ZEKARIA 11 - Mara Bible RV (BSI)

Abei nôchhiepazy paona

¹ Hy Lebanaw, na ochhizy pahy teh, Na sidy thozy mei ta a kâ khaina hâh ta.

² Hy Meisah thozy, cha teh u, Sidy tho a pao ha hih, Tho phapapazy ama rao ha hih! Hy Bâsanâ ôkâ thozy, cha teh u, Râhmâhpa â mua khai ha hih!

³ Ama sibie panyupa su phapazy a rao khai hapa vâta, Mietaku vaituhpazy chana ao theipa châ ta, Zawdâh râh panyupa a rao khai hapa vâta, Chakeibarôhneipazy a rôhpa pyu theipa a châ.

Mietaku vaituhpa pano

⁴ Abeipa ei Khazohpa ta hetana heta a tah: “Thie awpa ta raopa sahroh zaw cha mohôh teh.

⁵ A chaleituhpazy ta chado leipa ta thie ei ta, hriena a tyh hlei leipa ei ta. A zuahtuhpazy ta, ‘Ei hneirôh haw, Abeipa cha reithaipa ta y se!’ tah ei ta, âmo vaituhpazy dâhdei chhao ta ngiachhie veih ei.

⁶ “Chavâta râh liata a pahrâpazy cha ngiachhie khao aw veih ei na,” Abeipa ta a tah. Chyhsa to a vaih ku liata nata ano bei ku liata ei pie aw. Râh parao khai aw ei ta, châhrasala râh cha ama ku tawhta pachha aw va na.

⁷ Chavâta thie awpa ta raopa sahroh zaw cha pasa ei na ta, sahroh tlâhleipazy cha ei mohôh pachai ei. Chatawhcha chôchahrei miano la na ta, miakhapa cha a moh “Khokhei” bi na ta, ahropa cha “Pôhkha” ei bi. Cha hawhna chata sahroh zaw cha ei mohôh ei.

⁸ Châhrasala thla kha chhôh ta vaituhpa pathôh ei pabâh ha ei. Ama chô liata ei palôh chhâ kaw ta, âmo chhao ta eina ai kaw hra ei.

⁹ Chavâta mietakuzy hnohta, “Cha vaih khao aw veih ei na. A thi awpa cha thi ei sala, a lei awpa lei ei sala, ahrohpazy cha âmo nata âmo ta ama sa a nie mawh ei sy,” tah na ta.

¹⁰ Chatawhcha ei chôchahrei Khokhei cha la na ta, phopi zydua hnohta biehrai ei taopa ei phiena châta bo no ta thlie pachhô na ta.

¹¹ Cha noh ta biehrai cha phiepa a châ nahta, sahroh zaw hry liata a tlâhleipa nâ vaw moh thlâh hapazy ta, cha cha Abeipa Bie a châ tahpa pahno ha ei ta.

¹² Chatawhcha ama hnohta, “Pha nama tah khiahta cha, ei hlao na pie u la; nama tah vei khiahta cha, na pie khuh vy,” tah na ta. Chatanachata ei hlao châta tâkâ tlaw sythôh na pie ei ta.

¹³ Ei phuhpa hawhta ei ty pha kawpa eina piepa ei cha Abeipa ta, “Beihvituhpa kei pie teh,” na tah ta. Chatanachata tâkâ tlaw sythôh cha la na ta, Abeipa o liata beihvituhpa hnohta pie na ta.

¹⁴ Chatawhcha ei chôchahrei Pôhkha cha la na ta, Zudâh nata Izarei a unawhna phiena châta bo no ta thlie pachhô heih na ta.

¹⁵ Abeipa ta ei hnohta, “Mietaku vaituhpa hrupazy chhaichhi kei la heih teh.

¹⁶ Moh teh, aleipazy pahno leipa ta viavipazy a tlua leipa, hmahphaohpazy patlâh leipa ta tlâhleipazy a deichhy leipa, mietaku thawhpa sazy tlao nie khaipa ta ama chakiezy taihta a hriechheihpa mietaku vaituhpazy râh liata ei padua aw.

¹⁷ “Sahroh zaw a siesaipa Vaituhpa dyutlai leipa cha, A hu a po na! Zaozi ta a bâh chhawh sala, A mo chachâh lâ dy mawh sy! A bâh sy khai sala, A mo chachâh lâ tlokhuh chao mawh sy!” tah ta.