ZAWSUA 23 - Mara Bible RV (BSI)

Izarei chhituhpazy hnohta Zawsua bietapa

¹ Abeipa ta Izarei cha ama chheipâh chariah zydua tawhta apahâna pie ta, bohpi a châ tawhta, Zawsua chhao cha vaw machâpa ta kô uhthei ngaitapa vaw châ ha ta.

² Zawsua ta Izarei machâ, chhituhpa, ryureituhpa nata hyutuhpa zydua awpakhy ta, ama hnohta, “Kei cha machâ ha na ta, kô uhthei ngaitapa ei châ ha hih.

³ Abeipa nama Khazohpa ta nâmo vâta he phopi zydua chô liata a taopa zydua nama hmô khai. Abeipa nama Khazohpa ano tlai ta a châ dyuhpa ei.

⁴ Pachâ teh u, phopi pahnie mâh leipazy nata kei tlai ta ei chhawh pathlah hapa, Zawdâh tawhta notla lâ Tilaipi Laipa tlôna taihta phopizy râh cha, nama chizy ryuto râh châta ei cha pie ei.

⁵ Abeipa nama Khazohpa ta âmo cha nama hmiakô liata papua aw ta, nama hmô pha leipa lâ a to khai aw ei. Abeipa nama Khazohpa ta nama hnohta a reipa hawhta, ama râh cha nama hnei aw.

⁶ Chavâta Mawsi ryhpa châbu liata ropa zydua riahphapa ta zyh u la, tao teh u. Chachâh lâ tlyma, chavei lâ tlyma, tleisai cheita khuh vy.

⁷ Nama hry liata a ypa phopizy a kao leipa u la, ama khazohzy moh pado khuh vy. Ama khazohzy moh ta bie a taih leipa u la, cha khazohzy cha chakao leipa u la, a chhy khuh vy.

⁸ Tanoh taihta nama taopa hawhna heta, Abeipa nama Khazohpa deita khâchâ nama patu awpa a châ.

⁹ Abeipa ta chi laipa nata thatlôpazy nama hmiakô tawhta papua khai ta, nama hmiakô liata a duah theipa tanoh taihta ahy hmah y veih ei.

¹⁰ Abeipa nama Khazohpa ta bie châ taih ei ta, ano tlai ta nâmo châta â dyuhpa vâta, nâmo chyhsa pakha ta chyhsa sâh kha namâ chadaipai aw.

¹¹ Chavâta a phapa ta a sohsi u la, Abeipa nama Khazohpa cha kyhpachâ teh u.

¹² Hnôh lâ a heihpa ta, phopi laibâhpa nama hry liata a pahrâpazy a zaokhipa ta, a hnei pahlao u la, nama o cha kiah ei sala, ama o nama kiah khiahta cha,

¹³ Abeipa nama Khazohpa ta phopizy he nama hmiakô tawhta papua khao aw vei tahpa pahno muh vy. Abeipa nama Khazohpa ta râh pha ngaitapa a cha piepa tawh eina heta nama leidia khai hlâlei, âmo cha nama châta khoheih nata aphyh châ aw ei ta, nama kâ châta tuna chôchahrei châ aw ei ta, nama mokhaoh châta ahloh ama châ aw.

¹⁴ “Tahmâ cha khizaw zydua siezie hawhta ei sie hra daihti liahsa â hnia haw. Abeipa nama Khazohpa ta nâmo kyh liata bie pha a vaw rei hapa zydua kha, a patlô leipa miakha hmah y vei tahpa nama pathipalôh tlokhuh ta nata nama thlahpa tlokhuh ta nama pahno. Nama chô liata vaw tlô khai ta, a tlô leipa miakha hmah y vei.

¹⁵ Abeipa nama Khazohpa ta nama hnohta hmo phapa a reipa zydua nama chô liata a vaw tlô khaipa hawhta, a biepiepazy nama parao khiahta deikua cha, Abeipa nama Khazohpa ta râh phapa a cha piepa tawh ei ta a cha pahleipadia khai hlâlei ei cha, Abeipa ta hmo pha leipazy nama chô liata a vaw patlôsa aw.

¹⁶ Abeipa nama Khazohpa ta bie a cha piepa ei, a biehrai paraopa ta, khazoh hropazy pangaipa ta âmo cha chakaopa ta namâ chhy khiahta cha, nama chô liata Abeipa pathi ia aw ta, râh phapa a cha piepa tawhna ei heta thlai nama leidia aw,” tah ta.