ZAWSUA 4 - Mara Bible RV (BSI)

Zawdâh alô miahrawh hleino

¹ A phopi duata Zawdâh ama chaka khai nahta, Abeipa ta Zawsua hnohta,

² “Chi kha tawhta pakha lymâ ta zawpi hry tawhta chyhsa pahrawh hleino a tlyh aw chi ta,

³ ama hnohta, ‘Zawdâh liah khophie liata theihthaipazy phei â i ngaitapa ta â duana suzy tawhta alô miahrawh hleino kei la aw ei chi ta, vaw cheih aw ei chi ta, tazâ namâ rie nawpa su liata nama soh aw’, tahpa ta bie na pie aw ei,” tah ta.

⁴ Chatanachata Zawsua ta chi kha tawhta pakha lymâ ta, Izarei sawzy hry tawhta chyhsa pahrawh hleino a raopazy cha aw ta,

⁵ ama hnohta, “Abeipa nama Khazohpa Byh hmia lâta siepa ta, Zawdâh liah khophie lâ vawh u la, Izarei chi kha châta alô miakha lymâ ta reipatipa ta, alô miakha chyu la u la, nama ngiatlâh ta a vaw pia muh vy.

⁶ Cha cha nama hry liata ngiana a châ aw. Chhâ vaw y awpazy liata nama sawzy ta, ‘He alôzy he khâpa tahna ma a châ tly?’ tahpa ta ama cha hiahri tita,

⁷ ama hnohta, ‘Abeipa Biehrai Byh hmiakô liata Zawdâh tizy a chie pachhôpa atheithlâhna a châ. Abeipa Biehrai Byh ta Zawdâh a chaka nota, Zawdâh tizy a chie pachhô haw. Chavâta he alôzy he Izarei sawzy ta, cha thâtih cha chhâzaw ta amâ thei thlâh nawpa châta a châ,’ tahpa ta nama chho aw,” tah ta.

⁸ Izarei sawzy ta Zawsua biepiepa hawhta tao ei ta. Izarei chi zie ta Zawdâh chavah liah khophie tawhta alô miahrawh hleino la ei ta, ama riehmo lâ cheih ei ta, cha liata soh ei ta.

⁹ Alô miahrawh hleino cha, Zawsua ta Biehrai Byh asytuhpa theihthaipazy aduana su, Zawdâh chavah liah khophie liata bô ta, chazy cha tanoh taihta a y thlâh haw.

¹⁰ Mawsi ta Zawsua bie a piepa zydua hawhta, Abeipa ta zawpi tao awpa Zawsua a chhopazy ama tao khai hlâlei, theihthaipazy cha Zawdâh chavah liah khophie liata a duah thlâh ha ei ta. Zawpizy cha a para ngaitapa ta Zawdâh chaka ei ta.

¹¹ Ama zydua ta haosâ lâ ama kia khai nahta, Abeipa Biehrai Byh nata asytuhpa theihthaipazy cha zawpi hmia lâta sie lymâ ei ta.

¹² Rubena pathlazy, Kâdâ pathlazy nata Manase chi khophiezy chhao, Mawsi ta ama hnohta a reipa hawhta, chariah adyuhna chhaichhi a tobipa ta zawpi hmia lâta sie ei ta, Zawdâh cha chaka ei ta.

¹³ A dyuh awpa ta a mâ chiehpa pheisaih 40,000 ta Abeipa hmiakô liata Zawdâh cha chaka ei ta, Zerikô bypi lâ ama pangai.

¹⁴ Cha noh liata, Abeipa ta Izarei zydua mohmô ta Zawsua cha cheihchalo ta. Mawsi ama zapa hawhta, Izarei zawpi ta Zawsua cha a hrochhôh zydua ama za lymâ.

¹⁵ Abeipa ta Zawsua hnohta,

¹⁶ “Biehrai Byh asytuhpa theihthaipazy kha Zawdâh chavah tawhta vaw pua awpa ta biepie teh,” tah ta.

¹⁷ Zawsua ta theihthaipazy cha biepie ta, “Zawdâh chavah tawhta vaw pua teh u,” tah ta.

¹⁸ Chatanachata Abeipa Biehrai Byh asytuhpa theihthaipazy cha Zawdâh chavah liah khophie tawhta vaw pua ei ta, theihthaipazy pheipazah ta alei hipa a tlypa nahta, Zawdâh tizy cha a lo tyhpa hawhta za loh heih ta, a bie tyhpa hawhta a kao zydua a bie khai haw.

¹⁹ Izarei phopi cha cha thla khana, noh hrawhna noh ta Zawdâh tawhta pua ei ta, Zerikô nochhi râhri Kilkal liata riehmo paryh ei ta.

²⁰ Zawdâh tawhta alô miahrawh hleino phaoh ei ta, chazy cha Zawsua ta Kilkal liata bô ta.

²¹ Zawsua ta Izarei sawzy hnohta, “Chhâ vaw y awpazy liata nama sawzy ta ama pawzy hnohta, ‘He alôzy he khâpa tahna ma a châ tly?’ tahpa ta ama hiahri tita,

²² ‘Izarei ta alei hipa liata Zawdâh a chakapa atheithlâhna a châ,’ tahpa ta nama chho aw.

²³ Zehôvâh Khazohpa ta eima chaka khai hlâlei Tilaipi Saihpa pakua ta, Tilaipi Saihpa chô liata a taopa hawhna khata, Zehôvâh Khazohpa ta nama chaka khai hlâlei Zawdâh tizy a cha pakuapa ei.

²⁴ Chatanachata alei chô liata phopi zydua ta Abeipa ku cha ku thatlôpa a châ tahpa pahno aw ei ta, Abeipa nama Khazohpa cha nama chi lymâ thei aw,” tah ta.