ZAWSUA 8 - Mara Bible RV (BSI)

Ai khihpi paraona

¹ Abeipa ta Zawsua hnohta, “Chi leipa la, thlazohpa ta y hra khah y. Adyuhna lâ a sie thei awpa chyhsa zydua na hnohta a chhi la, thyu la, Ai khihpi lâ sie teh. Pachâ teh, Ai khih bei nata a chyhsazy, a khihpi nata a râh na ku liata ei cha pie haw.

² Zerikô nata a khih bei chô liata na taopa hawhna khata, Ai khihpi nata a khih bei chô liata chhao na tao aw. Ai khihpi liata deikua cha hraona nata sahrohzy namâ la thei aw. Khihpi cha a hnôh lâ tawhta namâ byh aw,” tah ta.

³ Chatanachata Zawsua nata pheisaih zydua cha Ai khihpi a dyuh awpa ta pua ei ta. Zawsua ta chyhsa thatlô riahphapa 30,000 a tlyh ta, âmo cha zâ ta pasiesa ta.

⁴ Ama hnohta, “Nathlie teh u, khihpi cha a hnôh lâ tawhta namâ byh aw. Khihpi tawhta â hlapi ta y leipa aw ei chi ta, nama zydua ta amâ chiehpa ta nama y awpa a châ.

⁵ Kei nata ei hnohta a ypa pheisaih zydua ta khihpi cha a vaw hnia aw pi ta, a hmiatuapa liata ama taopa hawhna khata miah a dyuh awpa ta vaw pua aw ei ta, ama hmiakô liata eimâ vaw râpai aw.

⁶ Miah a vaw chadai aw ei ta, khihpi tawhta â hlapi taih eimâ chadaisa aw. Âmo ta, ‘A hmiatuapa hawhna khata eima hmiakô liata amâ râpai ha heih hih,’ ama tah aw. Cha hawhna chata ama hmiakô liata eimâ vaw râpai aw.

⁷ Chatawhcha namâ byhna su tawhta vaw pua aw ei chi ta, khihpi cha nama chho aw. Abeipa nama Khazohpa ta nama ku liata a cha pie aw ei.

⁸ Khihpi nama lapa nahta, khihpi cha mei ta nama tô aw. Abeipa bie hawhta nama tao awpa a châ. Pachâ teh u, bie ei cha pie ei hih,” tah ta.

⁹ Chatawhcha Zawsua ta âmo cha pasiesa ta. Abyhna su lâ cha sie ei ta, Ai khihpi notla lâta Bethel nata Ai likawh liata y ei ta. Zawsua deikua cha, cha zâ cha zawpizy hnohta a rie ta.

¹⁰ Zawsua cha mydi kari ta thyu ta, zawpi awpakhy ta, ano nata lzarei machâzy cha Ai khihpi pangaipa ta zawpi hmia lâta sie ei ta.

¹¹ A hnohta a ypa pheisaih zydua khy ei ta, khihpi cha a kaw hnia ei ta, Ai khihpi maw lâ chhâh ta riehmo paryh ei ta. Ai khihpi nata ama likawh liata saikao y ta.

¹² Pheisaih 5,000 a chhi ta, khihpi notla lâ chhâh Bethel nata Ai likawh liata pabyhsa ta.

¹³ Khihpi maw lâta riehmo supipa liata a ypa pheisaihzy nata notla lâta a byhpa pheisaihzy cha, ama yna su chyu liata a phapa ta a paryh ei ta. Zawsua deikua, cha zâ cha saikao liata a rie ta.

¹⁴ Ai khih bei ta Izarei pheisaihzy cha a hmô nahta, ano nata a khihsawzy cha a parapa ta mydi ta thyu ei ta, Arabâ dady su raopa liata Izarei a dyuh awpa ta pua ei ta. Châhrasala khihpi hnôh lâ tawhta amâ vaw byhpa pahno leipa ta.

¹⁵ Zawsua nata Izarei saw zydua cha panawh hapa hawhta y pakhei ei ta, râhchawhpa lâpi lâta a râ ei ta.

¹⁶ Khihpi liata a ypa zydua Izarei sawzy a chadai awpa ta a awpakhy ei ta. Zawsua cha a chadai ei ta, khihpi tawhta lâhlapi taih a chadai ei ta.

¹⁷ Ai nata Bethel khihpizy liata Izarei sawzy achadaina lâ a pua leipa chapaw pakha hmah y veih ei. Khihpi khaw leipa ta puasaipa ta Izarei sawzy cha a chadai ei ta.

¹⁸ Chatawhcha Abeipa ta Zawsua hnohta, “Asei nâ chabapa kha Ai khihpi lâ dypa ta hy teh. Khihpi cha na ku liata ei cha pie aw,” tah ta. Zawsua ta asei â chabapa cha khihpi lâ dypa ta hy ta.

¹⁹ Abyhtuhpazy ta ama yna tawhta thlai vaw thyu ei ta, Zawsua ta a ku a pazawhpa nahta, a râ ei ta, khihpi liata a ngia ei ta. Khihpi cha la ei ta, mei ta thlai ama rao pâ haw.

²⁰ Ai chyhsazy cha hnoh lâ a heih ei ta, khihpi cha avâ lâta a khuh â charih haipa hmô ei ta. Râhchawhpa lâta a râpa Izarei sawzy ta âmo a chadaituhpa Ai chyhsazy cha amâ vaw lie hnao hapa vâta, Ai chyhsazy cha khataih lâ hmah a râ nawpa hnei khao veih ei.

²¹ Abyhtuhpazy ta khihpi cha la ei ta, khihpi meikhuh â charih haipa cha Zawsua nata Izarei saw zydua ta ama hmô nahta, a lie ei ta, âmo a vaw chadaipa Ai chyhsazy cha thie ei ta.

²² Khihpi a latuhpa Izarei pheisaihzy chhao, khihpi tawhta vaw pua ei ta, Ai chyhsazy cha a dyuh ei ta. Izarei pheisaihzy ta Ai chyhsazy cha dôh ei ta, thokha he lâ y ei ta, thokha hao lâ y ei ta. Izarei pheisaihzy ta Ai chyhsazy cha thie ei ta, ahrohpa tlyma, arâpa tlyma, pakha hmah y veih ei.

²³ Ai khih bei cha ahrohpa ta patu ei ta, Zawsua lâ a vaw chhi ei ta.

²⁴ Izarei sawzy ta Ai khihpi chyhsa zydua cha amâ vaw chadaina lyurâhpa nata râhchawhpa suzy liata thie ei ta, ama zydua ta zaozi ta ama thie khai nahta, Izarei saw zydua cha Ai khihpi lâ a lie ei ta, khihpi chhôh liata a ypazy cha zaozi ta thie ei ta.

²⁵ Cha noh liata a thipa Ai chyhsa zydua cha chanô chapaw ta 12,000 ama châ.

²⁶ Ai khihpi chyhsa zydua a pahleipadia khai hlâlei, Zawsua ta asei chabapa ta a ku a pazawhpa pathla vei.

²⁷ Abeipa ta Zawsua hnohta bie a piepa hawhta, khihpi liata sahroh nata hmo a ypazy deita Izarei sawzy ta hraona sôh ta amâ la.

²⁸ Zawsua ta Ai khihpi cha mei ta rao ta, chhâzaw ta alei byuhpa ta y awpa ta tao ta, tanoh taihta roryhrapa ta a y.

²⁹ Ai khih bei cha zâlâ taih thokô liata pangieh ta, noh a tla nahta Zawsua ta biepie ta, a ri cha thokô tawhta la ei ta, khihpi angiana thokhy chhikao liata thy ei ta, a chô liata alô hluhpi pacho thlu ei ta, cha cha tanoh taihta a y thlâh haw.

Ebâ Tlâh liata biehrai pathiehna

³⁰ Chatawhcha Zawsua ta Ebâ Tlâh liata Abeipa Izarei Khazohpa châta maisâh tao ta.

³¹ Abeipa chakaotuhpa Mawsi ta Izarei sawzy hnohta bie a piepa, Mawsi ryhpa châbu liata ropa hawhta, alô khai leipa, ahy ta hmah thua chaihrai ama hmâ thlu leipa alô ta maisâh cha a tao. Cha liata Abeipa lâta raopa hlânazy hlâ ei ta, aryhna hlâna atheihnazy chhao ama hlâ.

³² Cha liata, Izarei sawzy mohmô lia tlai ta, Mawsi ro chaneipa ryhpa kha Zawsua ta alôzy liata roh pachhuah ta.

³³ Chatawhcha Izarei zydua, chihropa chhao, a râh chyhsa chhao, ama machâzy nata hyutuhpazy nata ama ryureituhpazy chhaota Abeipa Biehrai Byh asytuhpa Livai chi theihthaipazy hmiakô liata, Byh hiakha lâ nata hiakha lâ liata a duah ei ta. Â khophie Kerizi Tlâh hmia liata a duah ei ta, a khophie Ebâ Tlâh hmia liata a duah ei ta. Cha cha Abeipa chakaotuhpa Mawsi ta Izarei chyhsazy byhnâ awpa awpa ta Zawsua hnohta bie a vaw piepa hawhta taopa a châ.

³⁴ Cha khai tawhta Zawsua ta ryhpa bie zydua, byhnâ awna nata chhiesana biezy cha, Ryhpa Châbu liata ropa hawhta reih khai ta.

³⁵ Mawsi biepiepa zydua kha Zawsua ta Izarei zawpi zydua hnohta a rei leipa y vei. Chanôzy nata hawtizy nata ama hry liata chihropa a ypazy hnohta Zawsua ta a rei leipa ryhpa bie miakha hmah y vei.