ZAWSUA 2 - Mara Bible RV (BSI)

Mohparutuhpazy tuana

¹ Nunâ sawchapawpa Zawsua ta mohparutuhpa pano Siti tawhta arulâta tuah ta, ama hnohta, “Sie u la, râh kaw moh u la, a eih pachaipa ta Zerikô khihpi kaw moh muh vy,” tah ta. Mohparutuhpazy cha sie ei ta, Rahâbi ama tahpa âzuahnô o liata a ngia ei ta, cha liata tlô ei ta.

² Chyhsazy ta Zerikô bei hnohta, “Pachâ teh, râh mohparu awpa ta Izarei sawzy tazâ ama kaw tlô,” tah ei ta.

³ Zerikô bei ta Rahâbi lâ chyhsa tuah ta, a hnohta, “Na o liata a vaw tlôpa khichhaizy kha vaw papua teh. Râh mohparu awpa ta a vaw tlôpa ama châ,” tahpa ta pachhosa ta.

⁴ Châhrasala chanô ta mohparutuhpa pano cha a chhi ta, nyu ha ta. Chatanachata ama thâtih a vaw patluahpazy hnohta, “Â do na, kha chyhsazy kha ei o liata vaw tlô tlai ei ta, châhrasala khataih lâ tawhta a vypa ma ama châ tahpa pahno va na.

⁵ Vaw zoh ta, khihpi thokhy chhikao khaw chy ta, ama pua haw. Khataih lâ ma ama sie tahpa pahno va na. A chadai para u la, nama pha thlâh ha aw,” tah ta.

⁶ Rahâbi ta a khichhaizy cha vâphuh lâ a chhi ta, vâphuh liata pala kô a chahypa ry liata nyu ta.

⁷ Zerikô bei chyhsazy ta Zawdâh chakana su taihta mohparutuhpazy cha a chadai ei ta. Chadaituhpazy ama puapata nahta, thokhy chhikao khaw ha ei ta.

⁸ Mohparutuhpazy amâ zia hlâta, Rahâbi cha ama yna vâphuh lâ khy ta,

⁹ ama hnohta, “He râh he Abeipa ta a cha pie ha ei tahpa ei pahno. Nâmo china ta miah chanaoh ha ta, he râh liata a pahrâpa zydua nama hmiakô liata ama zao khai haw.

¹⁰ Izi tawhta nama kaw pua nota, Abeipa ta nama hmiakô liata Tilaipi Saihpa a pakuasazie nata Zawdâh haosâ Amawri bei pano Sihaw nata Ôkâ zy chô liata nama taozie zy thei pi ta, âmo cha tlokhuh nama pahleipadia khai hapa thâtihzy eima vaw thei.

¹¹ Cha thâtih cha eima theipa nahta, Abeipa nama Khazohpa cha chô lâ avâ liata nata a ry lâ alei liata Khazohpa a châpa vâta, eima pathipalôhzy zao khai ha ta, nâmo vâta palôh a pachyu theipa ahy hmah y khao veih ei.

¹² Chavâta tahmâ Abeipa moh ta bie einâ taih awpa ei chi ta ei châ haw ei. Kei ta nama chô liata ngiachhiena ei palâsapa hawhna heta, nâmo chhao ta ei paw chhôhkha chô liata ngiachhiena palâsa awpa ta bie nâ taih u la, ei lôh thei nawpa ta ngiana na pie teh u.

¹³ Chatanachata ei nô nata ei paw, ei rilâhpazy, ei narôzy nata ama chhôhkha zydua pahlôhpa châ aw ei ta, thina tawhta eima hrona miah nama pachha ha aw,” tah ta.

¹⁴ Mohparutuhpazy ta a hnohta, “Eima hmotaopa he nama reih leipa khiahta cha, eima hrona ta nama hrona cha pachha aw pi ta, eima thipa chhao ta eima thi aw. Abeipa ta râh he miah a pie tita, cha ngiachhie aw pi ta, na chô liata ngâchhih ngaitapa ta eima tao aw,” tah ei ta.

¹⁵ Rahâbi o cha khihpi thokhy pahniehpa ta sapa châ ta, thokhy chô liata a ypa a châpa vâta, chaori pangieh ta, mohparutuhpazy cha opy lâ tawhta pachôsa ta.

¹⁶ Ama hnohta, “Tlâhpi lâ khi pangaipa ta sie muh vy. Chataleipatala châ chadaituhpazy khata ama cha hmô pathlei aw. Châ chadaituhpazy ama kua heih hlâlei, cha liata noh thôh a nyu chy aw ei chi ta, cha khai tawhta nama sie nawpa lâ nama sie aw,” tah ta.

¹⁷ Mohparutuhpazy ta a hnohta, “Bie miah na pataihsapa tawhna heta thaileichâna hnei aw ma pi.

¹⁸ Nathlie teh, he râh eimâ vaw ngia tita, pala saihpa he miah na pangiehna opy liana he vaw chahry aw chi ta, na nô nata na paw, na rilâhpazy nata na paw chhôhkha zydua cha na o chhôh liata na paysa khai aw ei.

¹⁹ Ahy rai na o chhikao tawhta khiliah lâ a puapa maih cha, a thisaih maoh ano luh chô liata y aw ta, keimo cha thailei châ aw ma pi. O chhôh liata na hnohta a ypa chô liata ku pathlapa a châ khiahta deikua cha, a thisaih maoh cha eima luh chô liata a y aw.

²⁰ Eima hmotaopa he na reih khiahta deikua cha, bie miah na pataihsapa heta miah chahry leipa aw ta, thailei châ aw ma pi,” tah ei ta.

²¹ Ano ta, “Nama bie hawhta châ mawh sy,” tah ta. Chatanachata mohparutuhpazy cha pasiesa ta, sie ha ei ta. Rahâbi ta Pala saihpa ta opy cha chahry ta.

²² Mohparutuhpazy cha pua ei ta, tlâhpi lâ cha sie ei ta, a vaw chadaipazy ama kua hlâlei, cha liata noh thôh y ei ta. Chadaituhpazy ta lâpi tlykha tlua ei ta, châhrasala hmô leipa ei ta.

²³ Mohparutuhpa pano cha a lie ei ta. Tlâhpi tawhta za chô ei ta, chavah chaka ei ta, Nunâ sawchapawpa Zawsua kô kei tlô ei ta, ama chô liata hmo a tlôpa zydua chho ei ta.

²⁴ Zawsua hnohta, “Abeipa ta râh zydua eima ku liata miah a vaw pie ha tlai na. Cha râh liata a pahrâpa zydua keimo vâta ama zao khai haw,” tah ei ta.