ZEKARIA 1 - Mara Bible RV (BSI)

Abeipa pangai awpa ta hruana

¹ Dâria abeina kô nona, thla chariena liata, Idô sawchapawpa Berekiah, Berekiah sawchapawpa hrohsopa Zekaria hnohta Abeipa bie vaw tlô ta:

² “Châ pathlatuhpazy chô liata Abeipa a hie a hâh ngaita.

³ Chavâta ama hnohta, Pheisaihzy Abeipa ta hetana heta a tah tahpa ta chho teh: ‘Kei lâ vaw kua teh u,’ Pheisaihzy Abeipa ta a tah; ‘Chatanachata kei chhao nâmo lâ ei vaw kua aw,’ Pheisaihzy Abeipa ta a tah.

⁴ Châ pathlatuhpazy hawhna khata y khah u. Hrohsopa hmiatuapazy ta, ‘Pheisaihzy Abeipa ta hetana heta a tah, nama moleina lâpi tawhta nata nama moleina hmotaopazy tawhta tahmâ vaw kua teh u,’ tahpa ta zikyu a râ ei ta, châhrasala nathlie leipa ei ta, na uasa hra veih ei,” Abeipa ta a tah.

⁵ “Châ pathlatuhpazy kha khataih liata ma tahmâ ama y? Hrohsopazy zaw, chhâzaw ta a hrohpa ama châ ma?

⁶ Nâ chakaotuhpa hrohsopazy hnohta ei biepiepa nata ei pachunazy ta châ pathlatuhpazy kha chhao ha veih ei ma? Chavâta âmo cha ro ei ta, ‘Eima taozie nata hrozie lymâ hawhta Pheisaihzy Abeipa ta eima chô liata tao a chhuah ta, a tao ha tlaipa a châ,’” ama tah.

Arâ a kiahpa aluahna

⁷ Dâria abeina kô nona, thla hrawh hleikhana, noh kih nata noh palihna noh, Shevat thla liata Idô sawchapawpa Berekiah, Berekiah sawchapawpa hrohsopa Zekaria hnohta Abeipa bie vaw tlô ta:

⁸ “Zâ ta aluahna hmô na ta, pachâ teh u, chyhsa pakha tlai cha arâ saihpa kiah ta, saikao liata mierâ thozy hry liata a duah ta, a hnôh lâta arâ saihpa, arâ peipa nata arâ râhpazy y ei ta.

⁹ Kei ta, ‘Ei Zibeipa, hezy he khâpazy ma ama châ tly?’ tah na ta. Bie nâ chhotuhpa vâlyuhchâpa ta, ‘Hezy he khâpazy ma ama châ tahpa ei cha pahmô aw,’ tah ta.

¹⁰ Chatawhcha Mierâ thozy hry liata â duahpa chyhsa ta, ‘Hezy he alei zydua vaih ta chahryh khai awpa ta Abeipa tuapazy ama châ,’ tahpa ta nâ chhy ta.

¹¹ Abeipa tuapazy chata mierâ thozy hry liata â duahpa Abeipa vâlyuhchâpa hnohta, ‘Alei chô zydua vaipa ta chahryh khai ha pi ta, pachâ teh, alei he sidiapa ta a thlalôh ngaita,’ tahpa ta a chhy ei ta.

¹² Abeipa vâlyuhchâpa ta, ‘Hy Pheisaihzy Abeipa, kô sysari chhôh zydua na palôh châ pachhie hapa Zerusale nata Zudâh khihpizy he, khachâ taih ma thapasa khao leipa ta na y aw tly?’ tah ta.

¹³ Abeipa ta bie nâ chhotuhpa vâlyuhchâpa cha, bie pha kawpa nata thlalôh chhih kawpa ta a chhy ta.

¹⁴ Chatawhcha bie nâ chhotuhpa vâlyuhchâpa chata, ‘Awh teh, Pheisaihzy Abeipa ta hetana heta a tah: Zerusale nata Zaio chô liata ei hiatlia a pasa ngaita.

¹⁵ A boh kawpa hawhta â pachâpa phopizy chô liata chhao ei hie a hâh ngaita. Hmiatua ta cha ei hiehâh tu vei, châhrasala âmo tlai ta moleina hmo ama tao via rili.

¹⁶ Chavâta Abeipa ta hetana heta a tah: Zawngiahpa ta Zerusale lâ kua heih aw na ta, cha liata ei o sapa châ aw ta, Zerusale chô liata thliena ri parai heihpa a châ aw,’ Pheisaihzy Abeipa ta a tah.

¹⁷ ‘Kei awh via heih teh, Pheisaihzy Abeipa ta hetana heta a tah: Ei khihpizy cha sivâphana ta khô pathlah heih aw ta, Abeipa ta Zaio cha thlah palôh heih aw ta, Zerusale â tlyh heih aw.’”

Sakizy nata zôthaipazy aluahna

¹⁸ Chatawhcha avâ lâ kaw moh na ta, saki ki palih hmô na ta.

¹⁹ Bie nâ chhotuhpa vâlyuhchâpa hnohta, “Hezy he khâpa maw?” tah na ta. Ano ta, “Hezy he Zudâh, Izarei nata Zerusale a papaituhpa sakizy ama châ hih” tahpa ta nâ chhy ta.

²⁰ Cha khai tawhta Abeipa ta zôthaipa papalih na pahmô heih ta.

²¹ Kei ta, “Hezy he khâpa tao awpa ta a vypa ma ama châ tly?” tah na ta. Ano ta, “Hezy he pakha hmahta a duah thei khao lei awpa ta Zudâh a papaituhpa sakizy kha ama châ. Ama ki ta Zudâh thua ei ta, a chyhsazy a papaituhpa râhzy cha ama kizy thlie pachhô ta ama thlah pazo awpa ta â vypa zôthaipazy ama châ hih,” tah ta.