ZAWSUA 16 - Mara Bible RV (BSI)

Epharai nata Manase râhzy

¹ Zawsi pathlazy tovyuh cha Zerikô tizy nochhi lâta a ypa Zerikô dady Zawdâh chavah tawhta a thao ta, Zerikô tawhta râhchawhpa lâta sie lymâ ta, Bethel tlâh râh lâta khy ta,

² Luzi ama tahpa Bethel tawhta Arakhi râh Atarô chapiapa ta sie lymâ ta,

³ notla lâta Zaphâle râhri lâta chô ta, Behôrô mathi taihta sie ta, Keze lâ chô ta, tilaipi liata a chhâ.

⁴ Chazy cha Zawsi pathla Manase nata Epharai chizy ryuto râh a châ.

⁵ Hezy he Epharai pathlazy ta a pho pho ta ama to awpa ryuto râh a châ: Nochhi lâta ama râhri cha Atarôthadâ tawhta Behôrô machhua lâ taihta châ ta,

⁶ cha tawhna chata râhri cha tilaipi lâta sie ta, maw lâta Mikamethâ y ta, nochhi lâ pakopa ta Tanâsilô lâta sie ta, Zanô nochhi lâta sie lymâ ta,

⁷ Zanô tawhta Atarô nata Nârâ lâta chô ta, Zerikô tlô ta, Zawdâh liata a kaw pua.

⁸ Râhri cha Tâpuah tawhta notla lâta Kânâ chavah taihta sie lymâ ta, tilaipi liata a chhâ. Chazy cha Epharai chi ta a pho pho ta ama topa ryuto râh a châ.

⁹ Chazy thota, Manase pathlazy ryuto râhzy hry tawhta Epharai pathlazy châta raopa khihpi nata ama khichapeih zydua â hlao.

¹⁰ Keze liata a pahrâpa Kâna mo deikua cha, papua veih ei. Chavâta Kâna mo cha tanoh taihta Epharai mo hry liata pahrâ ei ta, rai hriatuhpazy ta taopa ama châ.