ZAWSUA 18 - Mara Bible RV (BSI)

Râh laipa raina

¹ Izarei zawpi zydua Silô khihpi liata a pahmaoh ei ta, cha liata achhyna poh o parai ei ta. Râh cha ama biehneina ry liata y ha ta.

² Châhrasala Izarei sawzy hry liata ama ryuto râh rai mâh leipa chi sari y chy ei ta.

³ Zawsua ta Izarei sawzy hnohta, “Zehôvah, châ pathlatuhpazy Khazohpa ta râh a cha piepa lâ a ngiapa ta, râh cha hnei awpa ta khati taih ma lôhkhô namâ hli chy aw tly?

⁴ Chi to tawhta chyhsa pathôh chyu a tlyh u la, âmo cha tuah aw na ta, âmo cha sie aw ei ta, râh cha kei chahryh aw ei ta, ama ryuto râh chyu awpa cha roh aw ei ta, kei lâ amâ vaw lie heih aw.

⁵ Râh cha su sari ta ama pachhaih aw. Zudâh cha chho lâta a râh liata y aw ta, Zawsi chi cha Maw lâta ama râh liata ama y aw.

⁶ Râh cha su sari ta pachhaih aw ei chi ta, nama pachhaihzie cha he su liata kei lâ vaw tlôkhei aw ei chi ta, chatanachata he liata Abeipa eima Khazohpa hmiakô liata nuby ei châ daopa aw ei.

⁷ Livai chi deikua cha, Abeipa theihthaina raihria cha ama ryuto a châpa vâta, nama hry liata tovyuh hnei aw veih ei. Kâdâ, Rubena nata Manase chi khophie chhao Zawdâh haosâ nochhi lâ liata Abeipa chakaotuhpa Mawsi ta ama ryuto râh a vaw piepa kha ama to hra,” tah ta.

⁸ Chyhsazy cha thyu ei ta, sie ha ei ta. Râh thâtih ro awpa ta a siepazy hnohta Zawsua ta, “Râh cha va chahryh u la, a thâtih roh khai u la, kei lâta vaw tlôkhei heih muh vy. He Silô khih liana heta Abeipa hmiakô liata nuby ei châ daopa aw ei,” tahpa ta biepie ta.

⁹ Chyhsazy cha sie ei ta, râh cha chahryh ei ta. Râh cha su sari ta pachhaih ei ta, su to chhôh liata khih zydua cha châbu liata roh khai ei ta. Cha khai tawhta Zawsua yna Silô khihpi liata riehmo lâ a vaw lie ei ta.

¹⁰ Zawsua ta Silô khihpi liana chata Abeipa hmiakô liata âmo châta nuby a dao ta. Cha liata Zawsua ta Izarei sawzy cha ama chi apachhaihna yzie hawhta râh cha rai ta.

Benzami râh

¹¹ Benzami chi ta a pho pho ta ama to awpa râh cha nuby a daopa châ ta, Zudâh pathla nata Zawsi pathlazy likawh râh cha âmo ryuto râh châta raopa a châ.

¹² Maw lâta ama râhri cha Zawdâh tawhta a thao ta, Zerikô baikhaihpa siepahliepa ta maw lâta khy ta, notla tlâh râh chapiapa ta khy lymâ ta, Beve râhchawhpa liata a chhâ.

¹³ Cha tawhna chata râhri cha Luzi baikhaihpa chapiapa ta chho lâta a sie. Luzi cha Bethel tahpa a châ hra. Cha tawhna chata Atarôthadâ lâta chô ta. Atarôthadâ cha Mathi Behôrô chho lâta tlâh liata a ypa a châ.

¹⁴ Behôrô chho lâta tlâh tawhna chata râhri cha notla baih lâ tawhta chho lâta pako ta, Zudâh pathlazy khihpi Kiriabâlâ liata a kaw pua. Kiriabâlâ he Kiriaziari tahpa a châ hra. Cha cha notla lâta a ypa râh a châ.

¹⁵ Chho lâta râhri cha Kiriaziari chhâna tawhta a thao ta, notla lâta sie lymâ ta, Nephatô chavah hnawh liata a pua.

¹⁶ Cha tawhna chata râhri cha Hinô Sawchapawpa Saikao dady ta a ypa tlâh thaby lâta chô ta. Cha tlâh cha Rephai Saikao maw lâta a ypa a châ. Râhri cha Zebu mo khihpi chho baikhaihpa chapiapa ta Hinô Saikao lâta chô ta, Erôke liata a pua.

¹⁷ Cha tawhna chata maw lâta pako ta, Enâseme lâta sie ta, Adumi lâ khyna dady ta a ypa Kelilô lâta sie ta, Rubena sawchapawpa Bôhâ Lôpanô lâta chô ta,

¹⁸ Arabâ maw lâta baikhaihpa chapiapa ta Arabâ lâta chô ta,

¹⁹ cha tawhna chata râhri cha Behôkalâ maw lâta baikhaihpa chapiapa ta sie lymâ ta, chho lâta Zawdâh chavah za chhâna Tilaipi Iahpa maw lâta lihchakô liata a pua. Cha cha chho lâta râhri a châ.

²⁰ Nochhi lâta râhri cha Zawdâh chavah a châ. Cha cha Benzami pathlazy ta a pho pho ta ama to awpa ryuto râh ta a ôna chhôh a châ.

²¹ Hezy he Benzami chi ta a pho pho ta ama to awpa khihpizy a châ: Zerikô, Behôkalâ, Emekezezi,

²² Betharâbâ, Zemarai, Bethel,

²³ Avimi, Pârâ, Ôpharâ,

²⁴ Kepharâmôni, Ôphani nata Kebâ khihpizy châ ei ta, khihpi miahrawh hleino y ta, khichapeihzy ama hnei.

²⁵ Kibiô, Ramâ, Berô,

²⁶ Mizpeh, Kephirâh, Môzâ,

²⁷ Reke, Ipelâ, Târalâ,

²⁸ Zelâ, Helepha, Zebu khihpizy chhao amâ hlao. Zebu cha Zerusale a châ. Kiria­ziari nata Kibi khihpizy chhao a hlao ei ta, khihpi miahrawh hleipalih y ta, khichapeihzy ama hnei. Chazy cha Benzami pathlazy ta a pho pho ta ama to awpa ryuto râh a châ.