ZAWSUA 3 - Mara Bible RV (BSI)

Zawdâh chakana

¹ Zawsua cha mydi kari ta thyu ta, Izarei saw zydua chhaota Siti tawhta Zawdâh lâ a pasie ei ta. Chavah ama chaka hlâta cha liata a rie ei ta.

² Noh thôh a tloh nahta, hyutuhpazy ta riehmo chahryh ei ta.

³ Zawpizy cha biepie ei ta, ama hnohta, “Theihthaipa Livai chizy ta Abeipa nama Khazohpa Biehrai Byh amâ sypa nama hmôpa nahta, nama yna su tawhta a pasie aw ei chi ta, Byh cha nama pazi aw.

⁴ Anodeikua nâmo nata Byh likawh liata dy 2,000 rachhôh â hla awpa a châ. Namâ hnia awpa châ vei. Chatanachata nama sie nawpa lâpi cha nama pahno thei aw, kha hlâta he lâpi he a chhih beih tlôh lei khâh ei chi ta,” tah ei ta.

⁵ Zawsua ta zawpi hnohta, “A pathai teh u, mylâ Abeipa ta nama hry liata hmonoâhpa a tao aw,” tah ta.

⁶ Zawsua ta theihthaipazy hnohta, “Biehrai Byh a sypa ta, zawpi hmia lâta sie u la, Zawdâh chaka teh u,” tah ta. Chatanachata theihthaipazy ta Biehrai Byh cha a sy ei ta, zawpi hmia lâta sie ei ta.

⁷ Abeipa ta Zawsua hnohta, “Mawsi hnohta ei ypa hawhna khata na hnohta chhao ei y aw tahpa ama pahno thei nawpa ta, Izarei saw zydua mohmô liata tanoh tawhta ei cha cheihchalo pathao aw.

⁸ Biehrai Byh asytuhpa theihthaipazy hnohta, ‘Zawdâh ngiahkâ nama tlô tita, Zawdâh chavah kiah liata a chalihpa ta namâ duah awpa a châ,’ tahpa ta bie na pie aw ei,” tah ta.

⁹ Zawsua ta Izarei sawzy hnohta, “He lâ a vy u la, Abeipa nama Khazohpa bie vaw nathlie teh u,” tah ta.

¹⁰ Zawsua ta, “He hmozy liana heta Khazoh hrohpa cha nama hry liata y ta, nama hmiakô tawhta Kâna mo, Hiti mo, Hivi mo, Perizi mo, Kirkâsi mo, Amawri mo nata Zebu mozy a papua tlai aw ei tahpa nama pahno aw.

¹¹ Moh teh u, khizaw zydua Abeipa Biehrai Byh ta nama hmia lâta Zawdâh a chaka hih.

¹² Chi kha tawhta pakha lymâ ta, Izarei chizy hry tawhta chyhsa pahrawh hleino a tlyh teh u.

¹³ Khizaw zydua Abeipa Zehôvâh Byh asytuhpa theihthaipazy pheipazah ta Zawdâh ti a tlypa nahta, machha lâ tawhta Zawdâh chavah ti a zâ lohpazy cha chie pachhôpa ta a toh aw ta, â duah thlâh ha aw,” tah ta.

¹⁴ Chatanachata zawpizy cha Zawdâh chaka awpa ta ama poh ozy tawhta pua ei ta, Biehrai Byh asytuhpa theihthaipazy cha zawpi hmia lâta sie ei ta.

¹⁵ Sâh hria daihti chhôh zydua ta Zawdâh chavah cha a kao zydua bie khai ha tyh ta. Byh asytuhpazy Zawdâh kei tlô ei ta, Byh asytuhpa theihthaipazy phei ta ngiahkâ ti a tlypa nahta,

¹⁶ machha lâ tawhta ti a zâ loh haipa cha a duah ta, lâhlapi taihta, Zarethâ kiapâh ta a ypa Âdâh khihpi taihta â sâh pi ta a opa ta a toh ta, Tilaipi Iahpa, Arabâ Tilaipi lâta a lohpa ti cha chie pachhô ta, zawpizy cha Zerikô khih dady liata Zawdâh haosâ lâ ama pua haw.

¹⁷ Izarei saw zydua ta chavah cha alei hipa liata chaka ei ta, Izarei phopi zydua ta Zawdâh ama chaka khai hlâlei, Abeipa Biehrai Byh asytuhpa theihthaipazy cha Zawdâh chavah liah khophie alei hipa liata a duah thlâh ha ei ta.