ZAWSUA 24 - Mara Bible RV (BSI)

Zawsua ryuhi bie

¹ Zawsua ta Izarei chi zydua cha Sekhe liata pahmaoh ta, Izarei machâzy, chhituhpazy, ryureituhpazy nata hyutuhpazy awpakhy ta. Khazohpa hmiakô liata a luah chyu ei ta.

² Zawsua ta zawpi zydua hnohta, “Zehôvah, Izarei Khazohpa ta hetana heta a tah: ‘Châ pathlatuhpazy, Abarahâ nata Nâhaw paw Terâ tlai chhao kha, hlâno cha Ufrâti chavah khô lâ râh liata pahrâ tyh ei ta, khazoh hropazy ama chakao tyh.

³ Nâmo châ pathlatuhpa Abarahâ kha Chavah khô lâ tawhta a vaw chhi na ta, Kâna râh chhôh zydua ei chhihtha. A chipathla papôh na ta, Aisika kha ei pie.

⁴ Aisika hnohta Zakaw nata Esaw pie na ta. Esaw cha a ryuto châta Seirâ tlâh râh ei pie. Zakaw nata a sawzy cha Izi râh lâ zu ei ta.

⁵ Chatawhcha Mawsi nata Arawna tuah na ta, Izi râh cha ama hry liata ei patlôsapa potlana khata hrie na ta, cha khai tawhta ei châ chhi papua ei.

⁶ Châ pathlatuhpazy Izi râh tawhta a chhi papua ei na ta, tilaipi nama vaw tlô. Izi mo ta talailihzy nata arâ pheisaihzy chhaota châ pathlatuhpazy cha Tilaipi Saihpa taih a vaw chadai ei ta.

⁷ Châ pathlatuhpazy ta Abeipa pado ei ta, nâmo nata Izi mo likawh liata zohna vaw soh ta, Izi mo cha tilaipi ta pavaosa ta, a pamôh khai ha ei. Izi râh liata ei hmotaopa kha nama mo tlai ta hmô ta. Râhchawhpa liata bohpi nama y.

⁸ “‘Cha khai tawhta Zawdâh haosâ liata a ypa Amawri râh lâ ei châ chhi ei. Châ vaw dyuh ei ta, âmo cha nama ku liata ei cha pie ei. Chatanachata ama râh hnei ei chi ta, âmo cha nama hmiakô tawhta ei pahleipadia ha ei.

⁹ Zipô sawchapawpa Môabâ bei Bâlâka vaw thyu ta, Izarei cha a vaw dyuh ta, chhie cha sapa awpa ta Beô sawchapawpa Bâlâma hnohta chyhsa tuah ta, a paawsa.

¹⁰ Châhrasala Bâlâma bie nathlie khoh va na. Chavâta nama châta byhnâ tlao aw ta, Bâlâka ku tawhta ei cha pachha ei.

¹¹ Cha khai tawhta Zawdâh chaka ei chi ta, Zerikô nama tlô. Zerikô chyhsazy ta châ vaw dyuh ei ta, Amawri mo, Perizi mo, Kâna mo, Hiti mo, Kikâsi mo, Hivi mo nata Zebu mozy chhao ta châ dyuh hra ei ta, châhrasala âmo cha nama ku liata ei cha pie ha ei.

¹² Nama hmia lâta kheihpangiah tuah na ta, cha chata âmo cha nama hmiakô tawhta a chadai ta, Amawri bei pano â chadaipai ha ei. Nama zaozi ta tlyma, nama libaw ta tlyma nama pahniepa châ vei.

¹³ Nama hriapasa leipa râh nata nama padua leipa khihpizy cha pie ei na ta, chazy liata pahrâ ei chi ta, nama lo leipa kre sadô nata ôli sadô theizy nama nie.

Nama chakao awpa a tlyh teh u

¹⁴ “‘Chavâta Abeipa cha chi u la, hmeiseihpa nata â do ngaitapa ta ano cha chakao muh vy. Châ pathlatuhpazy ta Chavah haosâ nata Izi râh liata ama chakao tyhpa khazohzy kha thy khai u la, Abeipa chakao muh vy.

¹⁵ Abeipa chakaopa cha a pha lei awpa hawhta nama pahno khiahta cha, tanoh he ahy ma nama chakao aw, a tlyh teh u. Châ pathlatuhpazy ta Chavah haosâ liata ama chakao tyhpa khazohzy kha ma, nama pahrâ haipa râh Amawri mo khazohzy he ma, a tlyh teh u. Kei nata ei chhôhkha ta la Abeipa eima chakao aw,’” tah ta.

¹⁶ Zawpizy ta, “Zehôvâh Khazohpa siesaipa ta khazoh hropazy chakao cheita aw ma pi.

¹⁷ Abeipa eima Khazohpa, ano tlai cha keimo nata miah pathlatuhpazy Izi râh seichâna o tawhta miah a kaw chhi papua ta, eima mohmô liata ngiana rônah ngaitapazy taopa ta, eima siena maih nata phopi eima chatôhna zydua liata miah pabohsatuhpa a châ.

¹⁸ Abeipa ta phopi zydua, cha râh liata a pahrâpa Amawri mo chhao, eima hmiakô tawhta a papua khai ei. Chavâta keimo chhao Abeipa eima chakao aw, ano cha eima Khazohpa a châ,” tah ei ta.

¹⁹ Châhrasala Zawsua ta zawpi hnohta, “Abeipa chakao thei aw veih ei chi. Ano cha Khazoh pathaihpa châ ta, hiatlia a pasapa Khazohpa a châ. Nama paraonazy nata nama moleinazy a ngiahthai aw vei.

²⁰ Abeipa siesaipa ta râh hropa khazohzy nama chakao khiahta cha, nama chô liata hmo phapa a vaw tao hapa chhao ta, châ heihnaohpa ta hmo pha leipa ta cha thô aw ei ta, a cha pahleipadia aw ei,” tah ta.

²¹ Zawpizy ta Zawsua hnohta, “Châ vei, Abeipa khâchâ eima chakao aw,” tah ei ta.

²² Zawsua ta zawpi hnohta, “Abeipa chakao awpa ta namâ tlyhpa kyh liata pahnokheituhpazy cha nâmosasyh tlai nama châ,” tah ta. Âmo ta, “Pahnokheituhpazy eima châ,” tah ei ta.

²³ Zawsua ta, “Chata a châ khiahta cha, nama hry liata chihropa khazoh a ypazy kha thy khai u la, Abeipa Izarei Khazohpa lâta nama pathipalôh pahei teh u,” tah ta.

²⁴ Zawpizy ta Zawsua hnohta, “Abeipa eima Khazohpa chakao aw pi ta, a bie eima zyh lymâ aw,” tah ei ta.

²⁵ Chatanachata Zawsua ta, cha noh liata zawpi hnohta bie hraih ta, âmo châta bieraopa nata pachianazy Sekhe liata tao ta.

²⁶ Zawsua ta cha biezy cha Khazohpa ryhpa châbu liata roh ta, alô laipa la ta, Abeipa supathaihpa kiapâh ta ôkâ tho ry liata bô ta.

²⁷ Zawsua ta zawpi zydua hnohta, “Moh teh u, he alô he miah pahnokheituhpa a châ aw. Abeipa ta eima hnohta bie a reipa zydua thei khai ta, chavâta nâmo châ pahnokheituhpa a châ aw. Chataleipatala nama Khazohpa cha namâ paphasai pathlei aw,” tah ta.

²⁸ Chatanachata Zawsua ta zawpizy cha ama ryuto râh chyu lâta pasiesa ha ta.

Zawsua nata Eliaza

²⁹ Cha khai tawhta Nunâ sawchapawpa Zawsua, Abeipa chakaotuhpa cha kô 110 uhtheipa ta thi ta.

³⁰ Kâsi tlâh maw lâta Epharai tlâh râh Timnâserâ liata a ryuto râh liata ama pabu.

³¹ Zawsua hro chhôh nata Zawsua hlâta a hro parei viapa, Abeipa ta Izarei châta hmo a taopa zydua a pahnotuhpa machâzy hro chhôh liata cha, Izarei sawzy ta Abeipa ama chakao lymâ.

³² Izarei sawzy ta Izi râh tawhta Zawsi ru ama kaw phaopa kha, Sekhe khihpi liata Zakaw ta Sekhe paw Hamô sawzy liata tâkâ za kha ta a chaleipa su liata pabu ei ta. Cha cha Zawsi pathlazy ryuto râh a châ pâ haw.

³³ Arawna sawchapawpa Eliaza cha thi ta, a sawchapawpa Phinehâ hnohta a ryuto châta ama piepa Epharai tlâh râh Kibia khih liata ama pabu.