ZAWSUA 9 - Mara Bible RV (BSI)

Kibiô mo ta Zawsua ama dôvei

¹ Zawdâh haosâ tlâh râh nata bypi nata Tilaipi Laipa ngiahkâ zydua liata Lebanaw taihta a ypa bei zydua, Hiti bei, Amawri bei, Kâna bei, Perizi bei, Hivi bei nata Zebu beizy ta Izarei sawzy thâtih ama thei nahta,

² â raohpa ta Zawsua nata Izarei a dyuh awpa ta a hmaohpakhy ei ta.

³ Châhrasala Kibiô khihsawzy ta Zerikô nata Ai khihpizy chô liata Zawsua hmotaopazy ama thei nahta,

⁴ piehpiepa ta hmotao ei ta. Sykhao nata kresawhti savo titheih chy karaopa, ahriepa nata baithlapazy ama alâzy paphaosa ei ta, lyuhchâpa hawhta a taopa ta Zawsua a kei tyh ei ta.

⁵ Pheiky chypa baithlapazy a ky ei ta, chysia parohpa ta a tobi ei ta, nie awpa ta amâ phaopa viahchhâzy chhao a chawhkaraipa nata a maohpazy a châ.

⁶ Chatanachata Kilkal liata riehmo paryhpa liata a ypa Zawsua lâ vawh ei ta, ano nata Izarei chyhsazy hnohta, “Râh hlapi tawhta a vypa châ pi ta, chavâta eima hnohta aryhna bie hraih teh u,” tah ei ta.

⁷ Izarei chyhsazy ta Hivi mo hnohta, “Eima hry liata a pahrâ hrapa nama châ thei mâh tâh. Kheihta ma nama hnohta aryhna bie eima hraih thei aw?” tah ei ta.

⁸ Âmo ta Zawsua hnohta, “Châ chakaotuhpazy eima châ,” tah ei ta. Zawsua ta ama hnohta, “Ahyzy ma nama châ? Khataih lâ tawhta a vypa ma nama châ?” tah ta.

⁹ Âmo ta a hnohta, “Châ chakaotuhpazy he Abeipa na Khazohpa moh vâta râh hlapi tawhta a vypa eima châ. A thâtih vaw thei pi ta, Izi râh liata a hmotaopa zydua nata

¹⁰ Zawdâh haosâ liata Amawri bei pano, Hesbaw bei Sihaw nata Astarô liata a ypa Bâsanâ bei Ôkâ chô liata a hmotaopa zydua eima thei.

¹¹ Chavâta eima machâzy nata eima râh chyhsa zydua ta eima hnohta, ‘Lâpi liata nie awpazy a phaopa ta, âmo a tyh awpa ta sie aw ei chi ta, ama hnohta, “Châ chakaotuhpazy eima châ. Eima hnohta aryhna bie hraih teh u,” nama tah aw,’ tahpa ta miah ama chho.

¹² Nâmo lâ a vy awpa ta eima o tawhta eima vaw pua nota, eima viahchhâzy he a sah hôlôpa ta a vaw phao pi ta, châhrasala tahmâ cha moh tua u, chawhkarai khai ha ta, a maoh khai ha hih.

¹³ Kresawhti savo titheihzy chhao he, eima ryh nota cha a thiehpa châ ei ta, moh tua u, a pyu khai ha hih. Eima chysia nata eima pheikyzy chhao, eima vaw siena â hla kawpa vâta ama chy khai ha hih,” tah ei ta.

¹⁴ Izarei sawzy ta viahchhâ cha nie pachhi ei ta, Abeipa pachâna deikua hiahri tua veih ei.

¹⁵ Chatanachata Zawsua ta âmo nata aryhna tao ta, pahlôh awpa ei ta ama hnohta bie hraih ta, zawpi hyutuhpazy chhao ta ama hnohta bie a taih ei ta.

¹⁶ Kibiô mo hnohta aryhna biehrai a tao tawhta noh thôh a châ nahta, ama chheipâh liata a ypa châ ei ta, ama hry liata a pahrâpa ama châpa pahno ei ta.

¹⁷ Izarei sawzy cha sie lymâ ei ta, noh thôhna noh ta Kibiô mo khihpizy kei tlô ei ta. Ama khihpizy cha Kibiô, Kephirâh, Berô nata Kiriaziari zy a châ.

¹⁸ Izarei zawpi hyutuhpazy ta Abeipa, Izarei Khazohpa moh reipa ta ama hnohta bie amâ vaw taih hapa vâta, Izarei sawzy ta Kibiô mo cha thie veih ei. Cha kyh liata zawpi zydua ta hyutuhpazy chô liata paphôh ei ta.

¹⁹ Hyutuhpazy ta zawpi zydua hnohta, “Zehôvah, Izarei Khazohpa moh reipa ta ama hnohta bie a vaw taih ha pi ta, chavâta âmo cha hria hraoh ma pi.

²⁰ Hetana heta ama chô liata tao sih la, pahlôh thlâh ha suh u. Chataleipatala ama hnohta bie a vaw taih ha tlôh pi ta, eima chô liata Abeipa hiehâhna a vaw tlô pathlei aw na,” tah ei ta.

²¹ Hyutuhpazy ta, “Pahlôh thlâh ha suh u. Anodeikua zawpizy châta tho pakhytuhpa nata ti thaihtuhpa ta ama y aw,” tah ei ta. Chatanachata hyutuhpazy reipa hawhta tao ei ta.

²² Zawsua ta Kibiô mo cha aw ta, ama hnohta, “Khazia eima hry liata a pahrâpa nama châpa tlai ta, ‘Lâhlapi tawhta a vypa na eima châ,’ tahpa ta miah nama dôvei?

²³ Chavâta chhiesapa nama châ haw. Sei châ kôzaw aw ei chi ta, ei Khazohpa o châta tho pakhytuhpa nata ti thaihtuhpa ta nama y lymâ aw,” tah ta.

²⁴ Âmo ta Zawsua cha a chhy ei ta, “Râh zydua he nâmo cha pie awpa nata râh liata a pahrâpa zydua nama hmiakô tawhta pahleipadia khai awpa ta, Abeipa na Khazohpa ta a chakaotuhpa Mawsi hnohta bie a pie tahpa a sia ngaitapa ta pahno pi ta, nâmo vâta eima hrona pahlei awpa eima chi ngaita. Chavâta kha hawhta eima taopa a châ.

²⁵ Moh teh, tahmâ na ku liata eima y hih. A phapa nata â dopa ta na pahnopa hawhta eima chô liata tao mah y,” tah ei ta.

²⁶ Chatanachata Zawsua ta pha a tahnazie hawhta tao ta, âmo cha Izarei sawzy ku tawhta pachha ta, Izarei sawzy ta thie khao veih ei.

²⁷ Cha noh ta Zawsua ta Kibiô mo cha zawpi châta nata Abeipa ta a maisâh y nawpa ta a raopa su châta tho pakhy awpa nata ti thaih awpa ta rao ta, cha hawhna chata tanoh taihta ama y.