ZAWSUA 19 - Mara Bible RV (BSI)

Simeôna râh

¹ Nuby a daopa mianona cha, Simeôna chi ta a pho pho ta ama to awpa ta Simeôna chô liata tlu ta, ama to awpa râh cha Zudâh pathlazy ryuto râh chhôh liata a y.

² Khihpi ama topazy cha Bâsebâ, Sebâ, Môladâ,

³ Hâzasualâ, Balâ, Ezemâ,

⁴ Eltôlâ, Bethulâ, Hômâ,

⁵ Zikalâ, Bemâkabô, Hâzasusâ,

⁶ Bethlebô nata Saruhe khihpizy châ ei ta, khihpi miahrawh hleithôh y ta, khichapeihzy ama hnei.

⁷ Khihpi hropa miapalih, Ainâ, Rimaw, Etherâ nata Asanâ khihpizy nata ama khichapeihzy â hlao hra.

⁸ Cha khihpizy chheipâh liata ama khichapeih zydua, Bâlâbe nata Râmâ chho lâ taihta amâ hlao. Chazy cha Simeôna chi ta a pho pho ta ama topa ryuto râhzy a châ.

⁹ Simeôna pathlazy ryuto râh cha Zudâh pathlazy tovyuh tawhta lapa a châ. Zudâh pathlazy tovyuh cha ama châta a kawh tu hapa vâta, Simeôna pathlazy cha Zudâh pathlazy ryuto râh tawhta pachhaihpa ama châ.

Zebulawna râh

¹⁰ Nuby a daopa miathôhna cha Zebulawna pathlazy ta a pho pho ta ama to awpa ta Zebulawna chô liata tlu ta. Ama ryuto râh cha Sâridâ taih a tlô.

¹¹ Ama râhri cha notla lâta sie ta, Maria lâ khy ta, Dâbese kaw hria ta, Zôkania kiapâh liata vahtiepa taih tlô ta.

¹² Sâridâ tawhta nochhi lâta noh chhina dady ta sie lymâ ta, Kilôbaw râhri taih tlô ta, Dâberâ lâta pua ta, Zaphia lâta khy ta.

¹³ Cha tawhna chata nochhi lâta Kahepha nata Ekazi lâta sie lymâ ta, Rimaw liata pua ta, Niah lâ pako ta.

¹⁴ Cha tawhna chata râhri cha maw lâta pako heih ta, Hânathô lâta sie ta, Iphatâhe saikao liata a kaw pua.

¹⁵ Zebulawna khihpizy cha Kâtâ, Nâhalâ, Simrô, Idâlâ nata Bethlehe zy châ ei ta, khihpi miahrawh hleino y ta, khichapeihzy ama hnei.

¹⁶ Cha khihpizy nata ama khichapeihzy he Zebulawna pathlazy ta a pho pho ta ama topa ryuto râh a châ.

Iskâra râh

¹⁷ Nuby a daopa miapalihna cha Iskâra pathlazy ta a pho pho ta ama to awpa ta Iskâra chô liata tlu ta.

¹⁸ Ama râh khihpizy cha Zezari, Kesulô, Sune,

¹⁹ Hâphari, Siônâ, Anâharâ,

²⁰ Râbi, Kisiônâ, Ebeza,

²¹ Reme, Enkâni, Enhâdâ nata Bepâze ama châ.

²² Râhri cha Tabaw, Sâzumâ nata Beseme khihpizy taih tlô ta, Zawdâh chavah liata a chhâ. Khihpi miahrawh hleicharu y ta, khichapeihzy ama hnei.

²³ Cha khihpizy nata ama khichapeihzy cha Iskâra pathlazy ta a pho pho ta ama topa ryuto râh a châ.

Asera râh

²⁴ Nuby a daopa miapangawhna cha Asera pathlazy ta a pho a pho ta ama to awpa ta Asera chô liata tlu ta.

²⁵ Ama râh khihpizy cha Helkâthâ, Hâli, Bete, Âkasâ,

²⁶ Alâmele, Amadi nata Misâ zy a châ. Notla lâta Kâmel nata Sihôlinâ taih tlô ta,

²⁷ cha tawhna chata noh chhina lâta pako ta, Bedekô lâ khy ta, cha tawhna chata Zebulawna nata Iphatâhe saikao maw lâta Betheme nata Nelâ taih tlô ta, chavei lâta Kabu liata a chhâ.

²⁸ Cha tawhna chata Hebraw, Rehô, Hâmô nata Kânâ zy lâta sie lymâpa ta, Sidaw Laipa taih tlô ta.

²⁹ Cha tawhna chata râhri cha Râmâ lâta pako ta, thokhy hneipa Tyre khihpi lâta sie ta, cha tawhna chata Hôsâ lâta pako ta, Akazi râh tilaipi liata a chhâ.

³⁰ Umâ, Aphe nata Rehô khihpizy chhao Asera râh liata a hlao ta, khihpi mia kih nata miano y ta, khichapeihzy ama hnei.

³¹ Cha khihpizy nata khichapeihzy cha Asera pathlazy ta a pho pho ta ama topa ryuto râh a châ.

Nâthalai râh

³² Nuby a daopa miacharuna cha Nâthalai pathlazy ta a pho a pho ta ama to awpa ta Nâthalai chô liata tlu ta.

³³ Ama râhri cha Helepha nata Zanâni thokô laipa tawhta a thao ta, Adamineke nata Zabane zy chahryh laih ta, Zawdâh chavah liata a chhâ.

³⁴ Cha tawhna chata râhri cha notla lâ pakopa ta Aznôtabaw lâ sie ta, cha tawhna chata Hôkô lâta sie ta, chho lâta Zebulawna râh kei tlô ta, notla lâta Asera râh kei tlô ta, nochhi lâta Zudâh râh liata Zawdâh chavah liata a chhâ.

³⁵ Khihpi thokhy a hneipazy cha Zidi, Zerâ, Hâmâ, Rakâ, Chinere,

³⁶ Adamâ, Râmâ, Hâzaw,

³⁷ Kedesâ, Edarei, Enhâzaw,

³⁸ Iraw, Mikadâle, Hôre, Bethanâ nata Beseme zy châ ei ta, khihpi miahrawh hleichaki y ta, khichapeihzy ama hnei.

³⁹ Cha khihpizy nata ama khichapeihzy cha Nâthalai pathlazy ta a pho pho ta ama topa ryuto râh a châ.

Dânâ râh

⁴⁰ Nuby a daopa miasarina cha Dânâ pathlazy ta a pho pho ta ama to awpa ta Dânâ chô liata tlu ta.

⁴¹ Ama ryuto râh cha Zôrâ, Estaw, Iseme,

⁴² Sâbi, Aizalô, Zethalâ,

⁴³ Elaw, Timnâ, Ekaraw,

⁴⁴ Elteke, Kibethaw, Bâlathâ,

⁴⁵ Zehudi, Beneberâ, Kâthârimô,

⁴⁶ Mezakô nata Rakaw khihpizy nata Zôpâ daih lâta râhzy a châ.

⁴⁷ Dânâ pathlazy cha ama râh awpa zydua ama la khai thei leipa vâta, Lese a kaw dyuh ei ta, la ei ta, zaozi ta pahleipadia ei ta, râh cha ama hnei haw. Cha liata pahrâ ei ta, ama pathlatuhpa Dânâ moh paphaopa ta Lese cha Dânâ tahpa ta a moh ama bi.

⁴⁸ Cha khihpizy nata khichapeihzy cha Dânâ pathlazy ta a pho pho ta ama topa ryuto râh a châ.

Zawsua ryuto râh

⁴⁹ Râh cha ryu ta to awpa ta ama tovyuh chyu raipa a châ khai tawhta, Izarei sawzy ta Nunâ sawchapawpa Zawsua cha ama hry liata ryuto râh pie hra ei ta.

⁵⁰ Ano ta â hawpa Epharai tlâh râh liata Timnâserâ khihpi cha, Abeipa biepiepa hawhta Zawsua pie ei ta. Khihpi cha paduapathi ta, cha liata a pahrâ.

⁵¹ Chazy cha theihthaipa Eliaza, Nunâ sawchapawpa Zawsua nata Izarei chizy liata pho pawhrâhpazy ta Silô khihpi liata ahmaohna poh o chhikao liata Abeipa hmiakô ta nuby a daopa ta ryuto râh ama raipazy a châ. Cha hawhna chata râh araina cha ama patlô haw.