ZEKARIA 12 - Mara Bible RV (BSI)

Noh hro ta Zerusale pabohsa nawpazie

¹ He he Izarei kyh liata Abeipa bietapa a châ. Abeipa, avâzy a paraituhpa, alei a bôtuhpa nata chyhsapa chhôh liata thlahpa a taotuhpa ta hetana heta a tah:

² “Moh teh u, Zerusale cha a chheipâh liata phopi zydua châta parina nyu ta tao aw na ta, Zerusale dôhna liata Zudâh chhao dôh pâpa a châ aw.

³ Cha noh liata, Zerusale cha khizaw phopi zydua châta alô a hri ngaitapa ta tao aw na ta, a chalopa maih cha âmosasyh ta hmah amâ paphao lymâ aw. Chatawhcha khizaw râh zydua a paraoh aw ei ta, ano cha amâ dyuh aw.

⁴ Cha noh liata, arâ zydua ama no pamaoh aw na ta, a kiahpazy chhôh ei pazohsa aw. Zudâh pathlazy chô liata ei mo padeih aw na ta, phopizy arâzy deikua cha ama mo ei pachaosa khai aw ei.

⁵ Cha tina chata Zudâh chhituhpazy ta ama palôh liata, ‘Zerusale khihsawzy cha ama Khazohpa Pheisaihzy Abeipa vâta thatlôna ama hnei,’ ama tah aw.

⁶ “Cha noh liata, Zudâh chhituhpazy cha thoiah hry liata meithu a kâ ngâpa hawhta tao aw ei na ta, sapiahzy hry liata meirei hawhta ei tao aw ei. Chavei chachâh ta âmo a dôhpa phopizy cha kâ patlô khai aw ei ta, Zerusale cha a su liata, Zerusale lia tlai ta, â duah lymâ aw.

⁷ “Dâvi pathlazy nata Zerusale liata a pahrâpazy rônahna cha Zudâh rônahna hlâta a rônah via lei nawpa ta, Abeipa ta Zudâh poh o liata a pahrâpazy hnohta pahniena a pie tua aw ei.

⁸ Cha noh liata, Abeipa ta Zerusale liata a pahrâpazy pabohsa aw ta, ama hry liata chyhsa chiehlei chaipazy chhao, cha noh liata cha Dâvi hawhta châ aw ei ta, Dâvi pathlazy cha Khazohpa hawhta châ aw ei ta, ama hmia lâta a siepa Abeipa vâlyuhchâpa hawhta ama châ aw.

⁹ Cha noh liata, Zerusale adyuhpa phopi zydua pahleipadia khai awpa ta, ei siehnao aw ei.

¹⁰ “Chatawhcha Dâvi pathlazy chô liata nata Zerusale liata a pahrâpazy chô liata ngiachhiena nata zawngiahna thlahpa ei hry aw. Chatanachata ama hriechheih hapa kei he na moh aw ei ta, sawchapaw matlupa mâchhie sapa hawhta keima châta mâchhiesa aw ei ta, sawchapaw uhtheipa pahleipa hawhta thata ama vâ â sâh aw.

¹¹ Cha noh liata, Zerusale liata chaphôhtuna cha Mekidô by liata Hâdârimô chaphôhtuna tlu ta a rarôh a y aw.

¹² “Râh ta mâchhiesa aw ta, pho to ano eih ta mâchhie amâ sa chyu aw: Dâvi pathla phozy ano eih ta mâchhie sa aw ei ta, ama chanôzy ano eih ta mâchhie ama sa aw. Nâthâ pathla phozy ano eih ta mâchhiesa aw ei ta, ama chanôzy ano eih ta mâchhie ama sa aw.

¹³ Livai pathla phozy ano eih ta mâchhiesa aw ei ta, ama chanôzy ano eih ta mâchhie ama sa aw. Simei pathla phozy ano eih ta mâchhiesa aw ei ta, ama chanôzy ano eih ta mâchhie ama sa aw.

¹⁴ Pho hropa zydua chhao, ama pho chyu ta ano eih ta mâchhiesa aw ei ta, ama chanôzy chhao ano eih ta mâchhie ama sa chyu aw.”