ZEKARIA 14 - Mara Bible RV (BSI)

Abeipa Noh a vaw tlô hai

¹ Moh teh u, ama cha hraona hmozy nama hry liata amâ rai nawpa daihti Abeipa noh cha a vaw tlô hai.

² Zerusale a dyuh awpa ta phopi zydua ei pahmaoh aw. Khihpi lapa châ aw ta, ozy hraopa a châ aw. Chanôzy patupakhipa ta ama y aw. Khihpi khophie seichâna râh lâ sie aw ei ta, phopi laibâhpazy deikua cha, khihpi tawhta chhawh pathlahpa châ aw veih ei.

³ Cha khai tawhta Abeipa cha vaw pua aw ta, adyuhna noh liata â dyuh tyhpa hawhta, phopizy cha â dyuh aw ei.

⁴ Cha noh liata, Zerusale kiah nochhi lâta a ypa Ôli Tlâh liata a phei tlypa ta a duah aw ta, Ôli Tlâh cha nochhi nata notla ta a liah liata a patlaw aw ta, saikao kawh ngaitapa a tao aw. Tlâh khophie maw lâta a pasie aw ta, â khophie chho lâ â pasie aw.

⁵ Tlâhpi saikaozy cha Aze taih a tlôpa vâta, ei tlâhpizy saikao lâ a râ aw ei chi ta, Zudâh bei Uzia â bei nota alosihpa vâta namâ râpaipa hawhna khata namâ râ aw. Chatawhcha Abeipa ei Khazohpa cha a vy aw ta, a mopathaihpa zydua chhao ano hnohta amâ vy aw.

⁶ Cha noh liata, khaihpa y leipa aw ta, chasipa tlyma, dâhaw tlyma y hra aw vei.

⁷ Abeipa deita ta a pahnopa noh nano kawpa y aw ta, chhô y leipa aw ta, zâ chhao y aw vei. Zâlâ daihti liata deikua cha khaihpa a vaw y aw.

⁸ Cha noh liata, Zerusale tawhta hrona tizy loh papua aw ta, â khophie nochhi tilaipi lâta loh aw ta, â khophie notla tilaipi lâta a loh aw. Nopi daihti nata chasipaw daihtizy liata chhao a loh lymâ aw.

⁹ Abeipa cha alei chô zydua liata Bei a châ aw. Cha noh liata, Abeipa pakha deita y aw ta, a moh chhao moh kha dei a châ aw.

¹⁰ Râh zydua cha Kebâ tawhta Zerusale chho lâta a ypa Rimô taihta paby khaipa a châ aw. Zerusale deikua cha, Benzami Chhikao tawhta chhikao hmiatuapa Achaki Chhikao taihta nata Hânane Osâhpa tawhta bei kresawhti saohna taihta, a y tyhna su liata pasâhpa a châ aw.

¹¹ Cha liata chyhsa pahrâ aw ei ta, tlokhuh parao awpa ta biepiepa châ khao beih aw vei. Zerusale cha a bohpa ta a y aw.

¹² Zerusale a dyuhtuhpa phopizy cha, Abeipa ta he potlana heta a hrie aw ei: Ama phei ta amâ dua thlah ha nota ama sapa zao aw ta, ama mokhaoh chhôh liata ama mo zao aw ta, ama pakah chhôh liata ama paleih a zao aw.

¹³ Cha noh liata, Abeipa tawhta tymâna lai ngaitapa ama chô liata tlô aw ta, tu awpa ta chyhsa to ta ama vaih ku patu aw ei ta, chyhsa to ta ama vaih chô liata ama ku ama hy aw.

¹⁴ Zerusale liata adyuhna liata Zudâh chhao a hlao hra aw ta, a chheipâh phopizy hneirôna ngôh, tâkâ nata chysia hluhpi pahmaohpa a châ aw.

¹⁵ He hawhpa potlana he arâzy, sabaituzy, râraoseihpazy, alâzy nata riehmo liata sahroh zydua chô liata chhao a tlô aw.

¹⁶ Zerusale a dyuhpa phopi zydua hry liata ahrohpa maih cha, Abeipa, Pheisaihzy Abeipa a naoh awpa nata Byureih Kyhchhi hmâ awpa ta, kô chareih ta Zerusale lâ ama khy tyh aw.

¹⁷ Alei chô liata phopi kheihawhpa rai ta, Abeipa, Pheisaihzy Abeipa a naoh awpa ta Zerusale lâ a khy leipa cha vâsua dao aw veih ei.

¹⁸ Izi chyhsazy ta khy leipa ta amâ luah leipa khiahta cha, vâsua dao aw veih ei. Byureih Kyhchhi chay awpa ta a khy leipa phopizy cha, Abeipa ta ama chô liata potlana a patlôsa aw.

¹⁹ Cha hawhna chata Izi nata Byureih Kyhchhi a chay leipa phopizy cha hriepa ama châ aw.

²⁰ Cha noh liata, arâ kaly liata “Abeipa châta Pathaihpa” tahpa ropa châ aw ta, Abeipa o liata thua beihzy cha maisâh hmia liata biebuh pathaihpa hawhta ama vaw châ aw.

²¹ Zerusale nata Zudâh liata thua beih zydua cha Pheisaihzy Abeipa châta a pathaihpa ama châ khai aw. Atheihna hlâ awpa ta â vypa zydua ta beihzy cha la aw ei ta, chho nawpa châta ama hmâh aw. Cha noh liata cha Pheisaihzy Abeipa o liata sôhpalietuhpazy y khao aw veih ei.