ZAWSUA 17 - Mara Bible RV (BSI)

Manase pathlazy râh

¹ Manase cha Zawsi sawchapaw uhtheipa a châpa vâta, hetana heta a tovyuh taopa a châ. Manase sawchapaw uhtheipa cha Mâkhi châ ta, Mâkhi cha Kilia paw a châ. Mâkhi cha pheisaih riahphapa a châpa vâta, Kilia nata Bâsanâ râh cha ano piepa a châ.

² Manase pathla hropazy, Abieze pathlazy, Helekâ pathlazy, Asrie pathlazy, Sekhe pathlazy, Hepha pathlazy nata Semidâ pathlazy chhao a pho pho ta ryuto râh piepa ama châ hra. Âmo cha Zawsi sawchapawpa Manase pathla chapawzy a pho pho ta a laichadaipa ama châ.

³ Manase pathla Zelôphehâ deikua cha sawchapaw hnei leipa ta, sawchanô sai hnei ta, a sawchanôzy moh cha Mâhlâ, Noâh, Hôkalâ, Milkâ nata Tizah zy ama châ. Zelôphehâ paw cha Hepha châ ta, Hepha paw cha Kilia châ ta, Kilia paw cha Mâkhi châ ta, Mâkhi paw cha Manase a châ.

⁴ Zelôphehâ sawchanôzy ta theihthaipa Eliaza nata Nunâ sawchapawpa Zawsua nata chhituhpazy lâ vawh ei ta, ama hnohta, “Eima rilâhpazy hry liata ryuto râh miah pie hra awpa ta Abeipa ta Mawsi kha bie a pie,” tah ei ta. Chatanachata Abeipa pakah bie hawhta, Zawsua ta âmo cha ama paw unawhzy hry liata ryuto râh a pie hra ei.

⁵ Chatanachata Zawdâh haosâ nochhi lâta Kilia nata Bâsanâ râhzy hleikhô ta, Manase cha ryuto râh su hrawh tlai to ta.

⁶ A chhâpa cha Manase sawchanôzy ta a sawchapawzy hry liata ryuto râh ama hnei hrapa vâta a châ. Kilia râh cha Manase sawchapaw hropazy piepa a châ.

⁷ Manase râhri cha Asera tawhta a thao ta, Sekhe nochhi lâta a ypa Miamethâ lâta sie ta, cha tawhna chata râhri cha chachâh lâta sie lymâ ta, Entapua mo yna taihta sie ta.

⁸ Tâpuah râh cha Manase eih châ ta, Manase râhri daih lâta Tâpuah khih deikua cha Epharai pathlazy eih a châ.

⁹ Râhri cha chho lâta chô ta, Kânâ vahtiepa tlô ta. Manase khihzy hry liata Epharai khih thokha y hra ta, Manase râhri deikua cha, vahtiepa maw lâta sie ta, tilaipi liata a chhâ.

¹⁰ Chho lâ Epharai râh châ ta, maw lâ Manase râh a châ. Manase râh cha tilaipi taih tlô ta, maw lâta Asera râh nata a ri ta, nochhi lâta Iskâra râh nata â ri.

¹¹ Iskâra nata Asera râhzy liata chhao Manase ta khihpizy hnei ta, Besia nata a khichapeihzy, Ibalia nata a khichapeihzy, Dôrâ khihsawzy nata a khichapeihzy, Enadô khihsawzy nata a khichapeihzy, Tânâ khihsawzy nata a khichapeihzy nata Mekidô khihsawzy nata a khichapeihzy cha Manase khihpizy châ ei ta, bia thôh a ô.

¹² Châhrasala Kâna mo ta cha râh liata pahrâ khâchâ amâ chhuah hapa vâta, cha khihpizy cha Manase pathlazy ta hnei thei veih ei.

¹³ Izarei sawzy ama tha a vaw tlô via nahta, Kâna mo cha raihriatuhpa ta tao ei ta, ama zydua ta papua khai khao veih ei.

¹⁴ Zawsi pathlazy ta Zawsua hnohta, “Abeipa ta byhnâ miah pie lymâ ta, tahmâ cha chipho lai ngaitapa vaw châ ha pi ta, kheihtazie ta tovyuh miakha deita miah patosa chi ta, ryuto râh su kha deita miah na pie thlâh haw,” tah ei ta.

¹⁵ Zawsua ta ama hnohta, “Cha hawhta maluh hluh ngaitapa chipho châ u la, Epharai tlâh râh cha nama châta a buah tu khiahta cha, nâmo tlai ta Perizi mo nata Rephai mo râh lâ khy u la, ama râhmâhpazy khi nama y nawpa ta kaw pathai muh vy,” tah ta.

¹⁶ Zawsi pathlazy ta, “Tlâh râh deita cha eima châta a daih aw vei. Châhrasala bypi râh liata a pahrâpa Kâna mo, Besia nata a khichapeihzy nata Zezari saikao liata a ypa zydua ta thua talailih hnei khai tlôh ei ta,” tah ei ta.

¹⁷ Zawsua ta Zawsi chi Epharai nata Manase pathlazy hnohta, “Chi laipa châ ei chi ta, nama tha chhao tlô ngaita ta, chavâta tovyuh miakha dei hnei aw veih ei chi.

¹⁸ Tlâh râh khi nâmo eih a châ aw. Râhmâhpa châ hra sala, pathai aw ei chi ta, a râh zydua nama eih a châ aw. Kâna mo cha thua talailihzy hneipa ta ama thatlô kaw hra sala nama papua thei aw,” tah ta.