ZAWSUA 21 - Mara Bible RV (BSI)

Livai khihpizy

¹ Livai chi chhôhkha pawhrâhpazy cha theihthaipa Eliaza nata Nunâ sawchapawpa Zawsua nata Izarei chizy liata ama pho pawhrâhpazy lâ vawh ei ta,

² Kâna râh Silô khihpi liata ama hnohta, “Eima pahrâ nawpa khihpizy nata eima sahroh tlaih nawpa ta a chaby râhzy miah pie awpa ta, Abeipa ta Mawsi hmâpa ta bie a vaw pie hapa kha châ ta,” tah ei ta.

³ Chatanachata Abeipa biepiepa hawhta, Izarei sawzy ta ama ryuto râh tawhta, he khihpizy nata a chaby râhzy he Livai chizy ama pie.

⁴ Kôhâ pathla phozy to awpa nuby a dao tua chaipa châ ta. Zudâh, Simeôna nata Benzami chi tovyuhzy tawhta khihpi miahrawh hleithôh cha theihthaipa Arawna pathla Livai chizy hnohta ama pie.

⁵ Kôhâ pathla hropazy châta nuby a dao heihpa châ ta, Epharai chi, Dânâ chi nata Manase chi khophie phozy tovyuh tawhta khihpi miahrawh ama pie.

⁶ Kesao pathlazy châta nuby a daopa châ ta, Iskâra chi, Asera chi nata Nâthalai chi phozy tovyuh tawhta nata Bâsanâ râh liata Manase chi khophie phozy ryuto râh tawhta khihpi miahrawh hleithôh ama pie.

⁷ Merâri pathlazy chhao Rubena chi, Kâdâ chi nata Zebulawna chi tovyuhzy tawhta khihpi miahrawh hleino a pho pho ta ama to hra.

⁸ Cha khihpizy nata a chabyzy cha, Abeipa ta Mawsi hmâpa ta bie a piepa hawhta, Izarei sawzy ta Livai chizy hnohta nuby a daopa ta ama pie.

⁹ Khihpi moh palâsapazy he Zudâh chi tovyuh nata Simeôna chi tovyuh tawhta Livai chizy hnohta ama pie.

¹⁰ Nuby a dao tua chaipa cha Livai chi Kôhâ pho Arawna pathla chô liata tlu ta. Hezy he ama to awpa khihpizy a châ:

¹¹ Zudâh tlâh râh liata Kiriathâbâ khihpi cha a chaby râhzy chhaota ama pie. Kiriathâbâ cha Hebraw tahpa châ hra ta, Arabâ cha Anâki paw a châ.

¹² Khihpi lyuzy nata a khichapeihzy deikua cha, Zephune sawchapawpa Kâlebâ tovyuh châta piepa a châ.

¹³ Theihthaipa Arawna pathlazy cha lianycheihpazy abohna khihpi Hebraw nata a chabyzy, Libnâ khihpi nata a chabyzy,

¹⁴ Zati khihpi nata a chabyzy, Estemô khihpi nata a chabyzy,

¹⁵ Hôlô khihpi nata a chabyzy, Debi khihpi nata a chabyzy,

¹⁶ Aina khihpi nata a chabyzy, Zutâ khihpi nata a chabyzy, Beseme khihpi nata a chabyzy piepa châ ei ta, chi no tovyuh tawhta khihpi miachaki piepa ama châ.

¹⁷ Benzami chi tovyuh tawhta Kibiô khihpi nata a chabyzy, Kebâ khihpi nata a chabyzy,

¹⁸ Anathô khihpi nata a chabyzy, Almaw khihpi nata a chabyzy piepa châ ei ta, khihpi miapalih piepa ama châ.

¹⁹ Arawna pathla theihthaipazy tovyuh cha a zydua ta khihpi miahrawh hleithôh nata a chabyzy a châ.

²⁰ Livai chi Kôhâ pathla hropazy châta nuby a daopa châ ta, Epharai chi tovyuh tawhta khihpizy piepa ama châ.

²¹ He khihpizy he piepa ama châ: Epharai tlâh râh liata a ypa lianycheituhpazy abohna khihpi Sekhe nata a chabyzy, Keze khihpi nata a chabyzy,

²² Kibazai khihpi nata a chabyzy, Behôrô khihpi nata a chabyzy, khihpi miapalih piepa ama châ.

²³ Dânâ chi tovyuh tawhta Elteke khihpi nata a chabyzy, Kibethaw khihpi nata a chabyzy,

²⁴ Aizalô khihpi nata a chabyzy, Kâthârimô khihpi nata a chabyzy, khihpi miapalih piepa ama châ.

²⁵ Manase chi khophie tovyuh tawhta Tânâ khihpi nata a chabyzy, Kâthârimô khihpi nata a chabyzy, khihpi miano piepa ama châ.

²⁶ Kôhâ pathla pho hropazy tovyuh cha a zydua ta khihpi miahrawh nata a chabyzy a châ.

²⁷ He khihpizy he Livai chi Kesao pathla phozy piepa a châ: Manase chi khophie tovyuh tawhta lianycheituhpazy abohna khihpi Bâsanâ râh liata Kôlâ khihpi nata a chabyzy, Besterâ khihpi nata a chabyzy, khihpi miano piepa ama châ.

²⁸ Iskâra chi tovyuh tawhta Kisiô khihpi nata a chabyzy, Dâberâ khihpi nata a chabyzy,

²⁹ Zamu khihpi nata a chabyzy, Enkâni khihpi nata a chabyzy, khihpi miapalih piepa ama châ.

³⁰ Asera chi tovyuh tawhta Misâ khihpi nata a chabyzy, Abadaw khihpi nata a chabyzy,

³¹ Helkâ khihpi nata a chabyzy, Rehô khihpi nata a chabyzy, khihpi miapalih piepa ama châ.

³² Nâthalai chi tovyuh tawhta lianycheituhpazy abohna khihpi Kâlili râh liata Kedesâ khihpi nata a chabyzy, Hâmôdaw khihpi nata a chabyzy nata Kâtani khihpi nata a chabyzy, khihpi miathôh piepa ama châ.

³³ Kesao pathlazy ta a pho pho ta ama topa khihpizy cha a zydua ta khihpi miahrawh hleithôh nata a chabyzy a châ.

³⁴ Livai chi hropa Merâri pathla phozy cha Zebulawna chi tovyuh tawhta Zônia khihpi nata a chabyzy, Kâratâ khihpi nata a chabyzy,

³⁵ Dimnâ khihpi nata a chabyzy, Nâhalâ khihpi nata a chabyzy, khihpi miapalih piepa ama châ.

³⁶ Rubena chi tovyuh tawhta Beze khihpi nata a chabyzy, Zahâza khihpi nata a chabyzy,

³⁷ Kedemô khihpi nata a chabyzy, Mephâ khihpi nata a chabyzy, khihpi miapalih piepa ama châ.

³⁸ Kâdâ chi tovyuh tawhta lianycheituhpazy abohna khihpi Kilia râh liata Ramô khihpi nata a chabyzy, Mâhanai khihpi nata a chabyzy,

³⁹ Hesbaw khihpi nata a chabyzy, Zaze khihpi nata a chabyzy, a zydua ta khihpi miapalih piepa ama châ.

⁴⁰ Chazy cha Livai chi hropa Merâri pathlazy ta a pho pho ta ama topa khihpizy châ ei ta, ama topa cha a zydua ta khihpi miahrawh hleino a châ.

⁴¹ Izarei sawzy ryuto râh hry liata Livai chi khihpizy cha, khihpi chabyzy chhaota, a zydua ta khih sypalih nata khih charie a châ.

⁴² Khihpizy ta a chaby liata sahroh tlaihna hnei chyu ei ta, khihpi zydua cha hawhta ama châ khai.

Apahâna nata thlalôhna

⁴³ Cha hawhna chata Abeipa ta Izarei sawzy cha, ama pathlatuhpazy hnohta pie awpa ta bie â vaw taihpa râh zydua pie ta. Chatanachata râh cha hnei ei ta, cha liata pahrâ ei ta.

⁴⁴ Abeipa ta ama pathlatuhpazy hnohta bie â vaw taihpa hawhta, Izarei sawzy cha su to liata apahâna pie ta. Abeipa ta ama chariah zydua ama ku liata a pie khaipa vâ ei ta, ama chariah ahy hmah ama hmiakô liata a duah theipa y veih ei.

⁴⁵ Izarei phopi hnohta Abeipa bietai phapa zydua miakha hmah a tlô leipa y vei. A zydua ta a tlô paki khai haw.