ZAWSUA 15 - Mara Bible RV (BSI)

Zudâh râh

¹ Zudâh chi ta a pho pho ta ama to awpa piepa râh cha chho lâta Edômâ râhri nata chho chhâna Zini râhchawhpa taihta a châ.

² Chho lâta ama râhri cha Tilaipi Iahpa chhâna, chho lâ a heihpa lihchakôpa tawhta a thao ta,

³ Akarâbi lâ kiana chho lâ pangaipa ta sie lymâ ta, Zini tlô ta, Kâdesbânia chho lâta khy ta, Hezrô kei tlô ta, Adarâ lâ khy ta, Kâkâ lâta pako ta,

⁴ Azmaw lâta sie ta, Izi chavah liata pua ta, tilaipi cha râhri chhâna a châ. Cha cha chho lâta nama râhri awpa a châ.

⁵ Nochhi lâ râhri cha Tilaipi Iahpa châ ta, Zawdâh tichhi taih a châ. Maw lâ râhri cha Zawdâh tichhi liata tilaipi lihchakôpa tawhta a thao ta,

⁶ Behôlâ lâta khy ta, Betharâbâ maw lâta sie lymâ ta, Rubena sawchapawpa Bôhâ Lôpanô taih khy ta.

⁷ Râhri cha Akhôrâ Saikao tawhta Debi lâta khy lymâ ta, Kilkal lâ pangaipa ta maw lâta sie ta. Cha cha saikao chho lâta a ypa Adumi mo yna lâ khyna dady liata a ypa a châ. Râhri cha Enâseme tizy chapiapa ta sie lymâ ta, Erôke liata a chhâ.

⁸ Cha tawhna chata râhri cha Hinô Sawchapawpa Saikao lâta khy ta, Zebu mo yna chho baikhaihpa taih tlô ta. Zebu he Zerusale a châ. Râhri cha Hinô notla lâta saikao kiapâh ta a ypa tlâh laki lâta khy ta. Cha cha Rephai maw lâta saikao chhâna a châ.

⁹ Tlâh laki tawhta râhri cha Nephatô chavah hnawh lâta sie ta, Epharaw tlâh khihpizy liata pua ta, Bâlâh lâta chô ta. Bâlâh cha Kiriazeri a châ.

¹⁰ Râhri cha Bâlâh liata pakopa ta notla lâta Seirâ Tlâh lâta sie ta, Ziari Tlâh maw lâ baikhaihpa chapiapa ta sie lymâ ta. Ziari he Keslaw a châ. Cha tawhna chata Beseme lâta chô ta, Timenâ chapiapa ta sie lymâ ta.

¹¹ Râhri cha Ekaraw maw lâ baikhaihpa lâta sie ta, Sikarô lâta pako ta, Bâlâh tlâh liata sie lymâ ta, Zabine liata pua ta, tilaipi liata a chhâ.

¹² Notla lâta râhri cha Tilaipi Laipa nata a ngiahkâ zydua a châ. Cha cha Zudâh pathlazy châta a pho pho ta ama to awpa râh a châ.

Kâlebâ ta Hebraw nata Debi a pahnie

¹³ Abeipa ta bie a piepa hawhta, Zawsua ta Zephune sawchapawpa Kâlebâ cha Zudâh pathlazy hry liata tovyuh pie hra ta, a tovyuh cha Kiriathâbâ a châ. Cha cha Hebraw ama tah hra. Arabâ cha Anâki paw a châ.

¹⁴ Kâlebâ ta Anâki pathla pathôh, Sesai, Ahimâ nata Tâmai zy cha Hebraw khihpi tawhta papua ta.

¹⁵ Cha tawhna chata Debi khih liata a pahrâpazy khyhnao ta. Hlâno ta cha Debi he Kiriasephâ tahpa a châ.

¹⁶ Kâlebâ ta, “Ahy rai Kiriasephâ a dyuh ta a pahniepa cha ei sawchanô Akasâ lapinô ta ei pahneisa aw,” tah ta.

¹⁷ Kâlebâ unawhpa Kenâza sawchapawpa Ôthane ta Kiriasephâ cha pahnie ta, chatanachata Kâlebâ ta a sawchanô Akasâ cha lapinô ta pahneisa ta.

¹⁸ Ôthane lâ a vaw nahta, Akasâ ta a paw liata râh hia awpa ta a vahpa reipasao ta. Akasâ cha alâ tawhta chô ta, Kâlebâ ta a hnohta, “Khâpa na khoh?” tah ta.

¹⁹ Akasâ ta, “Byhnâ na awpa mah y. Neke râh eina pie ha hnohkua chi cha, tihnawhzy chhao eina pie pâ hra awpa chi ta ei châ haw,” tah ta. Chatanachata Kâlebâ ta Akasâ cha machhua lâta tihnawh nata mathi lâta tihnawhzy pie ta.

Zudâh khihpizy

²⁰ Hezy he Zudâh chi ta a pho pho ta ama to awpa ryuto râh a châ:

²¹ Edômâ râhri daih chho chhâna lâta Zudâh chi khihpizy cha Kâbazelâ, Ederâ, Zaku,

²² Kinâ, Dimônâ, Adadâ,

²³ Kedesâ, Hâzaw, Ithanâ,

²⁴ Ziphi, Tele, Belô,

²⁵ Hâzawhâdatâ, Keriôhezraw, cha cha Hâzaw ama tah hra,

²⁶ Amâ, Semâ, Môladâ,

²⁷ Hâzakâdâ, Hesmaw, Bepele,

²⁸ Hâzasualâ, Bâsebâ, Biziôthia,

²⁹ Bâlâh, Imâ, Eza,

³⁰ Eltôlâ, Khesi, Hômâ,

³¹ Zikalâ, Mâmanâh, Sâsanâ,

³² Lebao, Sili, Aina nata Rimaw khihpizy a châ. Khihpi zydua cha khih kih nata khih chaki châ ta, khichapeihzy ama hnei.

³³ Notla bypi râh liata Zudâh khihpizy cha hezy he a châ: Estô, Zôrâh, Âsanâ,

³⁴ Zanô, Enkâni, Tâpuah, Enâ,

³⁵ Zarâmu, Adulâ, Sôkô, Azekâ,

³⁶ Saraimi, Adithai, Kederâ nata Kederôthai, khihpi mia hrawh hleipalih nata ama khichapeihzy;

³⁷ Zenâ, Hadâsâ, Midakâ,

³⁸ Dilia, Mizpeh, Zôthelâ,

³⁹ Lakhi, Bôzakâ, Ekalaw,

⁴⁰ Kabônâ, Lâmâ, Kili,

⁴¹ Kederaw, Bedakô, Nâmâh, Mâkedâ, khihpi mia hrawh hleicharu nata ama khichapeihzy;

⁴² Libnâ, Ethâ, Âsâ,

⁴³ Iphatâ, Âsanâ, Nezi,

⁴⁴ Keilâh, Akazi nata Mâresâ, khihpi mia chaki nata ama khichapeihzy;

⁴⁵ Ekaraw nata a khihpizy nata a khichapeihzy;

⁴⁶ Ekaraw tawhta tilaipi taihta Asadô kiapâh ta a ypa khihpi zydua nata ama khichapeihzy;

⁴⁷ Asadô nata a khihpizy nata ama khichapeihzy; Kâza nata a khihpizy nata ama khichapeihzy; Izi chavah taihta nata Tilaipi Laipa nata a ngiahkâzy liata a ypa khihpizy cha notla bypi lâta Zudâh khihpizy a châ khai.

⁴⁸ Tlâh râh liata Zudâh khihpizy cha hezy he a châ: Sâmi, Zatia, Sôkô,

⁴⁹ Dânâ, Kiriasânâ, cha cha Debi tahpa a châ hra,

⁵⁰ Anabâ, Estemô, Animâ,

⁵¹ Kôse, Hôlô nata Kilô, khihpi mia hrawh hleikha nata ama khichapeihzy;

⁵² Arabâ, Dumâ, Esâ,

⁵³ Zani, Betapua, Aphekâ,

⁵⁴ Humtâ, Hebraw ama tah hrapa Kiriathâbâ nata Ziôrâ, khihpi mia chaki nata ama khichapeihzy;

⁵⁵ Maônâ, Kâme, Ziphi, Zutâ,

⁵⁶ Zezari, Zôdia, Zanô,

⁵⁷ Kainâ, Kibia nata Timnah, khihpi miahrawh nata ama khichapeihzy;

⁵⁸ Hâlahu, Bezu, Kedaw,

⁵⁹ Mârathâ, Bethanô nata Eltekô, khihpi miacharu nata ama khichapeihzy nata

⁶⁰ Kiriaziari ama tah hrapa Kiriabâlâ nata Râbâ, khihpi miano nata ama khichapeihzy cha, Tlâh râh liata Zudâh khihpizy ama châ.

⁶¹ Râhchawhpa râh liata Zudâh khihpizy cha hezy he ama châ: Bethârabâ, Midi, Sekâkâ,

⁶² Nibâsâ, Alôh Khihpi nata Enkedi khihpi zy châ ei ta, khihpi miacharu y ta, khichapeihzy ama hnei.

⁶³ Zerusale liata a pahrâpa Zebu mo deikua cha, Zudâh pathlazy ta papua thei veih ei. Chavâta Zebu mo cha tanoh taihta Zerusale liata Zudâh pathlazy nata hmaohkha ta ama pahrâ.