ZAWSUA 14 - Mara Bible RV (BSI)

Zawdâh notla lâ râh raina

¹ Hezy he Izarei sawzy ta Kâna râh liata ryu ta ama topa râhzy a châ. Theihthaipa Eliaza, Nunâ sawchapawpa Zawsua nata Izarei chizy liata ama pho pawhrâhpazy ta, he râhzy he Izarei sawzy hnohta ama rai.

² Abeipa ta Mawsi hmâpa ta bie a piepa hawhta, chi chaki nata khophie to awpa râhzy cha nuby a daopa ta raipa a châ.

³ Chi no nata khophiezy ryuto awpa râhzy cha Mawsi ta Zawdâh haosâ liata pie ha ta, Livai pathlazy deikua cha ama hry liata ryuto râh pie vei.

⁴ Zawsi pathlazy tawhta Manase nata Epharai tahpa ta chi no ta ama pua hapa vâta, Livai pathlazy cha râh to hra leipa ei ta, ama pahrâ nawpa châta khihpizy nata ama sahrohzy lao pabâsa nawpa châta khihpi chheipâh sibiepa râhzy piepa tlao ama châ.

⁵ Abeipa ta Mawsi bie a piepa hawhta Izarei sawzy ta tao ei ta, râh cha amâ rai.

Kâlebâ ta Hebraw râh a to

⁶ Zudâh pathlazy ta Kilkal liata Zawsua lâ a vy ei ta. Keniza chyhsa Zephune sawchapawpa Kâlebâ ta Zawsua hnohta, “Abeipa ta Kâdesbânia liata Khazohpa chyhsa Mawsi hnohta nâma nata keima kyh liata a reipa kha na pahno.

⁷ Abeipa chakaotuhpa Mawsi ta râh mohparu awpa ta Kâdesbânia tawhta eina tua nona kha kô sypalihpa châ na ta, ei palôh liata a ypa hawh tlai ta a hnohta bie ei za tlôkhei.

⁸ Ei hnohta a siepa ei unawhzy ta zawpi thlah thata pazo ei ta, kei deikua cha pathipalôh tlokhuh ta Abeipa ei Khazohpa pazi na ta.

⁹ Cha noh ta Mawsi ta ei hnohta, ‘Na pathipalôh tlokhuh ta Abeipa ei Khazohpa na pazipa vâta, na phei ta na tlypa râh cha nâ nata na pathlazy ta chhâzaw ryu ta nama to awpa a châ tlai aw,’ tahpa ta bie nâ taih ta.

¹⁰ Chavâta tahmâ pachâ tua, cha bie cha râhchawhpa liata Izarei sawzy ama viavi hai nota Abeipa ta Mawsi a chhopa châ ta, cha daihti tawhta reipa ta, Abeipa ta a bie hawhta kô sypalih nata kô pangawh tlai na pahrosa ta, moh tua, tahmâ cha kô sycharie nata kô pangawhpa ei châ ha hih.

¹¹ Chatanachôta Mawsi ta eina tua daihti hawhna khata tahmâ chhao ei tha y chy ta, chariah a dyuh awpa nata puaei awpa ta, eikhano ta tha ei hneipa hawhna khata tahmâ chhao ei hnei chy.

¹² Chavâta Abeipa ta na pie awpa ta, kha noh ta a reipa tlâh râh he kei na pie mah y. Cha liata Anâki mo y ei ta, ama khihpizy lai ngaita ta, thokhyzy ta dôh khaipa ama châ tahpa chhao, kha noh ta pahno ha chi ta. Abeipa ta na bao aw ta, Abeipa ta a reipa hawhta, âmo cha ei papua aw ei,” tah ta.

¹³ Zawsua ta Kâlebâ cha byhnâ awpa ta, Hebraw cha Zephune sawchapawpa Kâlebâ hnohta a ryuto râh châta pie ta.

¹⁴ Chatanachata Keniza chyhsa Zephune sawchapawpa Kâlebâ cha a pathipalôh tlokhuh ta Abeipa Izarei Khazohpa a pazipa vâta, Hebraw cha tanoh taihta a ryuto râh a châ haw.

¹⁵ Hebraw cha Kiriathâbâ tahpa ta aw tyhpa châ ta, Arabâ cha Anâki mo hry liata chyhsa rônah chaipa a châ. Chatanachata adyuhna pai ta, râh cha thlahlôhpa ta y ha ta.