ZAWSUA 7 - Mara Bible RV (BSI)

Âkhâ moleina

¹ Châhrasala Izarei sawzy ta pahleipadia awpa hmozy kyh liata hmo parao ei ta. Zudâh chi Zerâ sawchapawpa Zabidi, Zabidi sawchapawpa Kâmi, Kâmi sawchapawpa Âkhâ ta pahleipadia awpa hmo vaw la ha ta. Chavâta Abeipa cha Izarei sawzy chô liata a pathi ia ta.

² Zawsua ta Zerikô khihpi tawhta Bethel nochhi lâ Bethave kiapâh liata a ypa Ai khihpi lâ chyhsa tuah ta, ama hnohta, “Khy u la, râh kaw mohparu teh u,” tah ta. Chyhsazy cha khy ei ta, Ai khihpi cha kaw mohparu ei ta.

³ Zawsua lâ zâ lie ei ta, a hnohta, “Chyhsa zydua khy hlei khah ei sy. Chyhsa sâh no tlyma, sâh thôh tlyma khy ei sala, Ai khihpi cha a kaw dyuh mawh ei sy. Ai khihpi cha maluh chyhta dei châ ei ta, chavâta chyhsa zydua rie pathei awpa byuh vei,” tah ei ta.

⁴ Chatanachata zawpi hry tawhta chyhsa sâh thôh rachhôh khy ei ta, châhrasala Ai khihsawzy hmiakô liata amâ râpai haw.

⁵ Ai chyhsazy ta Izarei chyhsa sythôh nata pacharu thie ei ta, thokhy chhikao tawhta Sebari taihta a chadai ei ta. Chhutla ama chô nota thie ei ta, zawpizy palôh ti hawhta a zao khai haw.

⁶ Zawsua cha a chysiazy hrie ta, ano nata Izarei machâzy cha, Abeipa Byh hmiakô liata zâlâ taih â khu lâta alei liata pao ei ta, ama luh liata buchâh mia ei ta.

⁷ Zawsua ta, “Hy Abeipa Zehôvâh, Amawri mo ku liata miah hlâ ta thie awpa ta ma, he phopi he Zawdâh miah na vaw chakakhei? Zawdâh haosâ liata pahrâ awpa ta palôh a vaw patlâh thlâh ha sih la a pha via awpa tlai.

⁸ Hy Abeipa, rei theipa khâpa ei hnei khao? Izarei cha a chariahpazy ta ama pahnie ha he zaw!

⁹ Cha thâtih cha Kâna mo nata a râh liata a pahrâpa zydua ta thei aw ei ta, miah dôh aw ei ta, alei chô tawhta eima moh ama pahlei ha aw he zaw! Chata a châ khiahta cha, na moh rônahpa pabohsa awpa ta kheihta ma na tao khao aw?” tah ta.

¹⁰ Abeipa ta Zawsua hnohta, “Thyu teh! Khazia nâ khu thlâh haw?

¹¹ Izarei ta hmo a parao haw. Ama hnohta bie ei piepa, ei biehrai parao ei ta, pahleipadia awpa hmo thokha amâ la haw. Hmo paru ei ta, haipa bie reih ei ta, ama parupazy cha ama hmo hry liata ama nyu.

¹² Chavâta Izarei sawzy cha ama chariahzy hmiakô liata a duah thei khao veih ei. Ama chariahzy hmiakô tawhta a râpai ei ta, âmo chhao pahleipadia awpa ta raopa ama châ. Chavâta pahleipadia awpa hmozy cha nama hry tawhtapa nama pahleipadia leipa khiahta cha, nama hnohta y khao aw va na.

¹³ Thyu teh! Zawpi kha pathaisa la, ama hnohta, ‘Mylâ châta a pathai teh u. Abeipa, Izarei Khazohpa ta hetana heta a tah: “Hy Izarei, pahleipadia awpa hmozy nama hry liata y ta, chazy cha nama hry tawhta nama pahleipadia hlâlei nama chariahzy hmiakô liata a duah thei aw veih ei chi,”’ tah teh.

¹⁴ My ta a chi chi ta a vaw luah aw ei chi ta, Abeipa ta chi a chakhipa tawhta a pho pho ta a vaw luah aw ei chi ta, Abeipa ta pho a chakhipa tawhta a chhôh chhôh ta a vaw luah aw ei chi ta, Abeipa ta a chakhipa chhôh tawhta pawhrâhpa pakha pakha ta namâ vaw luah aw.

¹⁵ Ahy rai châ sala, pahleipadia awpa hmo a hnohta hmôpa a châ khiahta cha, Abeipa biehrai parao ta, Izarei liata hmo pha lei ngaitapa a taopa vâta, cha chyhsa cha, a chhôhkha nata a hneipa zydua chhaota mei ta rao awpa a châ,” tah ta.

¹⁶ Zawsua cha mydi ta thyu ta, Izarei cha a chi chi ta vaw paluahsa ta, Zudâh chi chakhipa a châ.

¹⁷ Zudâh chi cha a pho pho ta vaw paluahsa ta, Zerâ pho chakhipa a châ. Zerâ pho cha a chhôh chhôh ta vaw paluahsa ta, Zabidi chhôh chakhipa a châ.

¹⁸ Zibidi chhôh pawhrâhpazy cha pakha pakha ta vaw paluahsa ta, Zudâh chi Zerâ sawchapawpa Zabidi, Zabidi sawchapawpa Kâmi, Kâmi sawchapawpa Âkhâ cha chakhipa a châ.

¹⁹ Zawsua ta Âkhâ hnohta, “Ei sawchapawpa, Abeipa Izarei Khazohpa parônahsa la, a hnohta a phuah teh. Khâpa hmo ma na tao tahpa na chho la, na phih khah y,” tah ta.

²⁰ Âkhâ ta Zawsua cha a chhy ta, a hnohta, “Zehôvah, Izarei Khazohpa chô liata hmo ei vaw parao ha tlai. He he ei hmotaopa cha a châ:

²¹ Hraona sôhzy hry liata Sinâ poh pha ngaitapa nata tâkâ sekel za no nata ngôh tlo sekel sypangawh a hripa hmô na ta, ei hia na tlia ngaita ta, ei vaw la haw. Ei poh o chhôh liata alei ry liata nyu na ta, a ry chai liata tâkâ a y,” tah ta.

²² Zawsua ta lyuhchâpazy tuah ta, poh o lâ cha a râ ei ta, hraona sôhzy cha a poh o liata nyupa châ ta, a ry chai liata tâkâ vaw y thlâh ha ta.

²³ Hraona sôhzy cha poh o chhôh tawhta la ei ta, Zawsua nata Izarei saw zydua lâta vaw cheih ei ta, Abeipa hmiakô liata soh ei ta.

²⁴ Zawsua nata Izarei saw zydua ta Zerâ sawchapawpa Âkhâ cha tâkâ, poh, ngôh tlo, a sawchapawzy, a sawchanôzy, a viahchaozy, a alâzy, a mietakuzy, a poh o nata a hneipa zydua chhaota a chhipa ta, Akhôrâ Saikao lâ khykhei ei ta.

²⁵ Zawsua ta, “Khazia nôpopa ta miah na paysa? Nâ chhao tanoh he Abeipa ta nôpopa ta a cha paysa aw,” tah ta. Chatanachata Âkhâ cha Izarei saw zydua ta alô ta vawhsao ei ta. A chhôhkhazy chhao vawhsao ei ta, ama vawhsao khai tawhta mei ta rao ei ta.

²⁶ A chô liata alô hluhpi pacho thlu ei ta, cha cha tanoh taihta a y thlâh haw. Chatanachata Abeipa cha a pathiiana ru ngaitapa tawhta â palie haw. Chavâta cha su cha tanoh taihta Akhôrâ Saikao tahpa a châ.