa Pheisaihzy Abeipa ta hetana heta a tah: “Nâ châ hriapa cha ei mosaw a hriapa a châ.

⁹ Pachâ teh u, ama chô liata ei ku hy aw na ta, âmo seizy tlai ta ama hrao aw. Chatanachata Pheisaihzy Abeipa ta eina tuah tahpa nama pahno aw.

¹⁰ “Hy Zaio Sawchanô y, awh la, a ly teh! Moh teh, ei vy hai, na hnohta ei pahrâ aw,” Abeipa ta a tah.

¹¹ “Cha noh liata phopi hluhpi ta Abeipa a pazao aw ei ta, ei phopi ama châ aw. Na hnohta pahrâ aw na ta, Pheisaihzy Abeipa ta na hnohta eina vaw tuah tahpa na pahno aw.

¹² Abeipa ta Zudâh cha Râh Pathaihpa liata a ryu patosa aw ta, Zerusale cha â tlyh heih aw.”

¹³ Chyhsapa zydua saih u, Abeipa cha a pahrâna su pathaihpa tawhta kaw thyu ha ta, chavâta a hmiakô liata sidiapa ta y muh vy.