ZAWSUA 6 - Mara Bible RV (BSI)

Zerikô paona

¹ Izarei sawzy vâta Zerikô khihpi cha a chhôh lâ chhao khôtho lâ chhao khaw khaipa châ ta, ahy hmah pua leipa ei ta, ahy hmah a ngia hra veih ei.

² Abeipa ta Zawsua hnohta, “Moh teh, Zerikô khihpi cha a khih bei nata a chyhsa thatlô riahphapazy chhaota na ku liata ei cha pie haw.

³ Pheisaih zydua ta khihpi cha ei kha chahlô tua aw ei chi ta, cha hawhna chata noh charu chhôh nama tao aw.

⁴ Theihthaipa pasari ta Byh hmia lâta mietaku tôhpa ki chiahmie miasari chaba aw ei ta, noh sarina noh ta khihpi cha ei sari chahlô aw ei chi ta, theihthaipazy ta chiahmie cha ama tô aw.

⁵ Mietaku tôhpa ki cha ao pasipa ta tô aw ei ta, chiahmie pyu nama theipa nahta, zawpi zydua ao paro ngaitapa ta awh aw ei chi ta, chatanachata khihpi thokhy cha cho aw ta, zawpizy cha âmo dady chyu liata khihpi chhôh lâ amâ ngia aw,” tah ta.

⁶ Nunâ sawchapawpa Zawsua ta theihthaipazy aw ta, ama hnohta, “Biehrai Byh he a sy u la, theihthaipa pasari ta Abeipa Byh hmia lâta mietaku tôhpa ki chiahmie miasari chabapa ta ama sie aw,” tah ta.

⁷ Zawsua ta zawpi hnohta, “Sie lymâ u la, khihpi cha chahlô teh u. Chariah chhaichhi a tobipa pheisaihzy cha Abeipa Byh hmia lâta sie mawh ei sy,” tah ta.

⁸ Zawsua ta zawpi hnohta bie a rei khai nahta, Abeipa hmiakô liata mietaku tôhpa ki chiahmie miasari a chabapa theihthaipa pasarizy cha, chiahmie tôna chôta sie lymâ ei ta, Abeipa Biehrai Byh ta âmo cha pazi ta.

⁹ Chariah chhaichhi a tobipa pheisaihzy cha chiahmie tôtuhpa theihthaipazy hmia lâta sie ei ta, hnôh lâta vaituhpazy ta Byh cha pazi ei ta, theihthaipazy ta chiahmie cha â zaopa ta tô lymâ ei ta.

¹⁰ Zawsua ta zawpi hnohta, “Awh awpa ta ei cha chho hlâlei ei cha, awh leipa u la, nama ao chhao theipa châ leipa sala, nama pakah tawhta bie rai pua khah sy. Awh awpa ta ei cha chho ti ei ta nama awh aw,” tahpa ta biepie ta.

¹¹ Chatanachata Abeipa Byh cha khihpi ei kha chahlôsa ta, cha khai tawhta riehmo lâ a di ei ta, cha liata a rie ei ta.

¹² Zawsua cha mydi kari ta thyu ta, theihthaipazy ta Abeipa Byh cha a sy ei ta.

¹³ Mietaku tôhpa ki chiahmie miasari a chabapa theihthaipa pasarizy cha, Abeipa Byh hmia lâta sie ei ta, â zaopa ta chiahmie tô ei ta. Chariah chhaichhi a tobipa pheisaihzy âmo hmia lâta sie ei ta, hnôh lâta vaituhpazy ta Abeipa Byh pazi ei ta, theihthaipazy ta â zaopa ta chiahmie tô ei ta.

¹⁴ Noh nona liata khihpi cha ei kha chahlô heih ei ta, riehmo lâ kua heih ei ta. Cha hawhna chata noh charu tao ei ta.

¹⁵ Noh sarina noh ta khih a deipa nahta thyu ei ta, ama tao tyhpa hawhta khihpi cha chahlô heih ei ta. Cha noh liata cha ei sari tlai chahlô ei ta, cha noh lia dei ta khihpi cha ei sari ama chahlôpa a châ.

¹⁶ Ei sarina ama chahlô nahta, theihthaipazy ta chiahmie tô ei ta, Zawsua ta zawpi hnohta, “Awh teh u, Abeipa ta khihpi he a cha pie ha ei.

¹⁷ Khihpi he a chhôh liata a ypa zydua chhaota Abeipa lâ hlâ ta, parao khai awpa a châ. Âzuahnô Rahâbi deikua cha, eima tuapa lyuhchâpazy a vaw nyupa vâta, ano nata a o liata a ypa zydua pahlôh awpa a châ.

¹⁸ Pahleipadia awpa hmo kheihawhpa hmah namâ la awpa châ vei. Pahleipadia awpa hmozy namâ la khiahta cha, nâmosasyh ta nama chô liata chhiesana patlôsa aw ei chi ta, Izarei riehmo chhiesapa ta tao aw ei chi ta, nôpopa ta nama soh pathlei aw.

¹⁹ Tâkâ, ngôh, dawh nata thua hmobaohzy deikua cha, Abeipa châta châ khai aw ta, Abeipa sôh o liata so awpa a châ,” tah ta.

²⁰ Chiahmie pyu a paro nahta, zawpizy cha awh ei ta. Chiahmie pyu ama theipata nahta, zawpizy cha thata awh ei ta, chatanachata thokhy cha cho ta, a phia ta alei liata a pao haw. Chatawhcha zawpizy cha âmo dady chyu ta Khihpi chhôh lâ a ngia ei ta, khihpi cha la ei ta.

²¹ Khihpi liata a ypa zydua, chanô chapaw, hawti machâ, viahchao, mietaku nata alâ zy zaozi ta ama thie khai haw.

²² Râh mohparutuhpa chyhsa pano hnohna khata Zawsua ta, “Âzuahnô o liana hao a kei ngia u la, a hnohta bie namâ taihpa hawhna khata, a chhôhkha zydua chhaota puakhei teh u,” tah ta.

²³ Mohparutuhpa satliazy cha a kei ngia ei ta, Rahâbi cha a nô nata a paw nata a rilâhpazy nata a chhôhkha zydua chhaota puakhei ei ta, Izarei riehmo khôtho liata ama paysa haw.

²⁴ Khihpi cha a chhôh liata a ypa zydua chhaota mei ta rao ei ta, tâkâ, ngôh, dawh nata thua hmobaohzy deita Abeipa o sôh sona liata soh ei ta.

²⁵ Âzuahnô Rahâbi nata a paw chhôhkha nata a hneipa zydua deikua cha, Zawsua ta pahlôh khai ta. Rahâbi deikua cha, Zawsua ta Zerikô khihpi mohparu awpa ta a tuapa lyuhchâpazy a vaw nyupa vâta, tanoh taihta Izarei hry liata a pahrâ haw.

²⁶ Cha daihti liata, Zawsua ta zawpi cha chhie sakhâh ta, “Thyu ta, he Zerikô khihpi a paduapathipa maih cha Abeipa hmiakô liata chhiesapa ta y mawh sy. “A sawchapaw uhtheipa hrona ta Khihpi abôna lô bô sala, A sawchapaw seihnaipa hrona ta A chhikaozy padua mawh sy,” tah ta.

²⁷ Abeipa cha Zawsua hnohta y ta, râh zydua liata a moh pathâh ha ta.