ZAWSUA 22 - Mara Bible RV (BSI)

Nochhi lâta a pahrâ awpa chizy amâ lie

¹ Chatawhcha Zawsua ta Rubena mo, Kâdâ mo nata Manase chi khophiezy aw ta,

² ama hnohta, “Abeipa chakaotuhpa Mawsi ta bie a cha piepa zydua zyh ei chi ta, kei ta bie ei cha piepa zydua chhao nathlie ei chi ta,

³ noh hluhpi chhôh nama unawhzy siesai leipa ei chi ta, tanoh taihta siesai veih ei chi. Abeipa nama Khazohpa piepazy nama zyh lymâ.

⁴ Abeipa nama Khazohpa ta ama hnohta bie â taihpa hawhta, nama unawhzy cha apahâna a pie ha ei hih. Chavâta Abeipa chakaotuhpa Mawsi ta nama ryuto châta râh a cha piepa ei, Zawdâh haosâ liata nama poh ozy lâ a di bâ teh u.

⁵ Abeipa chakaotuhpa Mawsi ta bie a cha piepa hawh ei ta, Abeipa nama Khazohpa cha a kyh pachâ ta, a lâpi zydua a chhihpa ta, a biepiepazy zyh ta, ano cha khâchâ patupa ta, nama pathipalôh tlokhuh ta nata nama thlahpa tlokhuh ta ano chakao awpa ta biepiepa nata ryhpazy pakhâta ta nama zyh awpa a châ,” tah ta.

⁶ Chatanachata Zawsua ta âmo cha byhnâ awpa ta, pasiesa ta, ama poh ozy lâ a di ha ei ta.

⁷ Manase chi khophie cha Mawsi ta Bâsanâ râh liata ryuto râh pie ta, chi khophie deikua cha Zawsua ta notla lâ Zawdâh haosâ liata ama unawhzy hry liata ryuto râh a pie ei. Ama o lâ a padisa chy ta Zawsua ta âmo cha byhnâ awpa ta,

⁸ ama hnohta, “Sôh nata thih hluhpi chhaota nama poh ozy lâ a di teh u. Sahrohzy, tâkâzy, ngôhzy, dawhzy, thua nata chysia hluhpi chhaota nama poh ozy lâ a di u la, nama chariahzy nama hraona sôhzy kha nama unawhzy nata a rai teh u,” tah ta.

⁹ Chatanachata Rubena pathlazy, Kâdâ pathlazy nata Manase chi khophiezy cha, Kâna râh Silô khihpi liata Izarei sawzy nata a chhaih ei ta, Abeipa ta Mawsi hmâpa ta bie a vaw piepa hawhta, Kilia râh liata ama ryuto râh lâ ama sie haw.

Zawdâh maisâh

¹⁰ Kâna râh Zawdâh kao ama tlô nahta, Rubena pathlazy, Kâdâ pathlazy nata Manase chi khophiezy cha Zawdâh chavah kiah liata maisâh lai ngaitapa tao ei ta.

¹¹ Chyhsazy ta, “Rubena pathlazy, Kâdâ pathlazy nata Manase chi khophiezy ta Kâna râh tytua Zawdâh kao, Izarei sawzy râh liata maisâh ama tao,” tahpa ta ama reipa Izarei sawzy ta thei ei ta.

¹² Cha bie cha Izarei sawzy ta ama thei nahta, âmo a dyuh awpa ta Izarei zawpi zydua Silô khihpi liata a hmaohpakhy ei ta.

¹³ Izarei sawzy ta Kilia râh liata a ypa Rubena pathlazy, Kâdâ pathlazy nata Manase chi khophiezy lâta theihthaipa Eliaza sawchapawpa Phinehâ tuah ei ta.

¹⁴ A hnohta chhituhpa pahrawh, Izarei chizy hry tawhta chhôhkha pawhrâh chaipa pakha lymâ ta pasiesa ei ta. Âmo cha Izarei sâh hluhpi hry liata chhôhkha pawhrâh chaipazy ama châ.

¹⁵ Rubena pathlazy, Kâdâ pathlazy nata Manase chi khophiezy yna Kilia râh lâ cha sie ei ta, ama hnohta,

¹⁶ “Abeipa phopi manôh zydua ta hetana heta ama tah, ‘Khazia Izarei Khazohpa chô liata hmo nama parao? Tanoh he Abeipa nama pazina tawhta tleisai a chhuahpa ta maisâh a tao ei chi ta, tanoh he Abeipa namâ dyuh hih.

¹⁷ Peô su liata moleina kha eima châta a daih vei ma? Abeipa phopi chô liata potlana vaw tlô ta, kha moleina tawhta tahmâ taih eimâ pathai khai to leipa he.

¹⁸ Khazia tanoh Abeipa tleisai namâ chhuah heih tly? Tanoh Abeipa namâ dyuh khiahta cha, mylâ Izarei zawpi zydua chô liata a pathi a ia aw.

¹⁹ Râh nama topa a pathaih leipa khiahta cha, Abeipa achhyna byureih yna Abeipa râh lâ he vaw chaka u la, eima hry liata râh vaw hnei hra teh u. Anodeikua Abeipa eima Khazohpa maisâh dei leipa ta maisâh hropa taopa ta Abeipa namâ dyuh awpa châ leipa ta, keimo chhao miah namâ dyuh awpa châ vei.

²⁰ Zerâ sawchapawpa Âkhâ ta pahleipadia awpa hmozy kyh liata biepiepa a paraopa vâta, Izarei zawpi chô liata hiehâhna a vaw tlôpa kha a thei thlâh ha veih ei chi ma? A paraona vâta ano deita a leidia leipa kha,’” tah ei ta.

²¹ Rubena pathlazy, Kâdâ pathlazy nata Manase chi khophiezy ta Izarei pho hyutuhpazy cha a chhy ei ta, ama hnohta,

²² “Zehôvah, khazohzy Khazohpa! Abeipa, khazohzy Khazohpa! Ano ta pahno ta, Izarei chhao ta pahno mawh sy! Eima maisâh taopa he Abeipa a dyuhpa tlyma, a rei a ngiah leipa tlyma a châ khiahta cha, tanoh he miah pahlôh khuh vy.

²³ Abeipa eima pazipa tawhta tleisai nawpa ta eima châta maisâh a taopa eima châ khiahta nata cha liata raopa hlâna tlyma, niepa hlâna tlyma, aryhna hlâna atheihna tlyma hlâ nawpa ta a taopa eima châ khiahta cha, ano Abeipa tlai ta viari miah thô mawh sy.

²⁴ Châhrasala cha hawhta châ vei. Eima chipa vâta a taopa tlao eima châ. Chhâ vaw y awpa liata nama pathlazy ta eima pathlazy hnohta, ‘Nâmo nata Abeipa Izarei Khazohpa cha khâpa azaona ma nama hnei?

²⁵ Abeipa ta Zawdâh he nâmo nata keimo likawh râhri châta rao ha ta, chavâta nâmo Rubena pathlazy nata Kâdâ pathlazy saih u, Abeipa liata tovyuh hnei hra veih ei chi,’ ama vaw tah pathlei aw tahpa eima chipa vâta a châ. Nama pathlazy ta eima pathlazy cha Abeipa a chhy khao lei awpa ta ama tao thei mâh tâh.

²⁶ Chavâta, ‘Maisâh tao ei suh u, raopa hlâna châta nata atheihna châta châ leipa ta,

²⁷ keimo nata nâmo nata keimo hnôhlâ ta eima pathlazy likah liata pahnokheituhpa châ aw ta, chatanachata eima raopa hlânazy, atheihnazy nata aryhna hlânazy ta Abeipa cha a hmiakô liata chakao thei aw pi ta, chhâ vaw y awpa liata nama pathlazy ta eima pathlazy hnohta, “Abeipa liata tovyuh hnei veih ei chi,” ama tah lei nawpa ta,’ tahpa ta eima taopa a châ.

²⁸ Chavâta hetana heta eima pachâ: Chhâ vaw y awpa liata keimo hnohta tlyma, eima pathlazy hnohta tlyma, cha bie cha ama rei tita, keimo ta, ‘Nathlie teh u, miah pathlatuhpazy ta Abeipa maisâh ama taozie he raopa hlâna awpa nata atheihna awpa châ vei, keimo nata nâmo likah ta pahnokheituhpa châta a châ,’ eima tah nawpa ta, a taopa eima châ.

²⁹ Abeipa a dyuh chachei leipa pi ta, Abeipa eima pazipa tawhta tleisai tiarâh ma pi. Abeipa achhyna byureih hmiakô liata Abeipa eima Khazohpa maisâh tah leipa ta, raopa hlâna châta tlyma, niepa hlâna châta tlyma, atheihna châta tlyma, maisâh tao cheita ma pi,” tah ei ta.

³⁰ Theihthaipa Phinehâ nata a hnohta a siepa zawpi chhituhpa Izarei pho hyutuhpazy ta Rubena pathlazy, Kâdâ pathlazy nata Manase pathlazy bie reipa cha ama thei nahta, a ly kaw ei ta.

³¹ Theihthaipa Eliaza sawchapawpa Phinehâ ta Rubena pathlazy, Kâdâ pathlazy nata Manase pathlazy hnohta, “Abeipa eima hry liata a y tlai tahpa tanoh eima pahno haw. Abeipa châta nama ngâchhihna nama pahlei leipa vâta, tahmâ he Abeipa ku tawhta Izarei sawzy nama pachha haw,” tah ta.

³² Chatanachata theihthaipa Eliaza sawchapawpa Phinehâ nata chhituhpazy cha, Rubena pathlazy nata Kâdâ pathlazy pahrâna Kilia râh tawhta Izarei pathlazy yna Kâna râh lâ a lie ei ta, bie cha kei tlôkhei ei ta.

³³ Cha biezy chata Izarei sawzy cha palysa kaw ta. Chatanachata Izarei sawzy cha Khazohpa reithai ei ta, Rubena pathlazy nata Kâdâ pathlazy a dyuh ta, ama pahrâna râh parao awpa kyh reih khao veih ei.

³⁴ Rubena pathlazy nata Kâdâ pathlazy ta, “He he Abeipa cha Khazohpa a châ tlai na tahpa eima likah liata Pahnokheituhpa a châ,” tah ei ta, maisâh cha Pahnokheituhpa tahpa ta a moh ama bi.